ကလေးကိုသန်ချပေးခြင်း
အမေးများတဲ့ သန်ချခြင်းနဲ့ပတ်သက်တဲ့ ကျန်းမာရေးအကြောင်းပါ။
💠ကလေးမှာ သန်ကောင်တွေရှိနေရင် ဘာဆိုးကျိုးတွေဖြစ်စေမလဲ?
သန်ရှိခြင်းဟာ ကလေးငယ်ကို အာဟာရချို့တဲ့စေပါတယ်။ သန်ကောင်တွေဟာ အာဟာရကိုစုပ်ယူတဲ့အတွက် Host ဖြစ်သူ ကလေးငယ်မှာ လိုအပ်တဲ့အာဟာရတွေမရတော့ဘဲ သွေးအားနည်းရောဂါ၊ အာဟာရချို့တဲ့ခြင်းများ ဖြစ်စေတတ်ပါတယ်။ ကလေးမကြာခဏဖျားခြင်း၊ ဖွံ့ဖြိုးမှုနောက်ကျခြင်းစသည်တို့ကိုပါဖြစ်စေပါတယ်။
💠သန်ရှိနေရင် ဘယ်လိုရောဂါလက္ခဏာတွေပြနိုင်သလဲ?
သေးငယ်တဲ့သန်ကောင်ပဲဖြစ်ပါစေ သန်ကောင်မှန်ရင် ကလေးငယ်ကို နာကျင်စေ၊ ဖျားနာစေပါတယ်။ သန်ရှိနေတဲ့ကလေးဟာ အာဟာရချို့တဲ့မှု (malnutrition) ဖြစ်နိုင်ခြေအလွန်များပါတယ်။
သန်ရှိနေရင်ပြသတဲ့ရောဂါလက္ခဏာတွေကတော့
-မောပန်းလွယ်ခြင်း၊ နုံးခွေခြင်း
-ဗိုက်နာခြင်း
-ဝမ်းဗိုက်တင်းနေခြင်း
-ဝမ်းဗိုက်ထဲတွင်မအီမသာဖြစ်ခြင်းကြောင့် ကလေးအီခြင်း
-မကြာခဏဖျားနာတတ်ခြင်း
-စအိုတစ်ဝိုက်ယားယံခြင်း
-ဝမ်းထဲတွင် သန်ကောင်များပါလာခြင်း
-ဝမ်းပျက်ခြင်း
-အင်ပျဉ်ထခြင်း
-အလေးချိန်ဖွံ့ဖြိုးတိုးတက်မှုမရှိခြင်း
-သန်ကောင်များကြောင့် အာဟာရစုပ်ယူမှုမရှိဘဲ အာဟာရချို့တဲ့ပြီး ဗိုက်ပူနံကားကလေးငယ်များဖြစ်လာခြင်း စသည်တို့ပဲဖြစ်ပါတယ်။
💠သန်ရောဂါမှာနောက်ဆက်တွဲဆိုးကျိုးတွေရှိလား?
▪️သန်ကောင်များကြောင့် ခန္ဓာကိုယ်တွင်းမှာ သွေးထွက်သွေးယိုပြီး သံဓာတ်ချို့တဲ့သောသွေးအားနည်းရောဂါဖြစ်လာနိုင်ပါတယ်။
▪️အူယောင်ပြီး အူပိတ်နိုင်ပါတယ်။
▪️ဝမ်းပျက်ဝမ်းလျှောဖြစ်နိုင်ပါတယ်။
▪️သည်းခြေပြွန်ပိတ်ဆို့ရောင်ရမ်းခြင်းဖြစ်နိုင်ပါတယ်။
▪️သရက်ရွက်ရောင်နိုင်ပါတယ်။
▪️ဦးနှောက်ဖွံ့ဖြိုးမှုအားနည်းနိုင်ပါတယ်။
▪️ကလေးကကိုယ်အလေးချိန်တက်မလာပါဘူး။ ▪️လိုအပ်တဲ့ အာဟာရဓာတ်တွေကိုလည်း ကိုယ်ခန္ဓာက မစုပ်ယူနိုင်၊ အသုံးမချနိုင်တော့ပါဘူး။
💠ဘယ်လိုကုသကြမလဲ?
