ကမ္ဘာ့ရွှေ အတက်ကြမ်းမှုနဲ့အတူ ပြည်တွင်းရွှေဈေး ကျပ် နှစ်သိန်းဝန်းကျင် ခုန်တက်လာ

အောက်တိုဘာ ၈

ကမ္ဘာ့ရွှေဈေး အတက်ကြမ်းမှုနဲ့အတူ ပြည်တွင်းရွှေဈေး တရက်အတွင်း ကျပ် နှစ်သိန်းဝန်းကျင် ခုန်တက်လာတယ်လို့ ဈေးကွက်အတွင်းက စုံစမ်း သိရှိရပါတယ်။

လက်ရှိမှာ ကမ္ဘာ့ရွှေဈေးဟာ နှစ်ပေါင်း ၃၀ အတွင်း အမြင့်ဆုံး ဈေးတန်းဖြစ်တဲ့ တအောင်စ ဒေါ်လာ ၄၀၄၉ ဝန်းကျင်ကို ရောက်ရှိနေတာ ဖြစ်ပါတယ်။

ပြည်တွင်း အခေါက်ရွှေ (စနစ်ဟောင်း) ဈေးကတော့ လက်ရှိမှာ ရှစ်ဆယ့်နှစ်သိန်းခွဲ ဝန်းကျင်ကို ရောက်ရှိနေပြီး ဒီကနေ့ အောက်တိုဘာ ၈ ရက်၊ တရက်တည်းမှာတင် ကျပ် နှစ်သိန်းဝန်းကျင် ခုန်တက်လာတာကို တွေ့ရပါတယ်။

ဒါနဲ့ ပတ်သက်လို့ ရွှေလုပ်ငန်းရှင် တယောက်က “ကမ္ဘာ့ရွှေက တောက်လျှောက် တက်နေတယ်။ လက်ရှိ တော်တော်လေး မြင့်နေပြီပေါ့။ ကျွန်တော်တို့ အထင်ဆို ဖြစ်လေ့ဖြစ်ထ ရှိတာကတော့ တော်တော်လေး မြင့်ပြီးရင် ပြန်ကျလေ့ရှိတယ်။ အခုကတော့ ကမ္ဘာ့ဈေး အမြင့်ဆုံး ရောက်ပြီလို့တော့ ထင်ပါတယ်။ ဒါပေမယ့်လည်း မှန်းရခက်ပါတယ်။ ပြည်တွင်းဈေးကတော့ အရင်ရက်တွေကတည်းက လေး၊ ငါးသောင်း၊ တသိန်းဝန်းကျင်နဲ့ နည်းနည်းချင်းစီ တက်နေတာ။ ဒီနေ့တရက်တည်းကျတော့ နှစ်သိန်းလောက် တက်တဲ့သဘော ဖြစ်သွားတယ်” လို့ ပြောပါတယ်။

ကမ္ဘာ့ရွှေဈေး မြင့်တက်နေတာဟာ လက်ရှိမှာ ယူကရိန်းနဲ့ ရုရှား၊ အမေရိကန်နဲ့ ဗင်နီဇွဲလား နိုင်ငံ့အရေး တင်းမာနေမှုတွေကြောင့် ဖြစ်သလို တဖက်မှာလည်း အမေရိကန် ဗဟိုဘဏ်ရဲ့ အတိုးနှုန်းလျှော့ချမယ် ဆိုတဲ့ သတင်းတွေ ထွက်နေတာကြောင့်လည်း ဖြစ်တယ်လို့ သူက ပြောပါတယ်။

ကမ္ဘာ့ရွှေဈေးဟာ ပြီးခဲ့တဲ့ အောက်တိုဘာ ၁ ရက်နေ့က တအောင်စ ၃၈၅၈ ဒေါ်လာ ဈေးတန်းမှာ ရှိခဲ့ပေမယ့် တပတ်ကျော်အတွင်း ဒေါ်လာ ၁၉၀ ကျော်အထိ မြင့်တက်လာခဲ့တာ ဖြစ်ပါတယ်။

