ရန်ကုန်တိုင်းအတွင်းရှိ ရေလှောင်တမံ ခြောက်ခု ရေပြည့်မှတ်နီးပါး ရောက်ရှိနေ
အောက်တိုဘာ ၁ - ၂၀၂၅

အခုနှစ် မိုးနှောင်းကာလအတွင်း မိုးရွာသွန်းမှု များပြားလျက်ရှိတာကြောင့် ရန်ကုန်တိုင်းအတွင်းက ရေလှောင်တမံ ခြောက်ခု ရေပြည့်မှတ်နီးပါး ရောက်ရှိနေပြီ ဖြစ်တယ်လို့ ရန်ကုန်တိုင်း ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာနက ဒီကနေ့ အောက်တိုဘာ ၁ ရက်နေ့မှာ အသိပေးထားပါတယ်။
လက်ရှိမှာ လှည်းကူးမြို့နယ် အတွင်းက ငမိုးရိပ်ရေလှောင်တမံ အပါအဝင် ပေါင်းလင်း၊ မဟူရာ၊ လဂွမ်းပြင်၊ ကလီထော်၊ တောင်လုံးမြောင် အစရှိတဲ့ ရေလှောင်တမံတွေ ရေပြည့်မှတ် နီးပါး ရောက်ရှိနေတာ ဖြစ်တယ်လို့ သိရပါတယ်။
“မိုးကတော့ ဒီမနက်ပိုင်း တောက်လျှောက် ကောင်းနေတယ်။ ရေလှောင်တမံတွေကတော့ လက်ရှိ ရောက်နေတဲ့ ရေမှတ်ကနေ သိသိသာသာတော့ မတိုးသေးပါဘူး။ လောလောဆယ်တော့ ရေကျော်မယ့် အလားအလာ မတွေ့ရသေးပါဘူး” လို့ ဆည်မြောင်းဝန်ကြီးဌာနနဲ့ နီးစပ်သူတယောက်က ပြောပါတယ်။
လက်ရှိမှာ ငမိုးရိပ်ရေလှောင်တမံဟာ ‌ဒီကနေ့ အောက်တိုဘာ ၁ ရက်၊ မနက် ၆ နာရီအချိန်မှာ ရေပြည့်မှတ် ရောက်ဖို့အတွက် ၀ ဒသမ ၁၀ ပေလောက်သာ လိုတော့တယ်လို့ သိရပါတယ်။
ငမိုးရိပ်ရေလှောင်တမံရဲ့ ရေပြည့်မှတ်ဟာ ၁၀၇ ပေ ဖြစ်ပြီး လက်ရှိမှာတော့ ရေအမှတ် ၁၀၆ ဒသမ ၉၀ ပေကို ရောက်ရှိနေတာဖြစ်ကာ မိုးရေချိန်ကတော့ ၀ ဒသမ ၄၃ လက်မ ရှိနေတယ်လို့ သိရပါတယ်။
ငမိုးရိပ် ရေလှောင်တမံမှာ နှစ်စဥ်ပျှမ်းမျှ မိုးရေချိန် ၁၀၀ ဒသမ ၀၀ လက်မ လက်ခံရရှိနေပြီး အခုနှစ် အတွင်းမှာတော့ မိုးရေချိန်မှာ ၉၁ ဒသမ ၃၇ လက်မအထိ လက်ခံ ရရှိပြီးဖြစ်တယ်လို့ ဆိုပါတယ်။
“အခုရက်ပိုင်းက မုန်တိုင်းအရှိန်ကလည်း ရှိနေတော့ မိုး‌ကတော့ ကောင်းနေဦးမယ်။ အရင်ကတော့ ရာဂါဆာမုန်တိုင်း၊ အခုကတော့ ဘူအလွိုင် မုန်တိုင်းပေါ့။ မုန်တိုင်းတွေသာ မရှိရင်တော့ Shutter တွေ ပိတ်ရမှာ။ လက်ရှိကတော့ အခြေအနေ ဘာမှန်းမသိသေးဘူး။ မိုးရွာသွန်းမှု အနည်းအများကိုပဲ စောင့်ကြည့်ရမှာပဲ” လို့ သူက ပြောပါတယ်။
ဒါအပြင် ရေပြည့်မှတ် ၁၉၀ ပေ ရှိတဲ့ ပေါင်းလင်းဆည်ဟာလည်း လက်ရှိမှာ ရေအမှတ် ၁၇၉ ဒသမ ၈၀ ပေကို ရောက်ရှိနေပြီး မိုးရေချိန် ၀ ဒသမ ၉၈ လက်မ ရှိနေတယ်လို့ သိရပါတယ်။
ရေပြည့်မှတ် ၂၁၆ ပေ ရှိတဲ့ မဟူရာ (ငမိုးရိပ်) ရေကူရေလှောင်တမံဟာလည်း လက်ရှိမှာ ရေအမှတ် ၂၁၄ ဒသမ ၉၀ ပေကို ရောက်ရှိနေပြီး မိုးရေချိန် ၀ ဒသမ ၇၈ လက်မ ရှိနေတယ်လို့ သိရပါတယ်။
