မလေးရှားမှာ မြန်မာရွှေ့ပြောင်းလုပ်သားတွေအပါအဝင် တရားမဝင်ရွှေ့ ပြောင်းလုပ်သား ၆၅၀ ကျော် ထိန်းသိမ်းခံခဲ့ရ
စက်တင်ဘာ ၂၆ - ၂ဝ၂၅
မလေးရှားနိုင်ငံ၊ဆလန်ဂေါပြည် နယ်၊ကလန်း Pulau Indah ကအော် ပရာစီဖမ်းဆီးမှုအတွင်းနိုင်ငံစုံကတရားမဝင်ရွှေ့ပြောင်းလုပ်သား ၆၆၂ ယောက်ထိန်းသိမ်းခံခဲ့ရပြီး အဲဒီအထဲမှာမြန်မာရွှေ့ပြောင်းလုပ် သားတွေလည်းပါဝင်ခဲ့တယ်လို့မလေးရောက်မြန်မာအသိုင်းအဝိုင်းတွေထံကနေ သိရပါတယ်။
ယခုတရားမဝင်ရွှေ့ပြောင်လုပ်သားဖမ်းဆီးမှုကိုတိုင်တန်းမှုတခုကြောင့်မလေးရှားလူဝင်မှုကြီးကြပ်ရေးဌာနနဲ့မလေးအာဏာပိုင်တွေကဦးဆောင်ပြီးတော့ယခုစက်တင်ဘာလ ၂၅ ရက်နေ့မှာပြုလုပ်ခဲ့တာဖြစ်တယ်လို့ဆိုပါတယ်။
"ထွက်ပြေးဖို့ကြိုးစားရင်တောင်မလွတ်နိုင်ဘူးဗျာ့။မနေ့က Pulau Indah အော်ပရာစီမှာဆိုရင်သူတို့က ဒရုန်းတွေနဲ့ကြည့်ပြီးဝင်ရောက်ဖမ်း ဆီးသွားတာပါ"လို့ မလေးရောက် မြန်မာနိုင်ငံသားတယောက်ကပြောပြပါတယ်။
မလေးရှားနိုင်ငံလူဝင်မှုကြီးကြပ် ရေးဌာနနဲ့ မလေးအာဏာပိုင်တွေဟာတရားမဝင်ရွှေ့ပြောင်းလုပ်သားတွေအများဆုံးနေထိုင်ရာရပ်ကွက်တွေနဲ့ အလုပ်လုပ်ကိုင်ရာနေရာတွေကိုအဓိကပစ်မှတ်ထားပြီးဝင်ရောက်ရှာဖွေဖမ်းဆီးခဲ့တာဖြစ်တယ်လို့လည်းမလေးရောက်မြန်မာရွှေ့ ပြောင်းလုပ်သားတွေကပြောပါတယ်။
ယခုအော်ပရာစီဖမ်းဆီးမှုအတွင်းမှာမြန်မာရွှေ့ပြောင်းလုပ်သားအများစုအပါအဝင်အခြားသောနိုင်ငံကရွှေ့ ပြောင်းလုပ်သားတွေအများစုပါဝင်ခဲ့ကြတာဖြစ်တယ်လို့ ဆိုပါတယ်။
ဒေသတွင်းသတင်းအချက်အလက်တွေအရ ဖမ်းဆီးမှုအတွင်းမှာရွှေ့ပြောင်းလုပ်သားစုစု ပေါင်း ၁၁၃၂ ယောက်ကိုစစ်ဆေးခဲ့ပြီးတဲ့နောက် ၆၆၂ ယောက်ကိုဖမ်း ဆီးခဲ့တာဖြစ်တယ်လို့မလေးရှားလူဝင်မှုကြီး ကြပ်ရေးဌာနကထုတ်ပြန်ပါတယ်။
အဲဒီအထဲမှာဘင်္ဂလားဒေ့ရှ်နိုင်ငံသား ၅၄၅ ယောက်၊မြန်မာနိုင်ငံသား ၃၆ ယောက်၊ပါကစ္စတန်နိုင်ငံသား ၃၅ ယောက်အပါဝင်နီပေါနိုင်ငံသား ၂၄ ယောက်နဲ့အိန္ဒိယနိုင်ငံသား ၁ဝ ယောက်တို့ပါဝင်တယ်လို့ သိရပါတယ်။
ဒါအပြင်စက်တင်ဘာ ၂၄ ရက်နေ့ကလည်း မလေးရှားနိုင်ငံလူဝင်မှုကြီးကြပ်ရေးဌာန(JIM)က Puchong၊ Selangor နဲ့ Kuala Lumpur ရှိ အနှိပ်ဆိုင်ခန်းတွေကိုဝင်ရောက်စီးနင်းခဲ့တယ်လို့ ဆိုပါတယ်။