ကလေးမှာဒီလက္ခဏာတွေရှိနေရင်ဆရာဝန်နဲ့ မဖြစ်မနေ ပြသင့်ပါတယ်။ ဆရာဝန်ရဲ့ညွှန်ကြားချက်အတိုင်း အချိန်တိတိကျကျနဲ့သန်ချဆေးတိုက်သင့်ပါတယ်။
💠ကလေးငယ်ကို သန်ရောဂါမဖြစ်အောင် ဘယ်လိုကာကွယ်ကြမလဲ
▪️ကလေးရဲ့တကိုယ်ရည်သန့်ရှင်းရေးကိုအလေးထားရပါမယ်။
▪️လက်သည်း၊ ခြေသည်း အရှည်မထားပေးပါနဲ့။
▪️ကလေးရဲ့ လက်စုပ်တဲ့အကျင့်၊ လက်သည်းကိုက်တဲ့အကျင့်ကို ပြုပြင်ပေးပါ။
▪️ယင်လုံအိမ်သာသုံးပါ။
▪️အိမ်သာမှအထွက်လက်ဆေးခြင်း၊ အစားအသောက်များကို မကိုင်တွယ်ခင်၊ အစားမစားမီ လက်ကိုသေချာသန့်စင်ဆေးကြောခြင်းစတဲ့ အပြုအမူတွေကိုလေ့ကျင့်ပေးပါ။
▪️ယင်နားစာများကိုရှောင်ကြဉ်ပေးပါ။
▪️ကလေးကစားစရာများကို သန့်ရှင်းရေးလုပ်ပါ။
💠သန်ချဆေးတိုက်ချင်ရင်
အသက် ၁နှစ်အောက်ကတော့ သန်ချဆေးမတိုက်ရပါဘူး။
အသက် ၁နှစ်မှ ၂နှစ်အတွင်းကလေးများကို (❗သန်ချပေးဖို့လိုအပ်တဲ့အခါ)
🔸Albendazole 200mg တိုက်ပေးလို့ရပါတယ်။
(မိဘများ မိမိသဘောနဲ့မိမိတိုက်တာထက် ဆရာဝန်နဲ့တိုင်ပင်ပြီးမှ တိုက်ပါ။)
အသက် ၂နှစ်အထက်ကလေးများကိုတော့
🔸Albendazole 400mg တစ်ကြိမ် (သို့မဟုတ်)
🔸Mebendazole 500mg တစ်ကြိမ် တိုက်နိုင်ပါတယ်။
💠မိဘများမမေ့စေဖို့
▪️မူကြိုအရွယ်ကလေးများ
▪️မူလတန်းအရွယ်ကလေးများကို သန်ချဆေးပုံမှန်တိုက်ပေးသင့်ပါတယ်။
▪️၆လတစ်ကြိမ်သန်ချဆေးတိုက်ပေးရပါမယ်။ မိသားစုအားလုံး သန်ချဆေးကို ၆လတစ်ကြိမ်သောက်သင့်ပါတယ်။ သန်ကောင်ရောဂါဖြစ်မှုနှုန်းနဲ့ ကူးစက်နှုန်းကို လျှော့ချချင်လို့ဖြစ်ပါတယ်။
💠ကလေးကိုသန်ချဆေးတိုက်ရင် ဆေးရဲ့ဘေးထွက်ဆိုးကျိုးရော ရှိနိုင်သလား?
သန်ချဆေးရဲ့ဘေးထွက်ဆိုးကျိုးဟာ အလွန်နည်းပါးပါတယ်။ ကလေးအချို့မှာတော့ ဝမ်းဗိုက်နာခြင်း၊ မအီမသာဖြစ်ခြင်း၊ ပျို့အန်ခြင်း၊ အနီစက်ထခြင်း စတဲ့ ဘေးထွက်ဆိုးကျိုးဖြစ်တတ်ပါတယ်။ ဒါကြောင့် ကလေးငယ်ကို သန်ချတော့မယ်ဆိုရင် ဆရာဝန်နဲ့ တိုင်ပင်ပြီးမှ ညွှန်ကြားချက်အတိုင်း လိုက်နာဆောင်ရွက်သင့်တာတော့အကောင်းဆုံးပဲဖြစ်ပါတယ်။
သန်ချခြင်းဟာငွေကုန်ကြေးကျလည်းမများပါဘူး။ ဒါပေမယ့် သန်မချဘဲ သန်ရောဂါရှိရင် ကလေးရဲ့ ကျန်းမာရေးနဲ့ နောက်ဆက်တွဲဆိုးကျိုးတွေကတော့ များလှပါတယ်။ ဒါကြောင့် ကလေးငယ်ရဲ့ ကျန်းမာရေးကို ဂရုတစိုက်စောင့်ကြည့်ပြီး ပုံမှန်သန်ချပေးဖို့လိုအပ်တယ်ဆိုတဲ့အကြောင်း ရေးသားလိုက်ရပါတယ်။
အားလုံးကျန်းမာပျော်ရွှင်ကြပါစေ။
မောင်(ဆေး-၁)
@Dr.မာမီ
#ကျန်းမာရေးဗဟုသုတ
ခရက်ဒစ် #crd_to_owner_with_respect
#crd #hilightseveryonefollowers