နလအတပ်ဖွဲ့ စစ်ကြောင်းတွေ သီပေါဘက် ဦးတည်လာနိုင်
အောက်တိုဘာ ၃
ရှမ်းပြည်နယ် မြောက်ပိုင်း၊ ကျောက်မဲခရိုင်၊ သီပေါမြို့နယ်၊ စံဖိတ်ကျေးရွာအုပ်စု၊ စံဖိတ်ရွာမှာ အောက်တိုဘာလ ၂ ရက်နေ့ည ၁၀ နာကျော်ခန့်က လေကြောင်း ဗုံးကြဲခံရပြီး နလအ တပ်ဖွဲ့ စစ်ကြောင်းတွေလည်း သီပေါဘက် ဦးတည် စစ်ဆင်လာနိုင်ကြောင်း ဒေသခံတွေဆီက သိရပါတယ်။
"မနေ့ည သီပေါ လေကြောင်းတိုက်ခိုက်မှု စံဖိတ်ရွာဘက် ကုမုဒြာ ဟိုတယ်ကို ထိတယ်လို့ သိရတယ်။ အသံ အကျယ်ကြီးပဲ။ မြေကြီးတောင်တုန်တယ်" လို့ ဒေသခံ အမျိုးသမီး တယောက်က ပြောပါတယ်။
လေယာဉ် ဗုံးက ယမန်နေ့ အောက်တိုဘာလ ၂ ရက်နေ့ည ၁၀ နာရီ ၁၃ မိနစ်ခန့်က ကြဲချ တိုက်ခိုက် သွားတာ လို့ ဆိုပါတယ်။
"ကျောက်မဲရပြီလေ။ သီပေါလာမှာပေါ့။ ရှောင်ထားတာ အကောင်းဆုံးပါ။ လာကြဲမှာသေချာတယ်။ အသက်ထက် ဘာမှအရေး မကြီးဘူးဆိုပေမယ့် ကျန်ရှိပစ္စည်းတွေအတွက် အိမ်စောင့် တယောက်က ထားဖို့လိုပြန်တယ်" လို့ နောက်ထပ် ဒေသခံ တယောက်က ပြောပါတယ်။
သီပေါ ဒေသခံ တချို့ကတော့ စိုးရိမ်လို့ ရှောင်ကြကုန်ပြီ ဖြစ်ပြီး သူခိုးရန်ကလည်း စိတ်ပူနေကြရတယ်လို့ ဆိုပါတယ်။
ယမန်နေ့ အောက်တိုဘာ ၃ ရက် နေ့ည ၁၀ နာရီ ၁၅ မိနစ်မှာ သီပေါမြို့နယ်၊ စံဖိတ်ကျေးရွာ၊ကုမုဒြာဟိုတယ်ကို လေကြောင်းနဲ့ ပေါင် ၅၀၀ ဗုံး နှစ်လုံး ကြဲချတိုက်ခိုက် လို့ ကုမုဒြာဟိုတယ် အဆောက်အဦး တခု ပျက်စီးသွားကြောင်း TNLA ဘက်က သတင်း ထုတ်ပြန်ထားပါတယ်။
ပြီးခဲ့တဲ့ စက်တင်ဘာ ၃ ရက်နေ့ကလည်း သီပေါမြို့နယ်၊ ဘော်ကြိုရွာမှာ ဗုံးကြဲခံရလို့ လူ တဦး ဒဏ်ရာရခဲ့ပြီး နေအိမ် ၃ လုံး ပျက်စီးခဲ့တယ်လို့လည်း ဖော်ပြထားပါတယ်။
ရွေးကောက်ပွဲကော်မရှင်ရဲ့ ကြေညာချက်တွေအရ လာမယ့် ဒီဇင်ဘာလမှာ ကျင်းပမယ့် အထွေထွေ ရွေးကောက်မှာ သီပေါမြို့လည်း ပါဝင်တာ တွေ့ရပါတယ်။
Credit - Voice of Myanmar News Agency
#သတင်းဟင်းလေးအိုးကြီး
