18h
·
◾️ငမိုးရိပ်တံတားပေါ်မှခုန်ချခဲ့သည့် အမျိုးသမီးရုပ်အလောင်းပြန်တွေ့
ရန်ကုန်တိုင်း၊ သင်္ဃန်းကျွန်းမြို့နယ်၊ ငမိုးရိပ်တံတားပေါ်မှခုန်ချခဲ့သည့် အသက် (၂၅) နှစ်အရွယ်ရှိ အမျိုးသမီးတစ်ဦး၏ရုပ်အလောင်းကို ပြန်လည်တွေ့ရှိပြီဖြစ်ကြောင်း သုဝဏ္ဏပရဟိတ အသင်းထံမှသိရသည်။
သေဆုံးသူအမျိုးသမီး၏ယောက်ျားဖြစ်သူမှာ အဆိုပါတံတားပေါ်မှ စက်တင်ဘာ ၂ ရက်ကခုန်ချ၍သေဆုံးခဲ့ပြီး ဇနီးဖြစ်သူမှာလည်း စက်တင်ဘာ ၁၃ ရက်နံနက်ပိုင်းတွင် တံတားပေါ်၌ဖုန်းနှင့်ဖိနပ်ချန်ထားရစ်ပြီး ခုန်ချသေဆုံးခဲ့ခြင်းဖြစ်သည်။
ယင်းသို့ ခုန်ချခဲ့ပြီးနောက် မိသားစုဝင်များ၏အကူညီတောင်းခံမှုအရ ရှာဖွေမှုများပြုလုပ်ခဲ့ရာ စက်တင်ဘာ ၁၅ ရက်၊ နံနက် ၁၁ နာရီ ၃၀ မိနစ်တွင် သေဆုံးသူ၏ ရုပ်အလောင်းကို အမှတ်(၁) ကမာကြည်တံတားအောက်တွင် ပြန်လည်တွေ့ရှိခဲ့ကြောင်း၊ ရုပ်အလောင်းအား သင်္ဃန်းကျွန်းမြို့နယ်ရှိ စံပြဆေးရုံသို့ပို့ဆောင်ခဲ့ကြောင်း သုဝဏ္ဏပရဟိတအသင်းမှတာဝန်ရှိသူတစ်ဦးကပြောသည်။
“ကျွန်တော်တို့ စံပြစျေးနဲ့ ပင်လုံဘက်ကိုဆက်ထားတဲ့တံတား။ သူ့ပြန်တွေ့တာက ကမာကြည်တံတား အမှတ်(၁)နားမှာပြန်တွေ့တာ။ အလောင်းပြန်တွေ့ တာတော့ နှစ်ရက်လောက်ရှိပြီ။ တနင်္လာနေ့ကတွေ့တာ။ အဲဒီတံတားနားကအဆင်မပြေလို့ တံတားအောက်ဘက် ကိုက် ၁၀၀ လောက်ပြန်ရွှေ့ခဲ့ရတယ်။ ကျွန်တော်တို့ ရှာတာတော့မနက် ၇ နာရီလောက် ကတည်းကရှာတာ။ ၁၁ နာရီခွဲလောက်မှာတွေ့တာ။ မိသားစုနဲ့လည်းအဆက်သွယ်ရပါတယ်။ သူ့မိသားစုကရှာခိုင်းလို့ရှာပေးတာပါ။ သူကဒဂုံကပါပဲ။ အတိအကျတော့မပြောတော့ဘူး” ဟု ၎င်းက စံတော်ချိန်ဒစ်ဂျစ်တယ်သို့ပြောသည်။
ပြီးခဲ့သည့်ရက်ပိုင်းအတွင်းတွင်လည်း ဒဂုံမြို့သစ်(မြောက်ပိုင်း)မြို့နယ်ရှိ ဘေလီတံတားပေါ်မှ အသက် (၂၀) ကျော်အရွယ်အမျိုးသားတစ်ဦးနှင့်အမျိုးသမီးတစ်ဦး လက်ချင်းကြိုးချည်၍ ခုန်ချသည့်ဖြစ်စဉ် ဖြစ်ပွားခဲ့ပြီး ၎င်းတို့၏ရုပ်အလောင်းကိုစက်တင်ဘာ ၁၄ ရက်တွင် အဆိုပါတံတားအောက်၌ ပြန်လည် တွေ့ရှိခဲ့သည်။
သတင်း - အင်ကြင်း
#ပြည်တွင်းသတင်း