ယူနိုက်တက်အား တည်ဆောက်ရန် အမိုရမ်တွင် အချိန် သုံးနှစ်လိုအပ်ကြောင်း ဆာဂျမ်ရက်ကလစ်ဖ် ပြောကြားလာ

အောက်တိုဘာ ၉

ယူနိုက်တက်ပူးတွဲပိုင်ရှင်ဆာဂျမ်ရက်ကလစ်ဖ်က ယူနိုက်တက်နည်းပြရူဘင်အမိုရမ်မှာ ကြီးကျယ်တဲ့ နည်းပြတစ်ဦး ဖြစ်ကြောင်း သက်သေပြရန် အချိန် သုံးနှစ်လိုအပ်နေကြောင်း ပြောကြားလာပါတယ်။

အမိုရမ်ဟာ လာမယ့် နိုဝင်ဘာလတွင် ယူနိုက်တက်အား ကိုင်တွယ်တာ တစ်နှစ်ပြည့်လာမှာ ဖြစ်ပါတယ်။ ဒါပေမယ့် ယူနိုက်တက်ဟာ အမိုရမ်လက်ထက်တွင် မှတ်တမ်းကောင်းများ ပိုင်ဆိုင်ထားခြင်း မရှိပါဘူး။

ယူနိုက်တက်ဟာ ပြီးခဲ့တဲ့ရာသီတုန်းက ၁၉၇၃-၇၄ ရာသီတုန်းက တန်းဆင်းခံရပြီးနောက်ပိုင်း အဆိုးရွားဆုံးအဆင့်အဖြစ် အဆင့် ၁၅ နေရာမှာ ရပ်တည်ခဲ့ရပါတယ်။

ဒါ့အပြင် ယူနိုက်တက်ဟာ နွေရာသီတုန်းက အပြောင်းအရွှေ့အသုံးစရိတ် ပေါင်သန်း ၂၀၀ အထိ အသုံးပြုခဲ့ပေမယ့်လည်း ယခုရာသီတွင် ပရီးမီးယားလိဂ်ပွဲ ၃ ပွဲ ရှုံးနိမ့်ထားပြီး ဖြစ်သလို ခါရာဘောင်ဖလားမှလည်း ထွက်ခွာထားရပြီး ဖြစ်ပါတယ်။

ယူနိုက်တက်တာဝန်ရှိသူများက အမိုရမ်အား အပြည့်အဝ ထောက်ခံနေကြဆဲ ဖြစ်ပေမယ့်လည်း ဆန်းဒါးလန်းအား ၂-၀ ဂိုးဖြင့် အနိုင်ရတဲ့ပွဲသာ မပိုင်ဆိုင်လျှင် ထုတ်ပယ်ခဲ့ပြီး ဖြစ်လာလိမ့်မယ်လို့ သတင်းထွက်ခဲ့ပါတယ်။

ဒါပေမယ့် The Times ရဲ့ The Business အင်တာဗျူးမှာတော့ ဆာဂျမ်ရက်ကလစ်ဖ်က "အကောင်းဆုံးရာသီ မပိုင်ဆိုင်ခဲ့ဘူး။ ရူဘင်မှာ ကြီးကျယ်တဲ့ နည်းပြဖြစ်ကြောင်း သက်သေပြဖို့ အချိန်သုံးနှစ်လိုတယ်။ ကျွန်တော့်ဘက်ကလည်း အချိန်ပေးသွားမယ်"လို့ ဆိုသွားပါတယ်။

အသက် ၄၀ နှစ်ရှိ အမိုရမ်ဟာ ယူနိုက်တက်သို့ ရောက်လာပြီးနောက် ၃-၄-၂-၁ ကစားကွက်ကို ခေါင်းမာစွာ အသုံးပြုလာမှုအတွက် ဝေဖန်မှုများ ကြုံနေရသူလည်း ဖြစ်ပါတယ်။

ဒါပေမယ့် ဆာဂျမ်ရက်ကလစ်ဖ်ကတော့ "သတင်းစာတွေအပေါ် တခါတလေ နားမလည်နိုင်ဘူး။ သူတို့က နေ့ချင်းညချင်း အောင်မြင်ချင်ကြတယ်။ သူတို့က မီးခလုပ်တစ်ခုလို့ ထင်ကြတယ်။ တချက်ခုန်ကူးလိုက်တာနဲ့ မနက်ဖြန် နှင်းဆီပွင့်မယ်လို့ ထင်ကြတယ်။ ယူနိုက်တက်လို ကလပ်တစ်ခုကို အပတ်လာနေတဲ့ ဂျာနယ်လစ်တွေအပေါ် စိတ်ပျက်တဲ့ တုံ့ပြန်မှု ပြုလုပ်လို့ မရပါဘူး"လို့ ပြောကြားသွားပါတယ်။

ရက်ကလစ်ဖ်ဟာ ယူနိုက်တက်ရဲ့ ရှယ်ယာ ၃၀ ရာခိုင်နှုန်းကို ပိုင်ဆိုင်သူ ဖြစ်ပြီး ကလပ်ရဲ့ ဘောလုံးရေးရာနှင့်ပတ်သက်တဲ့ ဆုံးဖြတ်ချက်များ ချမှတ်ခွင့် ရယူထားပါတယ်။

ဒါ့အပြင် ရက်ကလစ်ဖ်က အမိုရမ်အား ထုတ်ပယ်မှု ဖြစ်လာမှာ မဟုတ်ကြောင်းလည်း အာမခံ ပြောကြားသွားပါတယ်။

ရက်ကလစ်ဖ်ဟာ ယူနိုက်တက်ပူးတွဲပိုင်ရှင် ဖြစ်လာပြီးနောက် ဝန်ထမ်း ၄၀၀ ကျော်တို့အား လျှော့ချကာ အသုံးစရိတ်လျှော့ချမှု ပြုလုပ်လာသူလည်း ဖြစ်ပါတယ်။

ယူနိုက်တက်ဟာ ယင်းသို့ အသုံးစရိတ်လျှော့ချလာမှုနှင့်အတူ ၂၀၂၅ ခုနှစ် ဇူလိုင်လအထိ တစ်နှစ်တာဘဏ္ဍာရေးရှင်းတမ်းတွင် ပေါင် ၃၃ သန်းတည်းသာ ရှုံးနိမ့်လာပါတယ်။ ၎င်းတို့ဟာ ယင်းမတိုင်မီ တစ်နှစ်တုန်းက ပေါင် ၁၁၃.၂ သန်းအထိ အရှုံးပေါ်ထားတာပါ။

Credit - Playmaker Journal

#ဘောလုံးသတင်းစုံ