#ယနေ့ထုတ်သတင်းစာ_ပြည်တွင်းသတင်း
◾️နှစ်(၁၀၀)ကျော် အဆောက်အအုံသုံးခုကို ရှေးဟောင်းအဆောက်အအုံများအဖြစ် သတ်မှတ်
နှစ်ပေါင်း (၁၀၀)အထက်သက်တမ်းရှိ ရန်ကုန်မြို့ရှိ အဆောက်အအုံသုံးခုကို ရှေးဟောင်းအဆောက်အအုံများအဖြစ် သာသနာရေးနှင့် ယဉ်ကျေးမှုဝန်ကြီးဌာနက သတ်မှတ်ခဲ့ကြောင်း သိရသည်။
ရှေးဟောင်းအဆောက်အအုံများ ကာကွယ်ထိန်းသိမ်းရေးဥပဒေပုဒ်မ ၃၄၊ ပိုဒ်ခွဲ(ခ) အရ အပ်နှင်းထားသည့် လုပ်ပိုင်ခွင့်ကိုကျင့်သုံးပြီး ရန်ကုန်တိုင်းဒေသကြီးအတွင်း ကမာရွတ်မြို့နယ် ပြည်လမ်းရှိ ရန်ကုန်တက္ကသိုလ်နယ်မြေ လက်ရှိရန်ကုန်ပညာရေးတက္ကသိုလ်နယ်မြေရှိ ပြည်ဆောင်၊ တကောင်းဆောင်နှင့် အင်းစိန်မြို့နယ်ရှိ မွေးမြူရေးနှင့် ကုသရေးဦးစီးဌာနရုံး စသည့် အဆောက်အအုံ သုံးခုတို့ကိုရှေးဟောင်းအဆောက်အအုံများအဖြစ် သတ်မှတ်ခဲ့ခြင်းဖြစ်သည်။
အလားတူ မန္တလေးတိုင်းဒေသကြီးအတွင်းရှိချမ်းမြသာစည်မြို့နယ်မှ အဆောက်အအုံ ငါးခု၊ချမ်းအေးသာစံမြို့နယ်မှ ခုနစ်ခု၊ ပြည်ကြီးတံခွန်မြို့နယ်မှ လေးခု၊ မဟာအောင်မြေမြို့နယ်မှ လေးခု၊ အောင်မြေသာစံမြို့နယ်မှ ၁၁ ခု၊ ပုသိမ်ကြီးမြို့နယ်မှ နှစ်ခုနှင့် ပြင်ဦးလွင်မြို့နယ်မှ ၃၁ ခု စုစုပေါင်း ၆၄ ခုတို့ကို ရှေးဟောင်းအဆောက်အအုံများအဖြစ် သတ်မှတ်လိုက်ကြောင်း သိရသည်။
အဆိုပါ ရှေးဟောင်းအဆောက်အအုံများအဖြစ် သတ်မှတ်နိုင်ရေးအတွက် ကိုလိုနီခေတ်ကတည်းကရှိခဲ့သည့် အဆောက်အအုံ များကို မြေပြင်ကွင်းဆင်းပြီး စာရင်းကောက်ယူကာ ပညာရှင်အဖွဲ့များဖြင့် စိစစ်ပြီး ဥပဒေပါ စံသတ်မှတ်ချက်များနှင့်ညီညွတ်မှုရှိခြင်းကြောင့် သတ်မှတ်ပေးခဲ့ခြင်းဖြစ်ကြောင်း သိရသည်။
ရေး - လူ့တလူ