“လောလောဆယ်တော့ ကမ္ဘာ့ရွှေဈေး ဆက်တက်သွားဦးမယ်လို့ ခန့်မှန်းရပါတယ်။ ရွှေဈေးအခုလို တက်ပြီးရင်း တက်နေတာက အမေရိကန်ဒေါ်လာကို စုဆောင်းငွေအဖြစ် တကမ္ဘာလုံးက ဝိုင်းပြီး ငြင်းနေသလို ဖြစ်နေပါတယ်။ အမေရိကန်က အရှေ့အလယ်ပိုင်း ဒေသကို သေချာ မထိန်းနိုင်လို့ ပြဿနာအကြီးကြီး ပေါ်တိုင်း အမေရိကန်ဒေါ်လာဈေး ကျပြီး ကမ္ဘာ့ရွှေဈေး တက်ပါတယ်။ အခု တချိန်တည်းမှာပဲ အစ္စရေးကလည်း ဂါဇာစစ်ကို ဆင်နွှဲနေတာရှိနေတော့ ကမ္ဘာ့ဈေးက ၄၀၀၀ ကိုတော့ ကျော်လာပြီပေါ့။ စစ်ပွဲ ရှိနေသရွေ့ကတော့ ဈေးက တက်နေဦးမှာပါပဲ” လို့ ရွှေဈေးကွက် ကျွမ်းကျင်သူ တယောက်က ပြောပါတယ်။

ကမ္ဘာ့‌ရွှေဈေးနှုန်းဟာ အခု ၂၀၂၅ ခုနှစ်၊ နှစ်ကုန်ပိုင်းမှာ တအောင်စကို အမေရိကန်ဒေါ်လာ ၄၂၀၀ အထိ ရှိလာနိုင်တယ်လို့ Union Bank of Switzerland - UBS မှ ကျွမ်းကျင်သူတွေက ခန့်မှန်းထားပြီး တခြားသော အဖိုးတန်သတ္တု တန်ဖိုးတွေလည်း လိုက်ပါ မြင့်တက်လာနိုင်တယ်လို့ သုံးသပ်ထားပါတယ်။

လက်ရှိမှာ ကမ္ဘာ့ရွှေဈေး မြင့်တက်မှုနဲ့အတူ ပြည်တွင်း ရွှေဈေးတွေ လိုက်ပါ မြင့်တက်နေပေမယ့် ဖြစ်သင့်ဖြစ်ထိုက်တဲ့ ဈေးတန်းကိုတော့ မရောက်သေးဘူးလို့ ရွှေလုပ်ငန်းရှင်တွေက ပြောပါတယ်။

“ဈေးကတော့ တက်တယ်။ အဝယ်က မရှိဘူး။ အခုက နိုင်ငံခြားကို မှောင်ခိုထုတ်တဲ့ လိုင်းသမားတွေပဲ နည်းနည်းပါးပါး ဝယ်ကြတာရှိတယ်။ အဝယ်မရှိတော့ ပြည်တွင်း‌ ရွှေဈေးက ဖြစ်သင့်တဲ့ ဈေးထက်တောင် ကျနေသေးတယ်။ တကယ်တမ်း ကမ္ဘာ့ဈေးနဲ့ တွက်ကြည့်မယ်ဆို ၈၆ သိန်းခွဲလောက် ဖြစ်ရမှာ” လို့ နောက်ထပ် ရွှေလုပ်ငန်းရှင် တယောက်က ပြောပါတယ်။

လက်ရှိ ရွှေ‌ဈေးကွက်အတွင်း အရောင်းအဝယ်တွေ အေးနေပြီး လတ်တလော ရောက်ရှိနေတဲ့ ဈေးတန်းကြောင့်လည်း ရွှေဝယ်ယူကြသူတွေ မရှိသလောက် ဖြစ်‌နေတယ်လို့ သူက ပြောပါတယ်။

လက်ရှိ ပြင်ပ ရွှေဈေးကွက်အတွင်း ကမ္ဘာ့ဈေးနဲ့အတူ ရွှေဈေးနှုန်းတွေ ပြောင်းလဲ မြင့်တက်နေပေမယ့် ရန်ကုန်တိုင်းရွှေအသင်း (YGEA) ရဲ့ ရည်ညွှန်းဈေးကတော့ ပြီးခဲ့တဲ့ စက်တင်ဘာ ၃၀ ရက်နေ့ကနေ ဒီကနေ့ အောက်တိုဘာ ၈ ရက်အထိ ကျပ် ငါးဆယ့်ကိုးသိန်း ကိုးသောင်းဝန်းကျင်မှာ မပြောင်းမလဲ ရှိနေဆဲ ဖြစ်ပါတယ်။

အမေရိကန် ဒေါ်လာဈေးကတော့ လက်ရှိမှာ ရောင်းဈေး တဒေါ်လာ ၄၀၈၅ ကျပ်ဝန်းကျင်မှာ ရောက်ရှိနေပြီး ပြီးခဲ့တဲ့ စက်တင်ဘာလကထက် ဈေးနှုန်း တဖြည်းဖြည်းချင်း ကျဆင်းလာတာကို တွေ့ရပါတယ်။

Photo - CJ

Credit - Voice of Myanmar News Agency

#သတင်းဟင်းလေးအိုးကြီး