မြန်မာ့ငလျင်ဘေး ထိုင်းနိုင်ငံက ဘတ် ၁၅ သန်းခန့် ထပ်မံပေးအပ်
အောက်တိုဘာ ၈
မြန်မာနိုင်ငံတွင် ဆုံးရှုံးမှူ ကြီးမားလွန်းခဲ့သော မန္တလေး မြေငလျင်ကြီး ဖြစ်ပွားပြီးနောက် ခြောက်လကျော်အကြာ အောက်တိုဘာ ၆ ရက်တွင် ထိုင်းနိုင်ငံက လူသားချင်းစာနာထောက်ထားမှု အကူအညီများအတွက် AHA စင်တာကို ဘတ် ၁၅ သန်းခန့်ရှိ ထောက်ပံ့ငွေ ထပ်မံ ပေးအပ်ခဲ့ကြောင်း သိရသည်။
ထိုင်းနိုင်ငံ၏ ထပ်မံထောက်ပံ့မှု ထိုငွေကြေးကိုယမန်နေ့တွင် ထိုင်းနိုင်ငံခြားရေးဝန်ကြီးသစ်ဖြစ်သူ မစ္စတာ ဆီဟာဆက် ဖူအွန်ကက်ကီယိုသည် ထိုင်းဘုရင့်အစိုးရ၏ ငွေကြေးထောက်ပံ့မှု ဘတ်ငွေ ၁၄,၉၀၀,၀၀၀ (အမေရိကန်ဒေါ်လာ ၄၆၀,၀၀၀ ခန့်) ကို အင်ဒိုနီးရှားနိုင်ငံ၊ ဂျကာတာမြို့ရှိ သဘာဝဘေးအန္တရာယ်စီမံခန့်ခွဲရေးဆိုင်ရာ အာဆီယံ လူသားချင်းစာနာထောက်ထားမှု အကူအညီပေးရေး ညှိနှိုင်းရေးစင်တာ (AHA Centre) ၏ အမှုဆောင်ဒါရိုက်တာဖြစ်သူ မစ္စတာ လီယမ်မင်း (Mr. Lee Yam Ming) ထံ ပေးအပ်ခဲ့ခြင်းဖြစ်သည်။
ဤထောက်ပံ့ငွေသည် ၂၀၂၅ ခုနှစ်၊ မတ်လ ၂၈ ရက်နေ့တွင် မြန်မာနိုင်ငံ၌ လှုပ်ခတ်ခဲ့သည့် မြေငလျင်၏ အကျိုးဆက်များကို ပိုမိုသက်သာစေရန်နှင့် လူသားချင်းစာနာထောက်ထားမှု အကူအညီများကို ထောက်ပံ့ပေးရန် ရည်ရွယ်သည်။ လက်ရှိတွင် မြန်မာနိုင်ငံသည် အဆိုပါဘေးအန္တရာယ်မှ ပြန်လည်နာလန်ထူနိုင်ရန်အတွက် ကြီးမားသော ပံ့ပိုးကူညီမှုများ လိုအပ်နေဆဲ ဖြစ်သည်။
နိုင်ငံခြားရေးဝန်ကြီးက မြန်မာနိုင်ငံရှိ လူသားချင်းစာနာထောက်ထားမှု အကူအညီများကို အလွယ်တကူရရှိနိုင်စေရန်၊ အချိန်မီရရှိစေရန်၊ ထိရောက်စေရန်နှင့် ခွဲခြားဆက်ဆံမှုမရှိစေရန်အတွက် နိုင်ငံတကာအသိုက်အဝန်းနှင့်အတူ ထိုင်းနိုင်ငံက ပူးပေါင်းဆောင်ရွက်သွားမည့် ကတိကဝတ်ကို အတည်ပြုပြောကြားခဲ့သလို မြေငလျင်လှုပ်ခတ်ပြီးနောက်ပိုင်းတွင် ထိုင်းနိုင်ငံသည် မြန်မာနိုင်ငံသို့ နည်းလမ်းအမျိုးမျိုးဖြင့် အကူအညီများ ဆက်လက်ပေးအပ်ခဲ့ရာတွင် ထိုင်းဘုရင်မင်းမြတ်နှင့် မိဖုရားကြီးတို့၏ မေတ္တာဖြင့် ပေးအပ်သော ဘုရင့်ကယ်ဆယ်ရေးပစ္စည်းများ ပေးပို့ခြင်း၊ မြန်မာနိုင်ငံတွင် လုပ်ငန်းလည်ပတ်နေသော ထိုင်းပုဂ္ဂလိကကုမ္ပဏီများမှ အစားအသောက်များ လှူဒါန်းခြင်း၊ ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) ကဲ့သို့သော နိုင်ငံတကာအဖွဲ့အစည်းများမှတစ်ဆင့် ငွေကြေးထောက်ပံ့ခြင်းများ ပါဝင်ခဲ့သည်။
Credit - MT News Agency
#centralnewsnaypyitaw
