"The Great Attractor "
ကျွန်တော့် မိတ်ဆွေများ တစ်ကနေ ငါးအထိ ကို မျက်စိမှိတ်ပြီး ရေကြည့်လိုက်ပါ။
မျက်လုံးပြန်ဖွင့်လိုက်တဲ့အခါ မှာ ကျွန်တော်တို့ရဲ့ဘေးပတ်ဝန်းကျင်မှာ ပြောင်းလဲမှု ကြီးကြီးမားမားတွေ့ရမှာမဟုတ်ပေမယ့် တကယ်တမ်းတော့ ကျွန်တော်တို့ဟာ ဒီလောက်အချိန်လေးအတွင်းမှာပဲ အာကာသထဲမှာ မိုင်နှစ်ထောင်ကျော်ခရီးနှင်ပြီးပါပြီ။
ဘာကြောင့် ဒီလောက်အချိန်တိုလေးအတွင်းမှာ မြန်မြန်ရွေ့နေသွားနေရတာလဲ?
ကျွန်တော်တို့ ကမ္ဘာအပါအဝင် နေအဖွဲ့ အစည်း ပါဝင်နေတဲ့ Milky way ဂလက်ဆီ တစ်ခုလုံးဟာ the great attractor လို့ခေါ်တဲ့ နေရာတစ်ခု ရဲ့ ဒြပ်ဆွဲအား gravity ကြောင့် သူ့ဆီကို အတူတူ ရွေ့နေလို့ဖြစ်ပါတယ်။
ဒီနေရာက ကမ္ဘာကနေ အလင်းနှစ် သန်း ၁၅၀-၂၅၀ လောက်ကွာတဲ့နေရာတစ်ခုမှာရှိနေပြီးတော့ ကျွန်တော်တို့ ဂလက်ဆီကြီးအပါအဝင် တစ်ခြား အိမ်နီးနားချင်း ဂလက်ဆီတွေဟာလည်း ကျွန်တော်တ်ို့နဲ့အတူတူ သူ့ဆီကို ရွေ့နေကြပါတယ်။
အာကာသ ထဲမှာသေချာပြောနိုင်တာတစ်ခုကတော့ ဘယ်သူမှ ငြိမ်ငြိမ်မနေနေဘူးဆိုတာပါ။ ဒီစာကိုထိုင်ရေးနေတဲ့ ကျွန်တော်ကော ဖတ်နေတဲ့ လူတွေ အပါအဝင် အားလုံးဟာ ငြိမ်နေတယ်လို့ထင်ရပေမယ့် တကယ်တမ်းတော့ မဟုတ်ပါဘူး။
ကမ္ဘာဟာ တစ်နာရီကို မိုင်၁၀၀၀ ခန့်နှုန်းနဲ့ သူ့ဝင်ရိုးအပေါ်မှာသူလည်ပတ်နေပါတယ်။
ဒါ့အပြင် ကမ္ဘာဟာထပ်ပြီးတော့ နေကိုလည်း တစ်နာရီကို မိုင် ၆၇၀၀၀ နှုန်းနဲ့ လှည့်ပတ်နေပြန်ပါသေးတယ်။
ဒါ့တောင် နေ့အဖွဲ့အစည်းအတွင်းမှာ ရွေ့နေကြတဲ့အလျင်တွေကိုပဲတွက်ထားတာပါ။စကြာဝဠာကြီးရဲ့ပြန့်ကားနှုန်းတွေ the great attractor ရဲ့ ဆွဲငင်နေမှု နဲ့ ဂလက်ဆီတွေအချင်းချင်းကြားက ဒြပ်ဆွဲအားသက်ရောက်မှုတွေကို မတွက်ရသေးပါဘူး။
၁၉၇၀ ပြည့်နှစ် လွန်တွေမှာ ပြသာနာတစ်ခုပေါ်လာပါတယ်။အဲ့တာက နက္ခတ်တာရာပညာရှင်တွေဟာ ဂလက်ဆီတွေရဲ့ redshift
( အနီရောင်ပြောင်းလဲမှု / ဂလက်ဆီတွေဆီကလာတဲ့ အလင်းတန်းဟာ ဝေးလေလေ ပိုပြီးတော့ လှိုင်းအလျားရှည်လာလေလေဖြစ်ပါတယ် အဲ့တာကြောင့်သူတို့ဆီက လာတဲ့ အလင်းတွေက အနီဘက်ကိုပိုသန်းနေပါတယ်။သူတို့ရဲ့အလင်းမှာ အနီရောင်ဘယ်လောက်များလည်းဆိုတာမူတည်ပြီး သူတို့ ရဲ့အကွာအဝေးကိုတိုင်းတာတာပါ။) ကိုတိုင်းကြည့်တဲ့အခါ ကျွန်တော်တို့တွေရဲ့ အနားက ဂလက်ဆီ တွေအားလုံးဟာ တစ်စက္ကန့်ကို မိုင်၄၀၀ လောက်နဲ့ Triangulum Australe Constellation နေရာကို ရွှေ့နေကြလို့ပါ။
ဒီနေ့ရာဟာ the great attractor ရှိတယ်လို့ ယူဆရတဲ့နေရာဖြစ်ပါတယ်။
