မန္တလေးက အိုးဝေလုယက်တဲ့အဖွဲ့မှာ အမျိုးသမီးတွေ ပါဝင်လာ
အောက်တိုဘာ ၁၁
မန္တလေးမြို့၊ အမရပူရမြို့နယ်က တောင်သမန်အင်းဘေးမှာရှိတဲ့ ဗူးဘုရားအနီးကနေ လက်ကောင်းကျေးရွာဘက်ကို အကြွေးသွားတောင်ချင်လို့ဆိုကာ အိုးဝေတားစီးတဲ့ အသက် ၄၀ ဝန်းကျင် အမျိုးသမီးနှစ်ဦးဟာ ပုသိမ်ကြီးမြို့နယ်က ပန်းစျေး အနီးက မြောင်းဘောင်တခုအရောက်မှာ ကြံရာပါ အမျိုးသားတဦးနဲ့အတူ အိုးဝေမောင်းနှင်သူကို ဓားထောက်ပြီး လုယက်မှုတခုဖြစ်ခဲ့ပါတယ်။
အသက် ၄၀ အရွယ်နဲ့ ၅၀ ဝန်းကျင်ရှိတဲ့ အမျိုးသမီး နှစ်ဦးက တောင်သမန်အင်းဘေးမှာရှိတဲ့ ဗူးဘုရားကနေ ပုသိမ်ကြီးမြို့နယ် လက်ကောင်းကျေးရွာဘက်ကို အကြွေးတောင်းစရာရှိလို့ဆိုပြီး အောက်တိုဘာ ၈ ရက်နေ့ ညနေ ၆ နာရီဝန်းကျင်မှာ အိုးဝေမောင်းနှင်တဲ့ အသက် ၄၁ နှစ်အရွယ်ရှိ ဦးကျော်လွင် မောင်နှင်တဲ့ အိုးဝေကို အသွာအပြန်ငှားချင်တယ်လို့ ပြောဆိုခဲ့ပြီး ငှားရမ်းခဲ့တယ်လို့ အိုးဝေမောင်းနှင်သူ ဦးကျော်လွင်က VOM ကိုပြောပါတယ်။
" အဲ့ဒီအမျိုးသမီးတွေက လက်ကောင်းရွာထိပ်က လမ်းကြားတခုမှာ အကြွေးတောင်းစရာရှိတယ်ဆိုပြီး တယောက်က လမ်းကြားထဲဝင်သွားတယ်၊ ကျနော့်အထင် ပြန်စဥ်းစားကြည့်တော့ ဖုန်းဆက်ပြီး လုဖို့ ချိန်းနေတယ်ထင်တယ်၊ ပန်းစျေးအနီးက မြောင်းဘောင်တခုနားရောက်တော့ ဓားနဲ့ထိုးတဲ့မယ့်သူက ကျနော့်အိုးဝေနဲ့ မျက်နှာချင်းဆိုင် ကနေ မောင်းလာတာ၊ အဲ့နေရာမှာ အိုးဝေစီးတဲ့ အမျိုးသမီးတယောက်က အန်ချင်နေပြီ မရတော့ဘူး အပေါ့လည်းသွားချင်တယ် ပြောလို့ အမရေ ဒီနေရာက မသင့်တော်ဘူး လူရှင်းတဲ့နေရာမှာ ရပ်ပေးမယ်လို့ပြောပြီး ရှေ့နားရောက်တော့ အိုးဝေကိုရပ်ပေးလိုက်တယ် ကိုယ်က ယောင်္ကျားသားဆိုတော့ ညာဘက် ဘက်မှန်ကို ကြည့်လို့ မသင့်ဘူးလေ၊ အဲ့ဒီမှာ ဟိုဆိုင်ကယ်ကလည်း အနောက်မှာ ရပ်နေတာ၊ ပြန်လှည့်လာပြီး ကျနော့်ကို ဓားနဲ့ တန်းပြီးထိုးတာ ကျနော်လည်း ဘယ်အချိန် အိုးဝေအောက်ကို ရောက်သွားမှန်းမသိပါဘူး၊ လက်ကတော့ ဓားထိသွားတယ်၊ ဖုန်းတွေ ပိုက်ဆံအိတ်တွေ၊ မှတ်ပုံတင်တွေရော အိုးဝေကိုပါ ပေးလိုက်ရတယ် " လို့ပြောပါတယ်။
