#နတ်ပြည်ကို_အထင်မကြီးနဲ့
~~~~~~~~~~~~~~~~~~~~
ဆားတောင်ဆရာတော်ကြီး အနာဂါမ် ဖြစ်ပြီးတဲ့နောက် တစ်ညမှာ နတ်သားတစ်ပါးက ဆရာတော်ကြီးကို လာရောက် ဖူးမျှော်ပါတယ်။
#ဆရာတော်
- ဘာကိစ္စကြောင့် လာသနည်း ?
#နတ်သား
- မှန်လှပါ၊ လူ့ဘဝက တော်စပ်ခဲ့ဘူးသော ဆရာတော်၏ မယ်တော် ဖြစ်ကြောင်းပါ ဘုရား။
#ဆရာတော်
- ဘယ်ကုသိုလ်ကြောင့် နတ်ပြည်သို့ ရောက်သနည်း ?
#နတ်သား
- မှန်လှပါ၊ လူ့ဘ၀မှ စုတေရာ ပြိတ္တာဘုံသို့ ရောက်ရှိကြောင်း၊ သားတော် ဆရာတော်၏ နေ့စဉ် ပို့သသော မေတ္တာ၊ ပေးဝေသော အမျှကို ရသဖြင့် ဝဋ်ကြွေးများ ကြေကုန်ရာ ယာမာနတ်ပြည်သို့ ရောက်ရှိပြီး နတ်သား ဖြစ်နေကြောင်း လျှောက်ထားလေသည်။
ယခုဘ၀ မယ်တော်က လျှောက်ထား၍ သူ၏ မေတ္တာအားကြောင့် နတ်သားဖြစ်ကြောင်း သိရသဖြင့် ဆရာတော်ကြီးမှာ ဝမ်းမြောက်ဝမ်းသာ ဖြစ်ရတော့သည်။
#ဆရာတော်
- ဒါယကာကြီး၊ တရား အားထုတ်ပါလား။ တရား အားထုတ်ရင် သံသရာကနေ လွတ်မြောက်နိုင်ပါတယ်။
#နတ်သား
- မှန်လှပါ ဘုရား။ တရားကို ကြိုးစားပြီး အားထုတ်လျှင် တရားထူးရနိုင်မှန်း သိသော်လည်း အရှင်ဘုရားထံ ရောက်ရှိစဉ်သာ တရားကို သတိရပြီး နတ်ပြည်သို့ ပြန်ရောက်လျှင် ကိလေသာအာရုံ အလွန်များသဖြင့် တရားကို သတိမရ၊ အားမထုတ်နိုင်ကြောင်း လျှောက်ထားပါသည်။
နတ်ပြည်ရောက်မှ တရား အားထုတ်ဖို့ စိတ်ကူးထားသူများ သတိပြုဖွယ် ကောင်းလှပါ၏။
🙏ဆားတောင်ဆရာတော်ကြီး၏ ထေရုပ္ပတ္တိနှင့် ကိုယ်တွေ့ ဖြစ်ရပ်ဆန်းများ🙏