ခက်တာက အဲ့တုန်းကနည်းပညာကြောင့် The great attractor ကို တယ်လီစကုတ်တွေနဲ့ လှမ်းကြည့်လို့မရပါဘူးသူနဲ့ ကျွန်တော်တို့ရဲ့ ကမ္ဘာကြားမှာ Milky way galaxy ကြီးက ခံနေပြီး ဖုန်မှုန့်နဲ့ တစ်ခြားအရာဝတ္တုတွေ အပြည့်ဖြစ်နေတဲ့ မမြင်ရတဲ့ နေရာ ( zone of avoidance ) ကခံနေလို့ပါ။
၁၉၈၆ ခုနစ်ကြမှ ဒီနေရာကို XRay astronomy ပညာပေါ်လာတော့မှ အကြမ်းဖျဉ်းဒီနေရာရဲ့အကြောင်းကို သိလာရပါတယ်။
အခုလောလောဆယ် လေ့လာတွေ့ထားတာကတော့ ဒီလိုပါ။
ကျွန်တော်တို့ရဲ့ milky way ဂလက်ဆီကြီးနဲ့ တစ်ခြား အိမ်နီးနားချင်းဂလက်ဆီတွေအားလုံးဟာ Virgo cluster လို့ခေါ်တဲ့ ဂလက်ဆီ cluster တစ်ခုဆီကို ရွေ့နေပါတယ်။ အဲ့ cluster ကြီးကလည်း နောက်ထပ် Virgo super cluster လို့ခေါ်တဲ့ပိုကြီးတဲ့ နောက်ထပ် cluster ကြီးတစ်ခုဆီကိုရွေ့နေတာပါ။ဒီ Virgo super cluster ကြီးကလည်း နောက်ထပ်သူ့ထက်ကြီးတဲ့ Laniakea cluster ကြီးဆီကို ရွေ့နေတာပါ။
The great attractor ကတော့ Laniakea ရဲ့ အလယ်ဗဟိုမှာရှိနေပါတယ်။သူကိုယ်တိုင်ကလည်း နောက်ထပ် Shapley super cluster လို့ခေါ်တဲ့ အခြားဂလက်ဆီတွေပိုပြီးများပြားစွာစုစည်းတည်ရှိနေတဲ့ နေရာတစ်ခုဆီကို ရွေ့နေပါသေးတယ်။
The great attractor က ဘာလည်းဆိုတော့ တစ်ချို့တွေပြောနေတဲ့ တွင်းနက်ကြီးတွေ ကြယ်တာရာတွေ ဂလက်ဆီတွေ မဟုတ်ပဲ Gravitational anomaly လို့ခေါ်တဲ့ ဒြပ်ဆွဲအားတွေ စုစည်းပြီးဖြစ်နေတဲ့ဗဟိုချက်တစ်ခုပါ။
ထောင်ပေါင်းများစွာ ရှိတဲ့ဂလက်ဆီတွေ အတူတူစုနေကြတဲ့ နေရာကြီးတစ်ခုဖြစ်တာမို့ ဒီနေရာရဲ့ ဆွဲငင်အား က ကျွန်တော်တို့ကို ဆွဲငင်နေတာပါ။တွင်းနက်တွေလိုမျိုးတွေနဲ့တော့မတူပါဘူး။
သူ့ဆီကိုကျွန်တော်တို့က ရွေ့နေတယ်ဆိုပေမယ့် ပိုစိတ်ဝင်စားဖို့ကောင်းတာက သူ့ဆီကို ဘယ်တော့မှ ရောက်သွားမှာမဟုတ်တာပါ။
ဘာကြောင့်လည်းဆိုတော့ စကြာဝဠာကြီးကိုယ်တိုင်ကလည်းပြန့်ကားနေပြီး ဂလက်ဆီတွေ အချင်းချင်းကြားကအကွာအဝေးတွေက တစ်ချိန်မှာ အခုဝေးနေတာထက် ပိုဝေးသွားမှာမလို့ပါ။ဒါဆိုဒီဂလက်ဆီတွေ စုစုစည်းစည်းနေနေကြတဲ့ Cluster ကြီးကလည်း ကွဲပြန့်သွားမှာမလို့ ကျွန်တော်တို့ကို ဆက်ပြီးမဆွဲငင်နေနိုင်တော့ပါဘူး။
အခုလောလောဆယ်မှာတော့ သူ့ဆီကိုရွေ့နေပေမယ့် နောက် နှစ်ပေါင်း ဘီလျံများစွာကြာတဲ့အခါ မှာ Dark energy လို့ခေါ်တဲ့ အရာရဲ့သက်ရောက်မှုကြောင့် ဘယ်တော့မှ the great attractor ဆီမရောက်နိုင်ပဲ ကျွန်တော်တို့ဟာ ပိုဝေးကွာသွားကြမှာပဲဖြစ်ပါတယ်။