မော်ရိုကိုနိုင်ငံမှာ ညဘက်တိုက်ခိုက်မှုများ ဖြစ်ပွားအပြီး GenZ အမည်ခံ လူငယ်များက ဆန္ဒပြမှုများကို ခြောက်ရက်မြောက်အဖြစ် ဆက်တိုက်ပြုလုပ်

အောက်တိုဘာ ၄

မော်ရိုကိုနိုင်ငံမှာ ပိုမိုကောင်းမွန်တဲ့ ကျန်းမာရေးနဲ့ ပညာရေးဝန်ဆောင်မှုလုပ်ငန်းတွေကို တောင်းဆိုဖို့ အတွက် မျိုးဆက်သစ် ၂၁၂ “GenZ 212” စုပေါင်းလှုပ်ရှားမှုအဖွဲ့ က ဦးဆောင်ပြီး မော်ရိုကိုလူငယ်တွေဟာ အောက်တိုဘာလ ၂ ရက် ကြာသပတေးနေ့က ထပ်မံဆန္ဒပြခဲ့ကြပါတယ်။

လူသုံးဦးသေဆုံးရတဲ့ တစ်ညတာရုန်းရင်းဆန်ခတ် တိုက်ခိုက်မှုတွေ ဖြစ်ခဲ့ရပြီးနောက်မှာတော့ စုပေါင်းလှုပ်ရှားမှုအဖွဲ့က “အကြမ်းဖက်မှု၊ အများပိုင်ပစ္စည်းတွေဖျက်ဆီးမှု ဒါမှမဟုတ် ရုန်းရင်းဆန်ခတ်မှုပုံစံအားလုံးကို ငြင်းပယ်တယ်” လို့ အလေးပေးပြောကြားခဲ့ပါတယ်။

မော်ရိုကိုမှာ လူသုံးဦး သေဆုံးခဲ့တဲ့အကြမ်းဖက်မှုတွေဖြစ်ပွားခဲ့တဲ့ ညတစ်ညအပြီး အောက်တိုဘာ ၂ ရက်မှာ ပိုမိုကောင်းမွန်တဲ့ ကျန်းမာရေးနဲ့ ပညာရေးဝန်ဆောင်မှုလုပ်ငန်းတွေကို တောင်းဆိုတဲ့ ဆန္ဒပြပွဲအသစ်တွေကို မကြာသေးမီကမှ ဖွဲ့စည်းဖန်တီးထားတဲ့ လူငယ်စုပေါင်းလှုပ်ရှားမှုအဖွဲ့ “GenZ 212” က ခြောက်ရက်ဆက်တိုက်မြောက်အဖြစ် ပြုလုပ်ခဲ့တာပါ။

အကြမ်းဖက်မှုတွေက ဆန္ဒပြပွဲတွေအပြီး အောက်တိုဘာလ ၁ ရက်ညက နိုင်ငံတစ်ဝန်းရှိ မြို့အများ အပြားမှာ ဖြစ်ခဲ့တာပါ။ နိုင်ငံတောင်ဘက်ရှိ ရဲ တပ်မဟာတစ်ခုကို ဝင်ရောက်တိုက်ခိုက်ဖို့ကြိုးစားကြရာမှာ မိမိကိုယ်မိမိ ခုခံကာကွယ်ဖို့ ဆောင်ရွက်ခဲ့ရလို့ လူသုံးဦး သေဆုံးခဲ့ရတယ်လို့ ပြည်ထဲရေးဝန်ကြီးဌာနမှ ပြောရေးဆိုခွင့်ရှိသူ ရာချစ် အယ်လ် ခါလီက ပြောကြားခဲ့ပါတယ်။

ဒေသဆိုင်ရာ အာဏာပိုင်တွေရဲ့ ပြောကြားချက်အရ ထိုသူတွေက အဂါဒီယာမြို့အနီးရှိ Lqliaâ ရွာရှိ ရဲတပ်မဟာရဲ့အဆောက်အအုံအတွင်းကို ခဲယမ်းမီးကျောက်တွေနဲ့ လုပ်ငန်းသုံးလက်နက်တွေခိုးယူဖို့ ဝင်ရောက်ရန် ကြိုးပမ်းခဲ့တယ်လို့ သိရပါတယ်။

မော်ရိုကိုနိုင်ငံမှာ ဆန္ဒပြမှုတွေက အဂါဒီယာမြို့၊ ပြည်သူ့ဆေးရုံမှာ ဗိုက်ခွဲကလေးမွေးဖို့ ဆေးရုံတင်ထားရတဲ့ ကိုယ်ဝန်ဆောင်အမျိုးသမီး ရှစ်ဦး သေဆုံးပြီးနောက် စက်တင်ဘာလလယ်ကစလို့ မြို့အများအပြားမှာ ဖြစ်ပွားခဲ့တာပါ။ ဒီနောက်မှာတော့ GenZ 212 မှ စီစဉ်ကျင်းပတဲ့ မကြုံစဖူးသော လူမှုရေး ဆန္ဒပြပွဲတွေဟာ စက်တင်ဘာလ ၂၇ ရက်မှာ စတင်ဖြစ်ပွားခဲ့ပြီး အောက်တိုဘာလ ၂ ရက်အထိဆို ခြောက်ရက် ဆက်တိုက်ဖြစ်ပွားခဲ့တာပါ။

