ကန်ချနဘူရီပြည်နယ် မြန်မာအလုပ်သမား ၂၈ ဦးလိုက်ပါလာသည့်ကား လမ်းဘေးကျပြီး ဖမ်းခံရ
စက်တင်ဘာ - ၂၉
ထိုင်းနိုင်ငံသို့ တရားမဝင် ဝင်ရောက်လာသူ မြန်မာအလုပ်သမား ၂၈ ဦးလိုက်ပါလာတဲ့ ကားတစ်စီး စစ်ဆေးရေးဂိတ်ကို အရှိန်ပြင်းစွာဖြတ်သန်းပြီးနောက် လမ်းဘေးမြောင်းထဲ ထိုးကျကာ ဖမ်းဆီးခံခဲ့ရတယ်လို့ သိရပါတယ်။
ယနေ့ စက်တင်ဘာ ၂၉ ရက်နေ့ နံနက် ၁ နာရီကျော်အချိန်က မြန်မာအလုပ် သမား ၂၈ ဦးပြည့်ကြပ်စွာ လိုက်ပါလာတဲ့ကားမှာ ကန်ချနဘူရီပြည်နယ် ထောင်းဖာဖုမ်မြို့နယ် လမ်းဆုံ စစ်ဆေးရေးဂိတ်တစ်ခုတွင် ရပ်တန့်ခိုင်းသော်လည်း မောင်ပြေးခဲ့တာဖြစ်ပါတယ်။
ရဲတပ်ဖွဲ့က လိုက်လံ ဖမ်းဆီးရာ မောင်းပြေးတဲ့ကားမှာ အခြားကားတစ်စီးနဲ့ တိုက်မိပြီး လမ်းဘေး ရေမြောင်းထဲသို့ ထိုးကျသွားခဲ့ပြီး ယာဉ်မောင်းကတော့ ထွက်ပြေးသွားခဲ့ပါတယ်။
ကားအတွင်းတွင် အထောက်အထားစာရွက်စာတမ်းမပါရှိတဲ့ မြန်မာနိုင်ငံသား အမျိုးသား ၁၉ ဦးနှင့် အမျိုး သမီး ၉ ဦး စုစုပေါင်း ၂၈ ဦးလုံးကို ဖမ်းဆီးခံခဲ့ရပါတယ်။
ကားပေါ်တွင် လိုက်ပါလာကြတဲ့ မြန်မာနိုင်ငံသားများ ပြင်းထန်စွာ ဒဏ်ရာရခြင်း မရှိခဲ့ကြောင်း ရဲတပ်ဖွဲ့က ပြောကြားထားပါတယ်။
မြန်မာနိုင်ငံသားများသည် စံခလဘူရီမှနယ်စပ်ဖြတ်ကျော် ဝင်ရောက်ခဲ့ကြပြီး ဘန်ကောက် စမွတ်စာခွန် စမွတ်ဆွန်ခရမ် နဲ့ ချာချိုင်းဆောင်တို့တွင် အလုပ်လုပ်ကိုင်ရန်အတွက် ပွဲစားတွေနဲ့ချိတ်ဆက်ပြီး ထွက်ခွာ လာသူတွေ ဖြစ်တယ်လို့ သိရပါတယ်။
ပွဲစားကို တစ်ဦးလျှင် ဘတ် ၁၈,၀၀၀ မှ ၂၀,၀၀၀ ကြား ပေးချေခဲ့ရပြီး မြန်မာ အလုပ်သမား ၂၈ ဦးကို ဥပဒေ အရအရေးယူရန် ထောင်းဖာဖုမ် ရဲစခန်းသို့ ပို့ဆောင်ထားတယ်လို့ ထိုင်းသတင်းက ဖော်ပြထားပါတယ်။
