◾️မြေရှားသတ္တု နိုင်ငံခြားတင်ပို့မှုစည်းမျဉ်းများ တရုတ်တင်းကျပ်
အဆင့်မြင့်နည်းပညာထုတ်ကုန်များ ထုတ်လုပ်ရာတွင် မရှိမဖြစ်အရေးပါသော မြေရှား သတ္တု များ နိုင်ငံခြားတင်ပို့မှုစည်းမျဉ်းစည်းကမ်းများကို တရုတ်က တင်းကျပ်လိုက်ကြောင်း ဘီဘီစီသတင်းက ဖော်ပြသည်။
တရုတ်စီးပွားကူးသန်းဝန်ကြီးဌာနက ကြေညာခဲ့သော စည်းမျဉ်းအသစ်များဖြင့် ထုတ်လုပ်မှုနည်းပညာ နှင့် ခွင့်ပြုချက်မရှိသောနိုင်ငံခြားပူးပေါင်းဆောင်ရွက်မှု နှင့် ပတ်သက်၍ လက်ရှိစည်းကမ်းများအား တရားဝင် အတည်ပြုခဲ့သည်။
နိုင်ငံခြားလက်နက်ထုတ်လုပ်သောကုမ္ပဏီများ နှင့် အချို့သော တစ်ပိုင်းလျှပ်ကူးပစ္စည်းထုတ်လုပ်သည့် ကုမ္ပဏီများထံသို့ မြေရှားသတ္တုများ တင်ပို့ရောင်းချခြင်းကိုလည်း တရုတ်က ပိတ်ပင်သွားဖွယ်ရှိသည်။
မြေရှားသတ္တုများနိုင်ငံခြားတင်ပို့မှုကိစ္စသည် ကုန်သွယ်ရေး၊ အခွန်အကောက် နှင့် ပတ်သက်၍ ပေကျင်းနှင့် ဝါရှင် တန်ကြားလနှင့်ချီကြာမြင့်နေသည့်ညှိနှိုင်းဆွေးနွေးမှုများတွင်အဓိကလိပ်ခဲတည်းလည်းဖြစ်နေသည့်အကြောင်းအရာလည်း ဖြစ်ကာ တရုတ်သမ္မတ ရှီကျင့်ဖျင်နှင့် အမေရိကန်သမ္မတ ဒေါ်နယ်ထရန့်တို့ ယခုလ နှောင်းပိုင်းတွင် တွေ့ဆုံမည်ဟုမျှော်လင့်ထားစဉ် ယခုကြေညာချက် ထွက်ပေါ်လာခြင်းဖြစ်သည်။
မြေရှားများတူးဖော်ခြင်းနှင့်သန့်စင်သည့် နည်းပညာ သို့မဟုတ် မြေရှားသတ္တုများမှ သံလိုက်ထုတ်လုပ်သည့် နည်းပညာကို အစိုးရ၏ခွင့်ပြုချက်ဖြင့်သာ တင်ပို့နိုင်မည်ဖြစ်ကြောင်း တရုတ် စီးပွားကူးသန်းဝန်ကြီးဌာနက ထုတ်ပြန်ချက်တွင် ပြောကြားသည်။
ထိုကဲ့သို့သော နည်းပညာအများအပြားကို မူလကတည်းက ကန့်သတ်ထားပြီးဖြစ်သည်။
ဧပြီလက ကြေညာခဲ့သည့် နိုင်ငံခြားတင်ပို့မှုထိန်းချုပ်ရေး စာရင်းတွင်လည်း မြေရှားသတ္တုအများအပြားကို ထည့် သွင်းခဲ့ပြီး ယင်းအတွက် ထိုစဉ်က မြေရှားသတ္တုပြတ်လပ်မှုများ ဖြစ်ပေါ်စေခဲ့သည်။
ယခုထုတ်ပြန်သော ကြေညာချက်အသစ်၌ လက်နက်ထုတ်လုပ်သောကုမ္ပဏီများ၊ တစ်ပိုင်းလျှပ်ကူးလုပ်ငန်းမှ ကုမ္ပဏီ အချို့ထံ မြေရှားသတ္တုတင်ပို့မှုများ ခွင့်ပြုမည်မဟုတ်ကြောင်းကို ရှင်းလင်းစွာ ဖော်ပြထားသည်။
ထို့ပြင် မြေရှားသတ္တုလုပ်ငန်းများတွင် လုပ်ကိုင်နေသော တရုတ်ကုမ္ပဏီများအား နိုင်ငံခြားကုမ္ပဏီများနှင့် ပူးပေါင်းလုပ်ကိုင်ခြင်းကိုလည်း ပိတ်ပင်ထားသည်။
နောက်ဆုံးကြေညာချက်တွင် ကန့်သတ်ထားသည့် မြေရှားထုတ်လုပ်မှုနည်းပညာများ နှင့် လုပ်ငန်းစဉ်များကို ဖော်ပြထားသည့်အပြင် ထုတ်လုပ်သည့် စက်ပစ္စည်းများအား တပ်ဆင်ခြင်း ၊ ပြုပြင်ခြင်း ၊ ထိန်းသိမ်းခြင်း ၊ အဆင့်မြှင့်ခြင်းများကိုလည်း ခွင့်ပြုချက် မရှိဘဲ နိုင်ငံခြားသို့ တင်ပို့မှုလုပ်ခြင်းမှ ပိတ်ပင်ကြောင်း ဖော်ပြထားသည်။
ယင်းမှာ မြေရှားသတ္တုတူးဖော်မှုကိုကြီးမားစွာလုပ်ကိုင်နေသော်လည်း သန့်စင်ထုတ်လုပ်မှု စက်ပစ္စည်းမရှိသော အ မေရိကန်အား ရိုက်ခတ်မှုရှိမည်ဖြစ်ကြောင်း ဘီဘီစီသတင်းက ဆက်လက်ဖော်ပြသည်။
မြေရှားသတ္တုများ ထုတ်လုပ်ခြင်းနှင့် သန့်စင်ခြင်းလုပ်ငန်းအား တရုတ်နိုင်ငံက တစ်ဦးတည်းနီးပါး လုပ် ကိုင် နေကြောင်း သိရသည်။
ကမ္ဘာပေါ်မှမြေရှားသတ္တုထုတ်လုပ်မှု ၆၁ ရာခိုင်နှုန်းနှင့် သန့်စင်မှု ၉၂ ရာခိုင်နှုန်းကို တရုတ်နိုင်ငံက လုပ်ကိုင် နေကြောင်း နိုင်ငံတကာစွမ်းအင်အေဂျင်စီ(IEA) က ခန့်မှန်းထားသည်။
သတင်း-ရဲမင်း
ကိုးကား-BBC
#နိုင်ငံတကာသတင်း