ဆန္ဒပြသူ ဒါဇင်ပေါင်းများစွာက မော်ရိုကိုမြို့တော် ရာဘတ် မြို့လယ်ရှိ အက်ဂ်ဒယ်လ် ဈေးဝယ်ခရိုင်မှာ အောက်တိုဘာလ ၂ ရက်က မော်ရိုကိုအလံတွေကို ဝှေ့ယမ်းကာ “ပြည်သူတွေဟာ ကျန်းမာရေးနဲ့ ပညာရေးကို လိုချင်ကြတယ်” လို့ ကြွေးကြော်ရင်း ငြိမ်းချမ်းစွာ ပြီးဆုံးခဲ့တယ်လို့ AFP သတင်းထောက်တစ်ဦးက ပြောကြားခဲ့ပါတယ်။

ဒီလိုပဲ အခြားသော ငြိမ်းချမ်းစွာစုဝေးဆန္ဒပြမှုတွေက စီးပွားရေးမြို့တော် ကာဆာဘလန်ကာ၊ မာရာကက်ရှ်မြို့ နဲ့ အဂါဒီယာမြို့တွေမှာလည်း ပြုလုပ်ခဲ့ကြပါတယ်။ စုပေါင်းလှုပ်ရှားမှုအဖွဲ့ရဲ့ Discord မီဒီယာပလက်ဖောင်းစာမျက်နှာမှာ အဖွဲ့ကို အဖွဲ့ဝင် ၁၅၀,၀၀၀ ရှိပြီး- နိုင်ငံရေးဆက်နွယ်မှုမရှိတဲ့ “လွတ်လပ်သောလူငယ်” အဖွဲ့အဖြစ် ဖော်ပြထားပါတယ်။

အောက်တိုဘာလ ၂ ရက် ညနေခင်းမှာ စည်းရုံးရေးမဆင်းမီမှာဘဲ စုပေါင်းလှုပ်ရှားမှုအဖွဲ့က အဖွဲ့အနေနဲ့ အကြမ်းဖက်မှု၊ အများပိုင်ပစ္စည်းတွေဖျက်ဆီးမှု ဒါမှမဟုတ် ရုန်းရင်းဆန်ခတ်မှုပုံစံအားလုံးကို ငြင်းပယ်တယ်လို့ ထပ်မံအလေးထားပြောခဲ့ပြီး ဆန္ဒပြသူတွေကိုလည်း ငြိမ်းချမ်းသော လှုပ်ရှားမှု သဘာဝကို လေးစားဖို့တိုက်တွန်းခဲ့ပါတယ်။

“ကျွန်တော်တို့က အားကစားရုံတွေတင်မကဘူး၊ ဆေးရုံတွေကိုပါ လိုချင်တယ်” လို့ မြို့‌တော် ရာဘတ်မှာ အောက်တိုဘာလ ၂ ရက် ဆန္ဒပြပွဲ စကတည်းက လူငယ်တွေက ကြွေးကြော်ခဲ့ကြပါတယ်။ မော်ရိုကိုမီဒီယာများမှ တိုက်ရိုက်ထုတ်လွှင့်မှုတွေအရ ကာဆာဘလန်ကာနဲ့ အဂါဒီယာမြို့တွေမှာ ချီတက်ဆန္ဒပြမှုတွေမှာလည်း ဒီလို တူညီသောကြွေးကြော်သံကို အသုံးပြုခဲ့ကြပါတယ်။

မော်ရိုကိုမှာ ကျန်းမာရေး ပြုပြင်ပြောင်းလဲမှု အများအပြား လုပ်ဆောင်ခဲ့ပေမယ့် ကဏ္ဍရဲ့ လိုအပ်ချက်တွေကို ဖြေရှင်းဖို့ ဒီအောင်မြင်မှုတွေနဲ့ မလုံလောက်သေးပါဘူးလို့ ကျန်းမာရေးဝန်ကြီး Amine Tehraoui က အောက်တိုဘာလ ၁ ရက်ညနေပိုင်းက လွှတ်တော်မှာ ဝန်ခံပြောကြားခဲ့ပါတယ်။

ရာထူးမှ နုတ်ထွက်ဖို့ တောင်းဆို ကြွေးကြော်သံတွေရဲ့ အဓိကပစ်မှတ်ဖြစ်တဲ့ အစိုးရ အကြီးအကဲ အဇဇ် အခန်နော့ရှ် က လူငယ်တွေရဲ့ လူမှုရေး တောင်းဆိုချက်တွေကို တုံ့ပြန်ဖို့နဲ့ တွေ့ဆုံဆွေးနွေးဖို့ ဆန္ဒရှိတယ်လို့ ပြောကြားခဲ့ပါတယ်။

Ref- AFP

Credit - Myanmar Transprency News Agency

#သတင်းဟင်းလေးအိုးကြီး