U9 ဖုန်းလိုင်း ၊အင်တာနက်လိုင်းတွေ ပြတ်တောက်နေဆဲ

အောက်တိုဘာ ၁၂

U9 ဆင်းကဒ်သုံးသူတွေ ဖုန်းလိုင်းတွေပြတ်တောက်ပြီး အင်တာနက်ပြတ်တောက်မှုပါ မနက်အစောပိုင်းကတည်းက ယခု မနက် ၉ နာရီ ကျော်တဲ့အထိ ကွန်ရက်ပြတ်တောက်နေဆဲဖြစ်တယ်လို့သိရပါတယ်။

မနက်အစောပိုင်း ၆ နာရီ လောက်ကတည်းက U9 အသုံးပြုသူအားလုံးမှာ ဖုန်းခေါ်ဆိုလို့မရတော့သလို အင်တာနက်လည်းသုံးစွဲမရတော့ဘဲ ကွန်ရက်ပြတ်တောက်နေတာဖြစ်ကြောင်း ၊ U9 ဘက်ကတော့ ကွန်ရက်ပြတ်တောက်မှုအတွက် လုပ်ဆောင်နေတယ်လို့ အသိပေးထားပါတယ်။

" မနက်ကတည်းက ဖုန်းကိုပိတ်လိုက်ဖွင့်လိုက် လေယာဥ်တင်လိုက်နဲ့လုပ်နေရတာ။ကိုယ်တယောက်ထဲဖြစ်နေတယ်ထင်တာ။ အခုသူတို့ပိုစ်တင်မှတနိုင်ငံလုံးဆိုတာသိတာ။ ဖြစ်ဖြစ်ချင်းကတော့မကြေငြာဘဲ အခုမှပို့စ်လာတင်တယ်။ ကဒ်တွေကလည်းလိုင်းမကောင်းတာကြာပြီ။သူတို့ U9 ပြောင်းပြီးကတည်းက လိုင်းလည်းစုတ်တာပဲ။" လို့ U9 ဝန်ဆောင်မှုအသုံးပြုသူတယောက်ကပြောပါတယ်။

U9 ကတော့ ယခုလို ကွန်ရက်ပြတ်တောက်မှုနဲ့ပတ်သက်ပြီး နည်းပညာပိုင်းဆိုင်ရာ အခက်အခဲတရပ်ကြောင့် U9 သုံးစွဲသူတွေရဲ့ ဝန်ဆောင်မှုကို ထိခိုက်စေတဲ့ ကွန်ရက်ပြတ်တောက်မှုတခု ဖြစ်ပွားနေကြောင်းနည်းပညာအဖွဲ့တွေက အဓိကပြဿနာရဲ့ ရင်းမြစ်ကို ဖော်ထုတ်ရန်နှင့် ဝန်ဆောင်မှုကို အမြန်ဆုံး ပြန်လည်ရရှိစေရန်အတွက် အရေးပေါ်အခြေအနေအဖြစ် အမြင့်ဆုံးဦးစားပေးဖြင့် အပြင်းအထန် ကြိုးပမ်းဆောင်ရွက်နေတယ်လို့ အသိပေးထားပါတယ်။

" ခုထိလိုင်းတွေမရသေးပါဘူး။ဖုန်းလည်းဆက်မရဘူး။ တကဒ်ထဲသုံးသူတွေကျဒုက္ခရောက်တာပေါ့။ဘာဖြစ်တာလဲမသိတော့ ကိုယ့်မှာအလုပ်တွေရှုပ်လိုက်တာမှပြောမနေနဲ့။တခြားကဒ်ဝယ်ပြီး ထည့်ရတာပေါ့။U9 က အင်တာနက်သုံးရတာ တော်တော်အဆင်မပြေဖြစ်နေတာ ကြာပြီ။" လို့ U9သုံးစွဲသူ တယောက်ကပြောပါတယ်။

ဒီဖုန်းကဒ်နဲ့ online banking ဖွင့်ထားသူတွေ Kpay ဖွင့်ထားသူတွေ အခက်အခဲရှိနေကြောင်း လူမှုကွန်ယက်မှာတင်ထားတာလည်းတွေ့ရပါတယ်။

U9 ရဲ့ ဖုန်းလိုင်း နဲ့ အင်တာနက်ပြတ်တောက်မှုမှာ အချိန် ၃ နာရီကျော်ကြာတဲ့အထိ ပြန်လည်သုံးစွဲနိုင်ခြင်းမရှိသေးတာကြောင့် U9သုံးစွဲသူတွေအကြား ဝေဖန်ပြောဆိုမှုတွေရှိနေတယ်လို့သိရပါတယ်။

U9 ဘက်ကလည်း အပြင်းအထန်ကြိုးစားနေကြောင်းသာ ပြောဆိုထားပြီး ဖုန်းလိုင်းပြန်လည်အသုံးပြုနိုင်မယ့်အချိန်ကို အသိပေးထားခြင်းမရှိဘူး။

Credit - Voice of Myanmar

#သတင်းဟင်းလေးအိုးကြီး