ရုရှားခရီးစဥ်သည် နိုင်ငံအတွက် ခြေလှမ်းအသစ်ချနိုင်ခဲ့ပြီး ရုရှားနှင့်ကာဇက်စတန်ခရီးမှာ အောင်မြင်သောခရီးစဥ်ဖြစ်
စက်တင်ဘာ ၃၀
ရုရှားခရီးစဥ်သည် နိုင်ငံအတွက် ခြေလှမ်းအသစ် ချနိုင်ခဲ့ပြီး ရုရှားနိုင်ငံနှင့် ကာဇက်စတန်နိုင်ငံ ခရီးစဥ်မှာ အောင်မြင်သောခရီးစဥ်ဖြစ်ကြောင်း ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က အထူးလေယာဉ်ပေါ်၌ မီဒီယာများ၏ မေးမြန်းမှုများကို ပြန်လည်ဖြေကြားစဥ် ထည့်သွင်းပြောကြားသည်။
မော်စကိုမြို့တွင် ပြုလုပ်သော ကမ္ဘာ့အဏုမြူသီတင်းပတ်ဖိုရမ် (World Atomic week forum) ကိုတက်ရောက်ရန်အတွက် သမ္မတကြီးပူတင်၏ ဖိတ်ကြားချက်အရ သွားရောက်ခဲ့ရာ သမ္မတကြီးပူတင်၊ ဘယ်လာရုစ်သမ္မတ ၊ အာမေးနီးယားဝန်ကြီးချုပ်၊ အီသီယိုးပီးယားဝန်ကြီးချုပ်၊ အခြားခေါင်းဆောင်များ၊ IAEA ၏ ညွှန်ကြားရေးမှူးချုပ်တို့နှင့်တွေ့ဆုံကာ နှစ်ဖက် ပူးပေါင်းဆောင်ရွက်နိုင်မည့် အခြေအနေများကိုလည်း ဆွေးနွေးနိုင်ခဲ့ပြီး အဆိုပါ ဒီညီလာခံသည် ထူးခြားသော ညီလာခံတစ်ခုဖြစ်ကြောင်း ပြောသည်။
"အဓိက ကတော့ အဏုမြူစွမ်းအင်ကို ငြိမ်းချမ်းစွာ အသုံးပြုရေးနဲ့ပတ်သက်ပြီးတော့ အမြင်ချင်းဖလှယ်ကြတာလည်းဖြစ်ပါတယ်။ ဒါက တော့ ကျွန်တော်တို့လည်း IAEA အဖွဲ့ဝင်နိုင်ငံတစ်ခုဖြစ်တဲ့အတွက်ကြောင့် အဏုမြူစွမ်းအင်ကို လူသားအကျိုးပြုလုပ်ငန်းတွေမှာ အသုံးပြုနိုင်အောင် အမြင်ချင်းဖလှယ် တာလည်းဖြစ်ပါတယ်။ ရရှိခဲ့တဲ့အကျိုးကတော့ တော်တော်လေးကောင်းတယ်လို့ ပြောရမှာဖြစ်ပါတယ်" ဟု ပြောကြားသည်။
ရုရှားသမ္မတကြီး ပူတင်နှင့် သီးခြားတွေ့ဆုံနိုင်ခဲ့ရာ မတ်လ တွေ့ဆုံမှုအပြီး တွေ့ဆုံခဲ့သောရလာဒ်များကိုမူတည်ကာ တိုးတက်မှုအခြေအနေများကို မည်သို့တိုးတက်ရေးကို တိုးမြှင့်ဆောင်ရွက်နိုင်ရန် ဆွေးနွေးခဲ့ကြောင်း ပြောကြားသည်။
"ပထမဦးဆုံးအနေနဲ့က ကူးသန်းရောင်းဝယ်ရေးနဲ့ ရင်းနှီးမြှုပ်နှံမှုကိစ္စ၊ စွမ်းအင်၊ သယ်ယူပို့ဆောင်ရေး၊ ကာကွယ်ရေးဆိုင်ရာ ပူး ပေါင်းဆောင်ရွက်ရေးကိစ္စ၊ အာကာသနှင့် အဏုမြူဆိုင်ရာ ပူးပေါင်းဆောင်ရွက်ရေးကိစ္စ ဒါတွေကို ကျွန်တော်တို့ဆွေးနွေးနိုင်ခဲ့တာရှိပါတယ်" ဟု ပြောကြားသည်။