အဲဒီစီနင်းမှုအတွင်းမှာမြန်မာအမျိုးသမီး ၅ ယောက်အပါအဝင် အနှိပ်ခန်းအလုပ်သမား ၂၈ ယောက်ကိုမလေးလူဝင်မှုကြီးကြပ်ရေးက ဖမ်းဆီးထားခဲ့တယ်လို့မလေးရောက်မြန်မာရွှေ့ပြောင်းအလုပ် သမားအရေးကိုကူညီဆောင်ရွက်သူတွေကပြောပါတယ်။
မလေးရှားနိုင်ငံလူဝင်မှုကြီးကြပ်ရေးဌာနအကြီးအကဲဖြစ်သူကတော့နိုင်ငံခြားသားတွေကိုအချိန်ပိုနေ ထိုင်ခွင့်နဲ့ တရားမ၀င်အလုပ်လုပ်ခွင့်မပြုဘူးလို့ပြောကြားထားကြောင်းဒေသတွင်းသတင်းတွေကဖော်ပြထားကြပါတယ်။
မလေးရှားနဲ့ ထိုင်းနိုင်ငံတို့ဟာတရားမဝင်ရွှေ့ပြောင်းလုပ်သားတွေအများဆုံးနေထိုင်အလုပ်လုပ် ကိုင်ကြတဲ့နိုင်ငံတွေလည်းဖြစ်ပါတယ်။
"သူတို့ကအထောက်အထားမဲ့နေတဲ့သူတွေကိုပိုဖမ်းတယ်။ဒါပေမဲ့တခါတလေအထောက်အထားရှိပေမယ့်လည်းဖမ်းချင်ဖမ်းသွားတယ်။အသွားအလာအနေအထိုင်တွေကအစအစစအရာရာဂရုစိုက်ပြီးတော့ပဲနေကြရပါတယ်"လို့ ထိုင်းနိုင်ငံရောက်မြန်မာရွှေ့ပြောင်းလုပ်သားတယောက်ကပြောပါတယ်။
ဒါအပြင်လက်ရှိမှာလည်းမလေးရှားနိုင်ငံနဲ့ ထိုင်းနိုင်ငံကိုတရားမဝင် လမ်းကြောင်းကနေမြန်မာရွှေ့ ပြောင်းလုပ်သားတွေအများအပြားဝင်ရောက်နေကြတယ်လို့လည်းရွှေ့ပြောင်းအလုပ်သမားအသိုင်း အဝိုင်းနဲ့ နီးစပ်သူတွေကပြောပါတယ်။
"မလေးအရောက်စက်ရုံအလုပ် အကိုင်အပြီးအစီးကိုသိန်း ၆ဝ၊သိန်း ၇ဝ ပေးရမယ်ပြောတယ်။အလုပ်ပါပေးမယ်၊ရှာပေးမယ်ပေါ့။သွားရတာကတော့နယ်စပ်ကနေအောက်လမ်းကပဲသွားရမယ်လို့ပြောတယ်။အဲဒီလိုပုံစံနဲ့သွားနေကြတဲ့သူတွေလည်းရှိပါတယ်"လို့ ရွှေ့ပြောင်းလုပ်သားအသိုင်းအဝိုင်းနဲ့ နီးစပ်သူ
တယောက်က ပြောပါတယ်။
ဒါအပြင်ယခုကာလအပိုင်း အခြားအတွင်းမှာမလေးရှားနဲ့ ထိုင်းနိုင်ငံအတွင်းမှာအဖမ်းအဆီးတွေများပြားနေတဲ့အတွက်ရွှေ့ပြောင်းလုပ်သားတွေအနေနဲ့တရားမဝင် လမ်းကြောင်းကနေလာရောက်ခြင်းမပြုဖို့ကိုလည်းရွှေ့ပြောင်းအလုပ် သမားအရေးကူညီဆောင်ရွက်သူတွေကသတိပေးမေတ္တာရပ်ခံထားပါတယ်။
"သူများနိုင်ငံတွေက Passport PJ /PV တွေဘာမှမဖြစ်ဘူး။ကိုယ်နိုင်ငံက PJ တွေကို တရားဝင်ခေါ်စာရလို့ အလုပ်နဲ့တောင်ထွက်ဖို့ခက်နေတာ အလည်ဆိုပိုဝေးပါတယ်။Visa Free ရရင်တောင်သွားမရပါဘူး"လို့ မြန်မာနိုင်ငံသားတယောက်ကသူရဲ့အမြင်ကိုထပ်လောင်းမှတ်ချက်ပြုခဲ့ပါတယ်။
