#ယနေ့ထုတ်သတင်းစာ_နိုင်ငံတကာသတင်း
◼ ဂျပန်နိုင်ငံရေးပါတီတစ်ခု အေအိုင်ဆော့ဖ်ဝဲကို ခေါင်းဆောင်သစ်အဖြစ် တင်မြှောက်မည်
ဂျပန်နိုင်ငံမှ နိုင်ငံရေးပါတီသစ်တစ်ခုသည် စတင်တည်ထောင်သူပါတီခေါင်းဆောင်နုတ်ထွက်ခဲ့ပြီးနောက် ပါတီခေါင်းဆောင်သစ်အဖြစ် လူ့ဉာဏ်ရည်တုနည်းပညာ(အေအိုင်) ဆော့ဖ်ဝဲတစ်ခုကိုတင်မြှောက်မည်ဖြစ်ကြောင်း ဂျပန်မီဒီယာများက စက်တင်ဘာ ၁၇ ရက်တွင် သတင်းထုတ်ပြန်ထားသည်။
ပြန်လည်မွေးဖွားခြင်းလမ်းစဉ် အမည်ရှိအဆိုပါနိုင်ငံရေးပါတီသည် ဂျပန်နိုင်ငံအနောက်ပိုင်းမြို့ငယ်တစ်မြို့မှ မြို့တော်ဝန်ဟောင်း ရှင်ဂျီအီရှီမာရုက ယခုနှစ်ဇန်နဝါရီလတွင် တည်ထောင်ခဲ့ခြင်းဖြစ်သည်။
သို့ရာတွင် ယခုနှစ်အတွင်းကျင်းပခဲ့သော ဂျပန်အထက်လွှတ်တော်ရွေးကောက်ပွဲ၌ အမတ်နေရာတစ်နေရာမှမရဘဲ အရေးနိမ့်ခဲ့ပြီးနောက် ရှင်ဂျီအီရှီမာရုသည် ပြန်လည်မွေးဖွားခြင်းလမ်းစဉ်ပါတီဥက္ကဋ္ဌအဖြစ်မှ နုတ်ထွက်သွားခဲ့သည်။
သို့ဖြစ်ရာ ရှင်ဂျီအီရှီမာရု၏ နေရာတွင် ပါတီခေါင်းဆောင်သစ်အဖြစ် အေအိုင်ဆော့ဖ်ဝဲတစ်မျိုးကို ထားရှိမည်ဖြစ်ကြောင်း ပြန်လည်မွေးဖွားခြင်း လမ်းစဉ်ပါတီတာဝန်ရှိသူများက ပြောကြားထားသည်။
ပါတီခေါင်းဆောင်သစ် အေအိုင်ဆော့ဖ်ဝဲနှင့် ပတ်သက်၍ မည် သည့်အချိန်တွင် မည်သို့အကောင်အထည်ဖော်မည်ဆိုသော အချက်အပါအဝင် အသေးစိတ်အချက်အလက်များကို ပြန်လည်မွေးဖွားခြင်းလမ်းညွှန်ပါတီက ထုတ်ဖော်ပြောကြားခြင်း မရှိပေ။
ပါတီခေါင်းဆောင် အေအိုင်ဆော့ဖ်ဝဲအနေ ဖြင့် ပါတီဝင်များ၏ နိုင်ငံရေးလှုပ်ရှားမှုများကို ကိုင်တွယ်မည်မဟုတ်ဘဲ ပါတီတွင်းဆုံးဖြတ်ချက်များ ချမှတ်ရေးကိုအဓိကတာဝန်ယူမည် ဖြစ်ကြောင်း သိရသည်။
ပြန်လည်မွေးဖွားခြင်းလမ်းစဉ်ပါတီသည် မီဒီယာများ၏ အာရုံစိုက်မှုရရှိထားသော်လည်း ယခုနှစ်ဇွန်လအတွင်း ကျင်းပခဲ့သော ဂျပန်အထက်လွှတ်တော်ရွေးကောက်ပွဲ၌ အမတ်လောင်း ၁ဝ ဦး ဖြင့် ပါဝင်ယှဉ်ပြိုင်ခဲ့ရာ ၁ဝ ဦးစလုံး အရေးနိမ့်ခဲ့ရသည်။
ပုံစာ - အေအိုင်စနစ်ကို ပါတီခေါင်းဆောင်အဖြစ် ထားမည့်အစီအစဉ်ကို ပြန်လည်မွေးဖွားခြင်းလမ်းစဉ်ပါတီတာဝန်ရှိသူတစ်ဦးက ပြောကြားစဉ်။
ဂျပန်တိုင်းမ်
