သီတင်းကျွတ်ကာလ ခရီးသွားများလို့ ရန်ကုန်အထွက် နဲ့အမြန်လမ်းမှာ ကားရာချီ ပိတ်ဆို့နေ
အောက်တိုဘာ ၄
သီတင်းကျွတ်ရုံးပိတ်ရက်မှာ ခရီးသွားတဲ့သူတွေများတာကြောင့် ရန်ကုန်အထွက် ဇီးရိုးမိုင်ကစပြီး အမြန်လမ်းနေရာအချို့မှာ ကားအစီးရေ ရာနဲ့ချီပြီး ပိတ်ဆို့မှုဖြစ်ပွားနေတယ်လို့သိရပါတယ်။
ဒီနေ့အောက်တိုဘာလ ၄ ရက်နေ့ ရန်ကုန်ကနေအထွက် ဇီးရိုးမိုင်တိုးဂိတ်မှာ ခရီးသွားကြမယ့်ကားတွေ ပိတ်ဆို့မှုဖြစ်နေသလို အမြန်လမ်း မိုင် ၁၆၀ လောက်မှစပြီး ၁၈၅ မိုင်လောက်အထိမှာဆိုရင်လည်း ကားတွေရာနဲ့ချီပိတ်မိနေတာဖြစ်တယ်လို့သိရပါတယ်။
အမြန်လမ်း ၁၆၄ မိုင်မှာ ဆွာချောင်းတံတားကို ပြုပြင်နေတာကြောင့် လမ်းတဖက်တည်းကနေသာ ကားတွေကို အလှည့်ကျပေးဖြတ်နေတဲ့အတွက် ကားတွေ နာရီနဲ့ချီကြာစောင့်ရတဲ့အထိကားပိတ်နေတာဖြစ်တယ်လို့ အမြန်လမ်းခရီးသွားနေသူကပြောပါတယ်။
" အမြန်လမ်းကားတွေကအတော်လေးပိတ်တယ်။ကျွန်တော်တို့ ၂ နာရီလောက်စောင့်လိုက်ရတယ်။တံတားပြင်နေလို့ပိတ်နေတာပါ။တံတား ဟိုဘက်ခြမ်း ၊ဒီဘက်ခြမ်းမှာ ကားတွေအကုန်ပိတ်နေကြတာပါ။ဒီလိုပဲ ဖြေးဖြေးချင်းရွှေ့ပေါ့။" လို့ ပြောပါတယ်။
သီတင်းကျွတ်ရုံးပိတ်ရက်ကာလမှာ ရန်ကုန်ကနေ နယ်ကိုအလည်အပတ်ခရီးသွားရောက်ကြသူတွေရှိသလို နေထိုင်ရာဇာတိကိုပြန်သူတွေလည်းရှိတာကြောင့် အမြန်လမ်းမှာကားတွေအများအပြားပိတ်ဆို့မှုဖြစ်ပွားနေတာဖြစ်တယ်လို့သိရပါတယ်။
" ခုကပိတ်ရက်ဆိုတော့ ကားတွေများပြီး လမ်းပိုပိတ်တာပေါ့။ခုထိစောင့်နေတုန်းပဲ။ ၁၆၂မိုင်မှာပါ ပိတ်မိနေတုန်းပဲ။ တံတားမဖြတ်ရသေးဘူး။ ဆွာတံတားကျော်တော့လည်း လမ်းကမကောင်းလို့ ဖြေးဖြေးမောင်းရတာ။ " လို့ အမြန်လမ်းမှာကားပိတ်နေသူ တယောက်ကပြောပါတယ်။
သီတင်းကျွတ် ပိတ်ရက်ကာလမှာ ချောင်းသာ၊ငွေဆောင် ၊ပုဂံ ဒေသကို သွားရောက်လည်ပတ်မယ့်သူတွေများပြီး ဟိုတယ်ဘွတ်ကင်ရယူမှုအများအပြားရှိခဲ့သလို ကလော နဲ့တောင်ကြီးကိုလည်း သွားရောက်လည်ပတ်ဖို့ ဟိုတယ်အခန်းကြိုတင်ငှားရမ်းမှု ရှိနေထားလို့သိရပါတယ်။
နှစ်စဥ်သီတင်းကျွတ်ရုံးပိတ်ရက်တိုင်းမှာ ခရီးသွားသူများလေ့ရှိပြီး ကားပိတ်ဆို့မှုတွေလည်း ရှိခဲ့ပြီး ဟိုတယ်အခန်း ငှားရမ်းခနူန်းထားတွေကလည်း ပုံမှန်အချိန်ထက် စျေးမြင့်တက်လေ့ရှိတယ်လို့သိရပါတယ်။
ဓာတ်ပုံ - WYMH / US /NNA
Credit - Voice of Myanmar
#သတင်းဟင်းလေးအိုးကြီး