လဂွမ်းပြင် ရေလှောင်တမံ‌ကတော့ ရေပြည့်မှတ် ၈၂ ပေရှိပြီး လက်ရှိမှာ ရေမှတ် ၇၇ ဒသမ ၄၀ ပေကို ရောက်ရှိနေကာ မိုးရေချိန် ၁ ဒသမ ၁၇ လက်မ ရှိနေတယ်လို့ သိရပါတယ်။
ကလီထော်ဆည်ကတော့ ရေပြည့်မှတ် ၁၃၅ ပေရှိပြီး လက်ရှိမှာ ရေမှတ် ၁၃၂ ဒသမ ၃ ပေကို ရောက်ရှိနေကာ မိုးရေချိန် ၁ ဒသမ ၈၅ လက်မ ရှိနေပြီး မိုးရေချိန် ၀ ဒသမ ၇၈ လက်မ ရှိနေသလို ရေပြည့်မှတ် ပေ ၈၀ ရှိတဲ့ တောင်လုံးမြောင် ရေလှောင်တမံကတော့ လက်ရှိမှာ ရေအမှတ် ၇၄ ဒသမ ၀၀ ပေကို ရောက်ရှိနေတယ်လို့ သိရပါတယ်။
“အရင်ရက်တွေက မိုးက ရွာလိုက်တိတ်လိုက်ဆိုတော့ ရေက ထင်သလောက် မတိုးလာဘူး။ မိုးဆက်တိုက် ရွာလို့ တမံကနေ ရေလျှံလာမယ် ဆိုရင်တော့ ရေပိုလွှဲကနေ ချောင်းတွေထဲ ရေစီးဝင်နိုင်တယ်။ အနိမ့်ပိုင်း ရပ်ကွက်တွေ၊ ချောင်းနံဘေးက နေရာတွေ သတိထားရမှာပေါ့” လို့ ဆည်မြောင်း ဝန်ကြီးဌာနနဲ့ နီးစပ်သူက ပြောပါတယ်။
လက်ရှိ ဖြစ်ပေါ်နေတဲ့ မိုးလေဝသ အခြေအနေတွေနဲ့ ပတ်သက်လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနရဲ့ ဒီကနေ့ မနက် ၁၀ နာရီခွဲအချိန် တိုင်းထွာချက်တွေအရ ဘင်္ဂလားပင်လယ်အော် အနောက်အလယ်ပိုင်းမှာ ဖြစ်ပေါ်နေတဲ့ လေဖိအားနည်းရပ်ဝန်းဟာ ပိုမို အားကောင်းလာနေပြီး အားကောင်းတဲ့ လေဖိအားနည်းရပ်ဝန်း အဖြစ်ကို ရောက်ရှိခဲ့ပြီ ဖြစ်တယ်လို့ သိရပါတယ်။
အဲဒီ အားကောင်းတဲ့ လေဖိအားနည်းရပ်ဝန်းဟာ အနောက်မြောက်ဘက်ကို ရွေ့လျားနိုင်ပြီး အောက်တိုဘာ ၂ ရက်နေ့မှာ ဘင်္ဂလားပင်လယ်အော် အနောက်အလယ်ပိုင်းနဲ့ ယင်းနဲ့ ဆက်စပ်လျက်ရှိတဲ့ ဘင်္ဂလား ပင်လယ်အော် အနောက်မြောက်ပိုင်းတို့မှာ မုန်တိုင်းငယ်အဖြစ် ပိုမို အားကောင်းလာနိုင်တယ်လို့ သိရပါတယ်။
အဲဒီနောက် အောက်တိုဘာ ၃ ရက်နေ့မှာ အိန္ဒိယနိုင်ငံ၊ ဩရိဿပြည်နယ်‌တောင်ပိုင်း - အင်ဒရာ ပရာဒေ့ရှ် မြောက်ပိုင်းကမ်းခြေတို့ကို ဖြတ်ကျော်နိုင်တယ်လို့ မိုး/ဇလက ခန့်မှန်းထားပါတယ်။
ဒီကနေ့ အောက်တိုဘာ ၁ ရက်၊ ညနေပိုင်းအထိ မိုးရွာသွန်းမှု အခြေအနေတွေကတော့ ချင်းပြည်နယ်မှာ နေရာကျဲကျဲ၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ကယားပြည်နယ်နဲ့ ရှမ်းပြည်နယ် (မြောက်ပိုင်း) တို့မှာ နေရာစိပ်စိပ်နဲ့ ကျန်တိုင်းနဲ့ ပြည်နယ်တို့မှာ နေရာအနှံ့အပြား မိုးထစ်ချုန်းရွာပြီး ကချင်ပြည်နယ်မှာ နေရာကွက်ပြီး မိုးကြီးနိုင်ကာ ရွာရန်ရာနှုန်းပြည့် ဖြစ်တယ်လို့ သိရပါတယ်။