MDY 23 U / 3933 လိုင်စင်နံပါတ်နဲ့ မီနီအိုးဝေ မောင်းနှင်သူ အသက် ၄၁ နှစ်အရွယ်ရှိ ဦးကျော်လွင် ဟာ အသက်အန္တရာယ် မစိုးရိမ်ရပေမယ့်လို့ လက်မှာ ဓားဒဏ်ရာ ရရှိထားပြီး ဖြစ်စဥ်နဲ့ ပတ်သက်ပြီးတော့ ပုသိမ်ကြီးရဲစခန်းမှာ အမှုဖွင့်ထားတယ်လို့ ပြောပါတယ်။
အောက်တိုဘာ ၈ ရက်နေ့ ည ၇ နာရီဝန်းကျင်ကစလို့ လုယက်ခဲ့တဲ့သူတွေကို ဒီကနေ့ အောက်တိုဘာ ၁၀ ရက်နေ့အထိ သဲလွန်စရထားခြင်းမရှိသေးဘူးလို့ သိရာပါတယ်။
၂၀၂၂ ခုနှစ်နောက်ပိုင်း မန္တလေးမြို့ပေါ်မှာ ဆိုင်ကယ်၊ ကား၊ အိုးဝေတွေကို ပစ်မှတ်ထား လုယက်သတ်ဖြတ်ခံရတဲ့ အရေ အတွက် တစနဲ့ တစ များပြားလာတာကိုတွေ့ရပါတယ်။
ဇူလိုင် ၉ ရက် နံနက်က ချမ်းမြသာစည်မြို့နယ်မှာနေထိုင်တဲ့ ဦးသိန်းဦး ၇၂ နှစ်ဟာ အမရပူရမြို့နယ်၊ တမာလမ်းမှာ Click ဆိုင်ကယ်မောင်းနှင်နေချိန် လူတစုက ရိုက်နှက်ပြီးလုယက်ခဲ့တာကြောင့် ဆေးရုံမှာ အဲ့ဒီဒဏ်ရာတွေကြောင့် သေဆုံးခဲ့ရပါတယ်။
ပြီးခဲ့တဲ့ ၂၀၂၄ ဧပြီ ၁၀ ရက်နေ့ကလည်း မန္တလေးမြို့၊ ပုသိမ်ကြီးမြို့နယ်၊ မန္တလေး - မတ္တရာကားလမ်းအရှေ့ဘက် အင်ကျယ်ရွာနဲ့ မင်းကန်ရွာကြား အိမ်ရှေ့ မင်းထန်းတောအနီးမှာ အိုးဝေမောင်းတဲ့သူကို သတ်ပြီး TVS ယာဥ်အမျိုးစား အိုးဝေတစီး လုယူခံရမှု ဖြစ်ခဲ့ပါတယ်။
၂၀၂၄ ဇန်နဝါရီ ၁၈ ရက်နေ့ကလည်း ပြင်ဦးလွင်ကို ကားအဌားလိုက်သွားတဲ့ အမျိုးသားတဦး သတ်ဖြတ်ခံရပြီး Suzuki ကားလုခံရသလို ပြီးခဲ့တဲ့ မတ်လအတွင်းမှာလည်း ရွှေစာရံဘုရားဖူးလိုက်ပို့တဲ့ မီနီအိုးဝေ တစီး ခိုးခံရပြီး ဒီကနေ့အချိန်ထိ ပြန်မတွေ့သေးဘူးလို့သိရပါတယ်။
Credit - Voice of Myanmar News Agency
#centralnewsnaypyitaw
