ငါးပိထောင်းကို နေရာဒေသအလိုက် ပုံစံအမျိုးမျိုးပြုလုပ်ကြတဲ့အထဲက မလေးရှား၊ အင်ဒိုနီးရှားမှာ စားလေ့ရှိတဲ့ ငါးပိထောင်းလုပ်နည်းလေးကို မျှဝေပေးချင်ပါတယ်။ ဒီငါးပိထောင်းလေးကို အင်ဒိုနီးရှားအလည်ရောက်တုန်း အခါခါစားခဲ့ရပြီး မမေ့နိုင်တဲ့အရသာသစ်နဲ့ ငါးပိထောင်းပုံစံတစ်မျိုးဖြစ်ပါတယ်။ အင်ဒိုနီးရှားမှာ အိမ်ရှင်ကို အားမနာစတမ်း အကြိမ်ကြိမ်ထပ်လုပ်ခိုင်းခဲ့တဲ့ ငါးပိထောင်းလလည်းဖြစ်ပါတယ်။ အရသာသစ်နဲ့ လျှာလည်သွားစေမယ့် ငါးပိထောင်းလေးကို လုပ်စားကြည့်ကြရအောင်နော်။
ပါဝင်ပစ္စည်းများ
ငရုတ်သီးအပွအနီတောင့် - ၅ တောင့်
ခရမ်းချဉ်သီး - ၃ လုံး
ကြက်သွန်နီအသေး - ၅ လုံး
ကြက်သွန်ဖြူ - ၄ မွှာ
ငရုတ်သီးစိမ်း/ အနီ အစပ် - ၁၀ တောင့်
ပုစွန်ငါးပိ - စားပွဲဇွန်း - ၃ ဇွန်း
သကြား - ၂ ဇွန်း
ဆား - အနည်းငယ်
သံပုရာသီး - ၂ လုံး
ဆီ - အနည်းငယ်
ပြုလုပ်နည်း
၁။ ဦးစွာ ပါဝင်ပစ္စည်းများအားလုံးကို ရေဆေးသန့်စင်ပြီး အတုံးငယ်လေးများဖြစ်အောင် လှီးဖြတ်ထားပါ။
၂။ ဒယ်အိုးတစ်အိုးကို အပူပေး၍ ဆီအနည်းငယ်နှင့် ငါးပိကိုကြော်ပြီး ဘေးဖယ်ထားပါ။
၃။ အိုးထဲကို ဆီအနည်းငယ်ထပ်ထည့်ပြီး ကြက်သွန်၊ ခရမ်းချဉ်သီးနှင့် ငရုတ်သီး လှီးဖြတ်ထားသည်တို့ကို ထည့်၍ အနည်းငယ်နွမ်းအောင် ဆီသတ်ပါ။
၄။ အနည်းငယ်နွမ်းပြီး ဆီသတ်နံ့မွှေးလာပါက မီးဖိုပေါ်မှ ချပါ။
၅။ ကြော်ထားပြီးသား ငါးပိနှင့် ဆီသတ်ထားသည်တို့ကို ငရုတ်ဆုံထဲထည့်၍ ဖိခြေပြီး ထောင်းပါ။ စက်ဖြင့်လည်း ကြိတ်နိုင်ပါတယ်။
၆။ အတော်အသင့်ကြေညက်ပါက သကြားနှင့် သံပုရာရည်ထည့်ပါ။
၇။ သမအောင်မွှေပြီး အရသာအပေါ့ အငန် မြည်းပါ။ လိုအပ်ပါက ဆားအနည်းငယ်ထည့်ပြီး နှစ်သက်ရာ ကြက်ကြော်၊ ထမင်းဖြူ၊ သီးနှံ တို့စရာတို့နှင့် တွဲဖက်တည်ခင်းနိုင်ပါပြီ။
ကြိတ်ပြီးသား ငါးပိထောင်းအထားခံရန် ဆီအနည်းငယ်ဖြင့် ဆီပြန်လာအောင် ချက်ထားပြီးလည်း သုံးဆောင်နိုင်ပါတယ်။
#creditoriginaluploaded
