ထိုင်းနိုင်ငံတွင် ယနေ့မနက်ဖြစ်ပွားသည့် တိုက်ခန်းမီးလောင်မှုအတွင်း ကလေးငယ်သုံးဦးအပါအဝင် မိသားစု၀င်ခုနစ်ဦးစလုံး သေဆုံး
အောက်တိုဘာ ၂
ယနေ့ အောက်တိုဘာလ ၂ ရက် နံနက်အစောပိုင်းတွင် ထိုင်းနိုင်ငံ၊ ရယောင်းမြို့ရှိ တိုက်ခန်းတစ်ခန်းတွင် နေထိုင်နေသည့် မိသားစု နှစ်ခြိုက်စွာ အိပ်မောကျနေချိန် မီးလောင်မှုဖြစ်ပွားခဲ့ရာမှ အသက်သုံးနှစ်အောက် ကလေးငယ်သုံးဦးအပါအဝင် မိသားစု၀င်ခုနစ်ဦးစလုံး သေဆုံးခဲ့ရရှာသည်။
မီးသတ်သမားများသည် မီးလောင်မှုဖြစ်ပွားရာ ရယောင်းမြို့၊ ဆွိုင်သန်ဖိုင်း ၂ လမ်းသို့ နံနက် ၂ နာရီခွဲအချိန် ရောက်ရှိသွားရာ မီးတောက်များသည် တိုက်ခန်းတစ်လုံးကို လွှမ်းခြုံထားပြီး အခြားသုံးလုံးသို့ပါ ကူးစက်နေသည်ကို တွေ့ရှိခဲ့ရသည်။
မီးသတ်သမားများ၏ ကြိုးစားမှုကြောင့် မိနစ် ၃၀ အတွင်း မီးကို ထိန်းချုပ်နိုင်ခဲ့သော်လည်း မီးစတင်လောင်ကျွမ်းသည့် တိုက်ခန်းမှာ လုံးဝပျက်စီးသွားခဲ့သလို ထိုတိုက်ခန်းတွင် နေထိုင်သူ မိသားစုခုနစ်ဦးစလုံးကို ၎င်းတို့အိပ်ပျော်နေသည့် ဒုတိယထပ်တွင် မီးလောင်ကျွမ်းကာ သေဆုံးလျက်သား တွေ့ရှိခဲ့ရသည်။
ထို့အတူ ဘေးချင်းကပ်တိုက်ခန်းများမှ နေထိုင်သူ သုံးဦးမှာ မီးခိုးငွေ့ ရှူမိသဖြင့် ရယောင်းဆေးရုံသို့ တင်ပို့ခဲ့ရသည်။
မျက်မြင်သက်သေတစ်ဦး၏ ပြောကြားချက်အရ နံနက် ၂ နာရီ ၇ မိနစ်ခန့်တွင် အော်သံများကြားခဲ့ရပြီးနောက် မီးတောက်များ တိုက်ခန်းကို လောင်ကျွမ်းနေသည်ကို မြင်တွေ့ခဲ့ရကြောင်း သိရသည်။ အရေးပေါ်အဖွဲ့များ မရောက်မီ အိမ်နီးနားချင်းများက မီးငြှိမ်းသတ်ရန် ကြိုးစားခဲ့ကြသည်။
ရဲတပ်ဖွဲ့ကမူ လျှပ်စစ်ဝါယာရှော့ခ်ကြောင့် မီးလောင်ကျွမ်းသည်ဟု သံသယရှိပြီး တိကျသော အကြောင်းရင်းကို ဆုံးဖြတ်ရန် စုံစမ်းစစ်ဆေးရေးမှူးများက အခင်းဖြစ်ပွားရာနေရာကို စစ်ဆေးနေသည်ဟု သိရသည်။
Ref, Khaosod
Credit - Myanmar Transparency News Agency
#သတင်းဟင်းလေးအိုးကြီး
