အင်္ဂလန်နှင့် လီဗာပူးတိုက်စစ်မှူးဟောင်းဟတ်စကီးရဲ့ သား ၂ ဦး မန်စီးတီးအတွက် ပထမဆုံးပွဲ ကစားခွင့် ရရှိလာကြ
စက်တင်ဘာ ၂၅
မနေ့ညတုန်းက ဟက်ဒါဖီးလ်သို့ ရောက်လာကြတဲ့ မန်စီးတီးပရိသတ်များဟာ ထုံးစံအတိုင်း ကစားသမားဟောင်းရဲ့ သီချင်းကို သီဆိုတဲ့အနေဖြင့် ယာယာနှင့် ကိုလိုတိုရေး ညီနောင်နှစ်ဦးတို့ရဲ့ သီချင်းကို သီဆိုခဲ့ကြပါတယ်။ မန်စီးတီးပရိသတ်များဟာ ယော့ခ်ရှိုင်းယားမှာ နောင်ထပ် ညီနောင်နှစ်ဦးကို မြင်တွေ့ကြရလိမ့်မယ်လို့ လုံးဝ ထင်မှတ်မထားခဲ့ကြပါဘူး။
ဒါပေမဲ့ ဂွါဒီယိုလာဟာ လိဂ် ၁ ကလပ်ကို ၂-၀ ဂိုးဖြင့် အနိုင်ရချိန်မှာတော့ အရန်ခုံသို့ လှည့်ပြီး တိုက်စစ်သမား ညီနောင်နှစ်ဦးဖြစ်တဲ့ ရီဂန်နှင့် ဂျာဒန်ဟက်စကီးညီနောင်တို့ကို လူစားဝင်ရောက်ကစားဖို့ ပြောကြားလာပါတယ်။
ဒီညီနောင်နှစ်ဦးက အင်္ဂလန်နှင့် လီဗာပူးတိုက်စစ်မှူးဟောင်းအီမီလီဟတ်စကီးရဲ့ သား ဖြစ်ပါတယ်။
သူတို့ဟာ အရန်ခုံမှာ မန်စီးတီးနည်းပြအဖွဲ့ဝင် ယာယာတိုရေးက ဘယ်လို ကစားရမယ်ဆိုတာ ညွှန်ကြားမှု ရရှိခဲ့ပြီးနောက်မှာတော့ လူစားဝင်ရောက် ကစားခဲ့ကြပါတော့တယ်။
မန်စီးတီးပရိသတ်များဟာ ညီနောင်နှစ်ဦး မန်စီးတီးအတွက် ပထမဆုံးပွဲ ကစားတာကို မျက်ဝါးထင်ထင် မြင်တွေ့လာကြရပါတယ်။
ဂွါဒီယိုလာက "ဒီကနေ့ အကယ်ဒမီက ကစားသမား ၆ ဦး ပွဲထွက်လူစာရင်းမှာ ပါဝင်တယ်။ ဟက်စကီးညီနောင်တို့ နှစ်ဦးက အရန်အဖြစ် ဝင်ကစားတယ်။ သူတို့အဖေနဲ့အမေတို့ သူတို့လေးတွေအတွက် အရမ်းဂုဏ်ယူနေကြမှာပါ။ အရမ်းမိုက်တယ်"လို့ ပြောကြားသွားပါတယ်။
အသက် ၁၇ နှစ် အရွယ်ရှိ ညီဖြစ်သူ ရီဂန်ုကိ မန်စီးတီးဝက်ဘ်ဆိုက်မှာ "tricky, clinical winger"လို့ ဖော်ကျူးထားပြီး ၂ နှစ်ကြီးတဲ့ အစ်ကိုဖြစ်သူ ဂျာဒန်ကိုလည်း "mature, hard-working" box-to-box midfielder လို့ ဖော်ကျူးထားပါတယ်။
၎င်းတို့ ညီနောင်နှစ်ဦးဟာ မန်စီးတီးအကယ်ဒမီသို့ ၈ နှစ်သား အရွယ်ကတည်းက ရောက်လာပြီးတဲ့နောက် အကယ်ဒမီပွဲတွေမှာ ပုံမှန်မြင်နေရတဲ့သူတွေ ဖြစ်ပါတယ်။
ဂျာဒန်က မန်စီးတီးယူ-၂၁ အသင်းခေါင်းဆောင်ဖြစ်အဖြစ် ၂၀၂၄ ခုနှစ်တုန်းက လိဒ်ကို ၄-၀ ဂိုးဖြင့် အနိုင်ရတဲ့ FA Youth Cup ဆွတ်ခူးနိုင်အောင် ဦးဆောင်ခဲ့သူပါ။
သူတို့ ညီနောင်နှစ်ဦးက ကစားတဲ့ နေရာကွဲပြားပေမဲ့လည်း အရည်အချင်း အတူတူပဲလို့ ဖခင်ဖြစ်သူ ဟက်စကီးက ဆိုထားပါတယ်။
