ရေနွေးသောက်တဲ့အကျင့်"
=================
🍀လူတော်တော်များများမှာ အယူအဆ မှားနေတာ လေးတွေ ရှိတတ် ကြပါတယ်။ ဥပမာ- မနက် စောစော အိပ်ရာထတာနဲ့ စိတ်အာရုံ လန်းဆန်းအောင် ကော်ဖီပူပူ၊ လက်ဖက်ရည် ပူပူလေးတွေ သောက်ချင် ကြတာ မျိုးပေါ့။ ကျန်းမာရေးနဲ့ သင့်တော်တဲ့ ရေကျတော့ ဘယ်သူမှ သိပ်မသောက်ချင်ကြဘူး။ သောက်ရင်လဲ ရိုးရိုးရေ မဟုတ်ဘဲ ရေခဲရေမှ သောက်ချင်သူ တွေကလဲ အများသားလား။ အေးမှ သောက်ချင်တာ လူ့သဘာဝပါ။ ငယ်စဉ်ကာလ ကလေးဘဝကတည်းက ရေအေး တိုက်ခဲ့ကြတဲ့ လူကြီးတွေရဲ့ အပြစ်လဲ ပါလိမ့်မယ်။ အသက်ကြီး လာပြန်တော့လဲ ရေဆိုအေးမှ သောက်တဲ့ အကျင့်ရလာ ပါတယ်။
🍀ဒီလိုဆိုရင် ရေအေး သောက်တာ မကောင်းဘူးလား၊ ကျန်းမာရေး ဆိုးကျိုး ရှိလို့လား၊ ရေပူနဲ့ ရေအေး ဘာကွာခြားလဲ မေးစရာ ရှိပါတယ်။ အပေါ်ယံကြည့်ရင်တော့ ရေတိုင်းနီးပါး အတူတူပါပဲ။ ရေရဲ့ အဓိက အာနိသင်က ဆဲလ်တွေရဲ့ သယ်ယူ ပို့ဆောင်မှု၊ လုပ်ငန်း ဆောင်တာတွေ ကောင်းမွန် စေဖို့သာ ဖြစ်တယ်။ ရေမှာ စွမ်းအင်၊ အာဟာရဓာတ် မည်မည်ရရ မပါဝင်ပေမယ့် သတ္တုဓာတ်တွေတော့ ပါဝင်တတ်ကြတယ်။
🍀ရေအရင်းအမြစ် ပေါ်လိုက်ပြီး သတ္တုဓာတ် (သံဓာတ်၊ ကယ်လ်စီယမ် နဲ့ မဂ္ဂနီစီယမ်) ပါဝင်မှု ပြောင်းလဲ နိုင်ပါတယ်။ ဒါလဲ အဓိကတော့ သိပ်မကျပါ။ ရေရဲ့ အပူဓာတ်၊ အအေးဓာတ် သဘာဝပေါ် အခြေခံပြီး ကျန်းမာရေး အကျိုး ရလဒ်တွေ ပြောင်းလဲ သွားတယ်။
🍀ရေကိုအပူပေးတဲ့အခါ အထဲမှာ ပါတဲ့ ရောဂါ ပိုးမွှားတွေ ကင်းစင် သွားတယ်။ ရေနွေးရဲ့ အာနိသင်ကြောင့် ခန္ဓာကိုယ် အပူချိန် မြှင့်တက် လာစေတယ်။ သွေး လည်ပတ်မှု အားကောင်းပြီး ချွေးထွက်များ လာတယ်။ အဆိပ် အတောက်၊ ပိုးမွှားတွေ က အရေပြား ကနေ ချွေးနဲ့အတူ အပြင်ထွက် သွားတယ်။ ဒါ့ပြင် ဆဲလ်တွေရဲ့ ဇီဝ ဖြစ်ပျက်မှု မြန်ဆန် စေပြီး အဆီပိုတွေ လောင်ကျွမ်း စေတယ်။ ကြွက်သားတွေကို ပြေလျော့စေပြီး အာရုံကြောတွေကို နှိုးဆွပေးတယ်။
🍀အသက်ရှူလမ်းကြောင်း ဆိုင်ရာ ကူးစက်ရောဂါတွေမှာ ရေနွေးက ပို အသုံးဝင်တယ်။ အအေးမိ၊ နှာစေး၊ လည်ချောင်းနာ၊ ချောင်းဆိုး၊ အသံဝင်ခြင်း အတွက် ရေနွေးရဲ့ အာနိသင်က ထိရောက်တယ်။ သလိပ်ပျော်စေပြီး ချွဲထွက်စေတယ်။ နှာခေါင်း ပိတ်ခြင်းကို သက်သာ စေတယ်။ အသက်ရှူ လမ်းကြောင်းကို ရှင်းလင်း စေတယ်။ အဖျားရောဂါတွေမှာ ရေနွေးက ရေအေးထက် ပိုကောင်းတယ်။ ဗမာဆေးတွေ သောက်တဲ့ အခါ ရေနွေးနဲ့ သောက်ခိုင်းတာ ဒီအာနိသင်ကို ရရှိစေဖို့ ဖြစ်တယ်။ သို့သော် အင်္ဂလိပ်ဆေး တွေမှာတော့ ရေနွေးနဲ့ မသောက်ဘဲ ရိုးရိုးရေအေးနဲ့သာ သောက်ပေးသင့်တယ်။ အပူက ဆေးရဲ့အာနိသင်ကို ပြောင်းလဲစေတယ်။ ဒါ့ပြင် ဆရာဝန် ညွှန်ကြားချက် မရှိဘဲ ကော်ဖီ၊ လက်ဖက်ရည်၊ အချိုရည် စတာတွေနဲ့ တွဲသောက်တာမျိုးကို ရှောင်ကြဉ်သင့်တယ်။
