❝ကျားဖြန့်လုပ်ငန်းများမှ ဖမ်းမိထားသည့် ပြည်ပနိုင်ငံသား ၈ ဦးကို သက်ဆိုင်ရာနိုင်ငံများသို့ လွှဲပြောင်းပေးအပ်❞
စက်တင်ဘာ ၂၄
ကရင်ပြည်နယ် မြဝတီမြို့-ရွှေကုက္ကိုလ်၊ မဲ့ထော်သလေး(KK Park) နှင့် ကျောက်ခတ်နယ်မြေများတွင် အွန်လိုင်းလောင်းကစားမှုများ၊ အွန်လိုင်း လိမ်လည်မှုများ၊ ဒုစရိုက်မှုများ ကျူးလွန်ခဲ့ကြသည့် ပြည်ပနိုင်ငံသား ၈ ဦးကို စက်တင်ဘာ ၂၃ ရက်နေ့က သက်ဆိုင်ရာနိုင်ငံများသို့ ပြည်နှင်လွှဲပြောင်းပေးအပ်ခဲ့ကြောင်း သိရသည်။
အဆိုပါ ပြည်ပနိုင်ငံသား ၈ ဦးထဲတွင် ကင်ညာနိုင်ငံသား ၃ ဦး၊ အီသီယိုးပီးယား နိုင်ငံသား ၂ ဦး၊ နီပေါနိုင်ငံသား ၂ ဦးနှင့် ကင်မရွန်းနိုင်ငံသား ၁ ဦး ပါဝင်သည်ဟု သိရပြီး ၎င်းတို့ကို မြန်မာ-ထိုင်း အမှတ်(၂)ချစ်ကြည်ရေးတံတားမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ လွှဲပြောင်းပေးအပ်ခဲ့ခြင်းဖြစ်သည်။
နိုင်ငံတော်အနေဖြင့် Online Scam Center လုပ်ငန်းများတွင် ပါဝင်ပတ်သက်နေသူများနှင့် နောက်ကွယ်မှ ကြိုးကိုင်သော နိုင်ငံခြားသားများကို ဖော်ထုတ်ဖမ်းဆီးလျှက်ရှိရာ ၂၀၂၅ ခုနှစ် ဇန်နဝါရီ ၃၀ ရက်မှ စက်တင်ဘာ ၂၃ ရက်အထိ ပြည်ပနိုင်ငံသားပေါင်း ၉၄၀၄ ဦးအထိ ဖမ်းဆီးနိုင်ခဲ့ပြီးဖြစ်သည်။
၎င်းတို့အနက်မှ ၉၃၁၃ ဦးကို ထိုင်းနိုင်ငံမှတစ်ဆင့်သက်ဆိုင်ရာ နိုင်ငံများသို့ ဥပဒေလုပ်ထုံး လုပ်နည်းများနှင့်အညီ စနစ်တကျပြည်နှင်လွှဲပြောင်းပေးခဲ့ပြီးဖြစ်သလို ကျန်ရှိသည့် ပြည်ပနိုင်ငံသား ၉၁ ဦးကိုလည်း လွှဲပြောင်းပေးရန် အသင့်ဖြစ်နေပြီဖြစ်ကြောင်း သိရသည်။
#centralnewsnaypyitaw