ဟတ်စကီးက "အငယ်ကောင်က အရမ်းမြန်တယ်။ အကြီးကောင်က ကျွန်တော့်လိုပဲ လူကောင်ကြီးတယ်။ သူတို့နှစ်ဦးလုံး အရည်အချင်းအတူတူပါ"လို့ ဆိုသွားပါတယ်။
ဟက်ဒါဖီးလ်နှင့်ပွဲမှာ ဂျာဒန်ဟာ ပွဲပြီးဖို့ ၁၄ မိနစ်အလိုမှာ အကယ်ဒမီကစားဖော် နီကိုအိုရိုင်လီအစား လူစားဝင်ရောက်ကစားခဲ့ပါတယ်။ နောက်မိနစ်အနည်းငယ်အကြာမှာ ရီဂန်က ဆာဗင်ဟိုအစား လူစားဝင်ကစားခဲ့ပါတယ်။
ဒီညီနောင်နှစ်ဦးဟာ အကောင်းဆုံး တိုးတက်နေမှုနှင့်အတူ အင်္ဂလန်တလွှား ကလပ်အများအပြားရဲ့ စိတ်ဝင်စားခြင်းခံနေရသူလည်း ဖြစ်ပါတယ်။
သူတို့ရဲ့ ဖခင်ဟတ်စကီးက လက်စတာအကယ်ဒမီသို့ အသက် ၉ နှစ် အရွယ်မှာ ရောက်လာပြီးတဲ့နောက် ၁၉၉၅ ခုနှစ်တုန်းက အသက် ၁၇ နှစ်အရွယ် ကျူပီအာနှင့်ပွဲမှာ ပထမဆုံးပရီးမီးယားလိဂ်ပွဲ ကစားခွင့်ရခဲ့ပါတယ်။
နောက်တစ်ရာသီမှာ လက်စတာသို့ တန်းဆင်းသွားရချိန်မှာတော့ ဟက်စကီးဟာ ပုံမှန်ကစားခွင့် ရလာခဲ့ပြီး ၃၅ ပွဲကစားခဲ့ရာမှာ ၇ ဂိုးသွင်းနိုင်ခဲ့ပါတယ်။
သူဟာ လက်စတာကို ပရီးမီးယားလိဂ်သို့ တန်းပြန်တက်အောင် ကူညီပေးခဲ့ကာ နည်းပြမာတင်အိုနေးလ်လက်ထက် ၁၉၉၇ နှင့် ၁၉၉၉ အတွင်း အောင်မြင်တဲ့ရာသီတွေ ပိုင်ဆိုင်ခဲ့ပါတယ်။
အရပ် ၆ ပေ၊ ၂ လက်မရှိ ဟက်စကီးဟာ လူကောင်းကြီးထွားပြီး ဗဟိုတိုက်စစ်မှူးဖြစ်ပါတယ်။ သူနှင့် အင်္ဂလန်တိုက်စစ်မှူးဟောင်းမိုက်ကယ်အိုဝင်တို့အတွဲက တကယ့်အတွဲကောင်း ဖြစ်ခဲ့ပါတယ်။
သူဟာ ၁၉၉၉ ခုနစ်မှာ အင်္ဂလန်အတွက် ပထမဆုံးပွဲကစားခွင့်ရပြီးတဲ့နောက် ၂၀၀၀ ခုနှစ်မှာ လီဗာပူးသို့ ပေါင် ၁၁ သန်းဖြင့် ပြောင်းခဲ့ပါတယ်။
သူဟာ အန်ဖီးလ်ပထမဆုံးရာသီမှာ ၅၆ ပွဲကစားခဲ့ရာမှာ ၂၂ ဂိုးသွင်းယူပြီး ယူရိုပါလိဂ်ဖလား၊ အက်ဖ်အေဖလား၊ လိဂ်ဖလားတို့ ဆွတ်ခူးခဲ့ပါတယ်။
သူဟာ လီဗာပူးမှာ ၅ ရာသီကြာ ကစားပြီးတဲ့နောက် ဘာမင်ဂမ်သို့ ပြောင်းခဲ့ကာ ၇၈ ပွဲတွင် ၁၆ ဂိုးသွင်းနိုင်ခဲ့ပါတယ်။
သူဟာ ဝီဂန်၊ ဗီလာတို့မှာ ကစားပြီးတဲ့နောက် ဩစတြေးလျကလပ် နယူးကာဆယ်ဂျက်သို့ ပြောင်းခဲ့ကစားခဲ့ပါတယ်။
သူဟာ ဘော်လ်တန်နှင့်အတူ ချန်ပီယံရှစ်မှာ ကစားရင်း ကစားသမားဘဝ အဆုံးသတ်ခဲ့ပါတယ်။
သူဟာ အင်္ဂလန်အတွက် ၆၂ ပွဲကစားခဲ့ရာမှာ ၇ ဂိုးသွင်းနိုင်ခဲ့ပြီး ကမ္ဘာ့ဖလား ၂ ကြိမ် ကစားခွင့်ရခဲ့ပါတယ်။
#ဘောလုံးသတင်းစုံ
