ရေကြီးပြီး တံတားကျိုးလို့ ကျောက်ပန်းတောင်း-မိတ္ထီလာ ကားလမ်းပိတ်
အောက်တိုဘာ ၃၊ ၂၀၂၅
GG (VOM)
ကြက်မောက်တောင်ဆည် ရေလျှံမှုကြောင်မန္တလေးတိုင်း ကျောက်ပန်းတောင်း - မိတ္ထီလာမြို့ကားလမ်းပေါ်က တံတားတစင်းရေတိုက်စားပျက်စီးသွားတာကြောင့် ကျောက်ပန်းတောင်း - မိတ္ထီလာလမ်း ပိတ်နေတယ်လို့သိရပါတယ်။
ကျောက်ပန်းတောင်း - မိတ္ထီလာကားလမ်းပေါ်က စည်ပင်သာရွာနဲ့ ကိုင်းရွာကြားက တံတားပျက်စီးသွားတာဖြစ်ကြောင်း လတ်တလောမှာ ကား ၊ဆိုင်ကယ် အားလုံးဖြတ်သန်းသွားလာရမရဘူးလို့သိရပါတယ်။
" တံတားကရေတိုက်စားပြီး ကျိုးကျပျက်စီးသွားတော့ လမ်းပိတ်နေတာပါ။တံတားကတော့ အသေးပါ။ မိတ္ထီလာကနေ ကျောက်ပန်းတောင်းကိုသွားမယ်ဆိုရင် ရှောင်ကွင်းလမ်းကနေသွားလို့တော့ရပေမယ့် ခုရက်ကတော့သိပ်အဆင်မပြေဘူး။အဲဒီဘက်တွေလည်းရေကျော်တာရှိတယ်။ရှောင်ကွင်းလမ်းက ရွာတွေဘက်ကသွားရမှာပေါ့။အမြန်လမ်းဘက်ကလည်းရတယ်။ ခရီးတော့ရှည်တာပေါ့။" လို့ ကျောက်ပန်းတောင်း ဒေသခံကပြောပါတယ်။
မိတ္ထီလာ - ကျောက်ပန်းတောင်းလမ်း သွားလာခွင့်မရတဲ့အတွက် ရှောင်ကွင်းလမ်းအဖြစ် ကျေးရွာဘက်ကနေသွားလို့ရပြီး အောက်ပိုင်းကားအမြင့်ပိုင်းတွေသာသွားလို့ရပြီး ခရီးသည်တင်Express ကားတွေသွားလာဖို့အဆင်မပြေဘူးလို့သိရပါတယ်။
ဒါကြောင့် ပုဂံကို သွားဖို့စီစဥ်ထားသူတွေအနေနဲ့ မိတ္ထီလာကိုမဝင်တော့ဘဲ အမြန်လမ်း မိုင်တိုင် ၂၂၀ ကနေ တောင်ညိုလမ်းခွဲ - ကံပြားလမ်းဆုံ - ရေနံချောင်း - ကျောက်ပန်းတောင်း - ပုဂံလမ်းပိုင်းကို အသုံးပြုလို့ရကြောင်း ဒေသခံကပြောပါတယ်။
မနက်ဖန် အောက်တိုဘာ ၄ ရက်ကစပြီး သီတင်းကျွတ်ကာလရုံးပိတ်ရက်ရောက်ပြီဖြစ်လို့ ခရီးသွားမယ့်သူတွေရှိနေသလို ပုဂံကိုလာရောက်ဖို့စီစဥ်ထားသူတွေလည်းရှိနေတာကြောင့် သက်ဆိုင်ရာ နယ်မြေတာဝန်ရှိသူတွေကတော့ ပျက်စီးသွားတဲ့တံတားနေရာကို ယာယီသွားလာနိုင်ဖို့ လုပ်နေတယ်လို့သိရပါတယ်။
" တံတား ကိုအခုပြန်ပြင်နေကြတယ်။ကားတွေယာယီဖြတ်လို့ရအောင်လုပ်နေကြတယ်။အမြန်ဆုံးခုည ၊ နောက်အကျဆုံးမနက်ဖြန်ဖြတ်လို့ရဖို့များပါတယ်။" လို့ မြေပြင်ကူညီရေးဆောင်ရွက်နေသူကပြောပါတယ်။
စက်တင်ဘာ ၃၀ ရက်ကလည်း ကျောက်ပန်းတောင်း မြို့နယ်ထဲက ကြက်မောက်တောင်ဆည် ရေပိုလွှဲကနေ ရေလျှံကျခဲ့လို့ မိတ္ထီလာ - ကျောက်ပန်းတောင်းလမ်းမှာ ရေကျော်ပြီး လမ်းပိုင်း ယာယီပိတ်ခဲ့ရပါတယ်။
ကြက်မောက်တောင်ဆည်က ဆည်စတင်တည်ဆောက်ပြီးချိန်ကတည်းက ယခုတကြိမ်သာ ဆည်ရေပြည်ပြီးလျှံကျမှုဖြစ်ပွားခဲ့တာဖြစ်တယ်လို့ သိရပါတယ်။
ဓာတ်ပုံ - ကိုသက်ဝင်း
