ပယ်စောက်ချိန် မိသားစုအပါအဝင် တရုတ်ကျားဖြန့်တရားခံ ၂၁ ဦးကို လူသတ်မှုနှင့် အွန်လိုင်းလိမ်လည်မှုများဖြင့် တရုတ်နိုင်ငံတွင် တရားရုံးတင် စစ်ဆေးခဲ့ပြီး မကြာမီ စီရင်မည်

စက်တင်ဘာ ၂၃

တရုတ်နိုင်ငံတောင်ပိုင်းရှိ တရားရုံးတစ်ခုတွင် မြန်မာနိုင်ငံမြောက်ပိုင်း၊ ကိုးကန့်ဒေသတွင် လှုပ်ရှားသော ပယ်မိသားစု ရာဇဝတ်ဂိုဏ်းမှ အဖွဲ့ဝင် ၂၁ ဦးကို တရုတ်ကျားဖြန့် အွန်လိုင်းလိမ်လည်မှု၊ လူသတ်မှု၊ ရည်ရွယ်ချက်ရှိရှိ နာကျင်စေမှု၊ ပြန်ပေးဆွဲမှု၊ အဓမ္မငွေညှစ်မှု၊ ကာစီနိုလောင်းကစားရုံဖွင့်လှစ်မှု၊ ပြည့်တန်ဆာလုပ်ငန်းများ တည်ထောင်ပြီး အဓမ္မစေခိုင်းမှု၊ တရားမဝင် ဖမ်းဆီးထိန်းသိမ်းမှု၊ မူးယစ်ဆေးဝါးမှောင်ခိုနှင့် ထုတ်လုပ်မှု စသည့် စွဲချက်များဖြင့် တရားစွဲဆိုစစ်ဆေးခဲ့သည်။

​အဓိကအမှုဖြစ်သည့် အဆိုပါ ပယ် ရာဇဝတ်ဂိုဏ်းကို ပထမအကြိမ် တရားရုံးစစ်ဆေးမှုအား စက်တင်ဘာလ ၁၉ ရက်မှ ၂၂ ရက်အထိ ကွမ်တုံပြည်နယ်ရှိ ရှန်ကျန်းမြို့ အလယ်အလတ်တန်းစားပြည်သူ့​တရားရုံးတွင် ပြုလုပ်ခဲ့သည်။

​ရှန်ကျန်းမြို့ ပြည်သူ့ရှေ့နေရုံးကမူ ဂိုဏ်းခေါင်းဆောင်များဖြစ်သည့် ပယ်စောက်ချိန်နှင့် သားဖြစ်သူ ပယ်ရင်ချန် ဦးဆောင်သော ဂိုဏ်းဝင်များသည် ၂၀၀၉ ခုနှစ် ဩဂုတ်လကတည်းက မြန်မာနိုင်ငံ ကိုးကန့်ဒေသရှိ ပယ်မိသားစု၏ သြဇာအာဏာကို အလွဲသုံးစားလုပ်ကာ အဆောက်အအုံ ၄၁ ခု တည်ဆောက်ခဲ့ပြီး တရားမဝင်စီးပွားရေးလုပ်ငန်းများ လုပ်ကိုင်သူများကို လက်နက်ဖြင့် အကာအကွယ်ပေးခဲ့သည်ဟု စွပ်စွဲခဲ့သည်။

​အဆိုပါဂိုဏ်းသည် ၎င်းတို့ ကာကွယ်ပေးထားသူများနှင့် ပူးပေါင်းပြီး တရုတ်ကျားဖြန့် အွန်လိုင်းလိမ်လည်မှု၊ ရည်ရွယ်ချက်ရှိရှိ လူသတ်မှု၊ နာကျင်စေမှု၊ ပြန်ပေးဆွဲမှု၊ အဓမ္မငွေညှစ်မှု၊ ကာစီနို လောင်းကစားရုံဖွင့်လှစ်မှု၊ တရားမဝင်နယ်စပ်ဖြတ်ကျော်မှုများ ကျူးလွန်မှု၊ ပြည့်တန်ဆာလုပ်ငန်းများ တည်ထောင်ပြီး အဓမ္မစေခိုင်းမှု စသည့် ရာဇဝတ်မှုများကို ကျူးလွန်ခဲ့ကြောင်း စွပ်စွဲခံထားရသလို ထိုကျူးလွန်မှုများကြောင့် တရုတ်နိုင်ငံသား ၆ ဦး သေဆုံးကာ အများအပြား ဒဏ်ရာရရှိခဲ့သည်ဟုလည်း စွပ်စွဲထားသည်။ အဆိုပါ လောင်းကစားနှင့် လိမ်လည်မှုတို့မှ ရရှိသော ငွေကြေးပမာဏမှာ ယွမ်ဘီလျံ ၂၀ (အမေရိကန်ဒေါ်လာ ၂ ဒသမ ၈ ဘီလျံကျော်) ကိုပင် ကျော်လွန်ကြောင်း ပြည်သူ့ရှေ့နေရုံးက ပြောသည်။

​ပယ်ရင်ချန်သည်လည်း အခြားသူများနှင့် ပူးပေါင်းကာ မက်သာဖက်တမင်း (စိတ်ကြွဆေး) ၁၁ တန်ခန့်ကို မှောင်ခိုသွင်းကာ ထုတ်လုပ်ခဲ့သည်ဟုလည်း စွပ်စွဲခဲ့သည်။

ပယ်မိသားစု တရားခံ ၂၁ ဦးအပေါ် ​စီရင်ချက်ကိုမူ နောက်ပိုင်းရက်စွဲတစ်ခုတွင် ကြေညာမည်ဖြစ်သည်။

​တရားရုံးကြားနာမှုများကို ပြည်သူ့ကွန်ဂရက်ကိုယ်စားလှယ်များ၊ နိုင်ငံရေးအကြံပေးများ၊ တရားခံများ၏ ဆွေမျိုးများနှင့် ပြည်သူအများအပြား အပါအဝင် လူ ၁၀၀ ကျော် တက်ရောက်ခဲ့သည်။

Ref, Xunhua

Credit - Myanmar Transparency News Agency

#centralnewsnaypyitaw