ကာဇက်စတန်သမ္မတနှင့် ဒုတိယအကြိမ်ဆွေးနွေးခြင်းဖြစ်ကာ ကာဇက်စတန်နှင့် မြန်မာသည် သံတမန်ဆက်ဆံမှု ၂၆ နှစ်ရှိပြီး ၂၆ နှစ်ပြည့်ပြီး နောက်ရက်တွင် ယင်းနိုင်ငံသို့ ရောက်ခဲ့ခြင်း ဖြစ်ကာ ကာဇက်စတန်သမ္မတ ကလည် အဆိုပါအချက်ကို အလေးထားပြောကြားပြီး မြန်မာနိုင်ငံ ခေါင်းဆောင်တစ်ဦးအနေဖြင့် ပထမဆုံး လာသည့်ခရီးစဥ်ဖြစ်ကာ New Step ခြေလှမ်းသစ်တစ်ခုကို စခဲ့ခြင်းဖြစ်သည်ဟု ပြောကြောင်းလည်း ပြောကြားသည်။
"နှစ်ဖက် ပူးပေါင်းဆောင်ရွက်ရေးနယ်ပယ်တွေမှာ စီးပွားရေးအရ ပူးပေါင်းဆောင်ရွက်ရေး၊ နောက်တစ်ခါ ရင်းနှီးမြှုပ်နှံမှုကိစ္စရပ်တွေ၊ သိပ္ပံနှင့်နည်းပညာ ကိစ္စ ရပ်တွေ၊ ပညာရေးဆိုင်ရာပူးပေါင်းဆောင်ရွက်မှုတွေ၊ ကျန်းမာရေးဆိုင်ရာ ပူးပေါင်း ဆောင်ရွက်ရမယ့်ကိစ္စရပ်တွေ ဒါတွေ ကျွန်တော်တို့ ပြောဆိုဆွေးနွေးနိုင်ခဲ့တာ ရှိပါတယ်" ဟု ပြောကြားသည်။
ယခူခရီးစဥ်သည် အောင်မြင်သော ခရီးစဥ် ဖြစ်ကြောင်းလည်း ပြောကြားသည်။
"အောင်မြင်တဲ့ ခရီးစဉ်ပါခင်ဗျာ။ ကျွန်တော်တို့က သွားတဲ့အချိန်မှာ အဏုမြူကိစ္စနဲ့ပတ်သက်ပြီး ပူးပေါင်းဆောင်ရွက်ရေး သဘောတူညီချက် လက်မှတ်ရေးထိုးနိုင် ခဲ့တယ်။ နောက်တစ်ခါ အာကာသနဲ့ ပတ်သက်တဲ့ ပူးပေါင်းဆောင်ရွက်ရေး သဘော တူညီချက် လက်မှတ်ရေးထိုးနိုင်ခဲ့တယ်။ အဲ့တာလည်း နိုင်ငံအတွက် ခြေလှမ်းသစ်တွေ စပြီး ချလိုက်တာပေါ့။ နောက်တစ်ခုက ကာဇက်စတန် နိုင်ငံပေါ့။ ကာဇက်စတန် နိုင်ငံက တရားဝင် လွတ်လပ်ရေးရတာတော့ ၁၉၉၁ ခုနှစ် နောက်ပိုင်းကြမှ လွတ်လပ် ရေး ရတာပါ။ ဒါပေမယ့် သမိုင်းကြောင်းအခြေခံက အများကြီး ကိပါတယ်။ သူရဲ့ လူသားအရင်းအမြစ် သဘာဝအရင်းအမြစ်တွေကို အသုံးချပြီး လုပ်တဲ့အခါမှာ အခုတိုး တက်မှုတွေက မျက်ဝါးထင်ထင် မြင်ရတာပေါ့။ ဒီလိုပဲ အက်စတာနာမြို့တော် တည်လာတာ ကျွန်တော်တို့ နေပြည်တော်ထက် နည်းနည်းလေးပဲ စောပါတယ်။ မြေအနေအထားပေးတဲ့အတွက်ကြောင့် တည်ဆောက်ရေးက အားရ အတုယူစရာတွေ တွေ့တာပေါ့။ ကျွန်တော် သွားကြည်ခဲ့ပါတယ်။ ကျွန်တော်တို့နိုင်ငံလည်း ဒီလိုမျိုး တိုးတက်တဲ့ မြို့ပြ တည်ဆောက်မှုတွေ ဘယ်လိုလုပ်ကြမလဲဆိုတာလည်း စဉ်းစား လုပ်ကိုင်လို့ ရတာပေါ့။ ဒါကလည်း အောင်မြင်မှုလို့ ကျွန်တော် ပြောချင်ပါတယ်" ဟု ပြောကြားသည်။
Credit - NP News Agency
#သတင်းဟင်းလေးအိုးကြီး
