မိတ္ထီလာ ကန်ဘောင်ဘေး ဓားဒဏ်ရာတွေနဲ့ စွန့်ပစ်သွားတဲ့ သေဆုံးသူကို သတ်တဲ့တရားခံနှစ်ဦးအား နှစ်ရက်အတွင်း ရှာဖွေဖော်ထုတ်ဖမ်းဆီးနိုင်ခဲ့၊ ဂိမ်းကြွေးဆပ်ဖို့ ငွေလိုလို့ သတ်ဖြတ်ကြောင်း ပေါ်ပေါက်ဟုဆို
စက်တင်ဘာ ၁၈
ပြီးခဲ့တဲ့ စက်တင်ဘာ ၁၅ ရက်နေ့က မန္တလေးတိုင်းဒေသကြီး၊ မိတ္တီလာမြို့မြောက်ကန်စပ်မှာ တွေ့ရှိခဲ့တဲ့ ကိုရီးယားဂွမ်းစောင်အနီနဲ့ပတ်ထားတဲ့အမျိုးသားအလောင်းနဲ့ ပတ်သက်လို့ သတ်ဖြတ်စွန့်ပစ်သွားတဲ့ တရားခံတွေကို မိတ္ထီလာမြို့ အမှတ်(၂)နယ်မြေရဲစခန်းမှူး၊ နယ်ထိန်းခေါင်းဆောင်နဲ့ တပ်ဖွဲ့တွေက အချိန်နဲ့ တစ်ပြေးညီ စုံစမ်းဖော်ထုတ်ကာ ကျူးလွန်သူနှစ်ဦးကို ဒီနေ့ စက်တင်ဘာ ၁၇ ရက်နေ့ မနက် ၈ နာရီခန့်မှာ မကွေးတိုင်းဒေသကြီး၊ နတ်မောက်မြို့နယ်၊ ရွာတော်ကျေးရွာအုပ်စု၊ ရွာတော်ကျေးရွာရှိ ၎င်းတို့ရဲ့နေအိမ်တွေမှာ ဖမ်းဆီး ရမိခဲ့တယ်လို့ သိရပါတယ်။
ဖြစ်စဉ်အတွင်း သတ်ဖြတ်ပြီး ရုပ်အလောင်းစွန့်ပစ်ခံရသူမှာ မကွေးတိုင်း၊ နတ်မောက်မြို့နေ ဇင်မင်းထက် အသက် ၃၀ နှစ်ဖြစ်ကြောင်းသိရှိရပြီး စက်တင်ဘာ ၁၄ ရက်နေ့ညက သတ်ဖြတ်ခံရတာဖြစ်ကြောင်း သိရပါတယ် ။ သေဆုံးသူဇင်မင်းထက်က အဲဒီနေ့မနက်ပိုင်းမှာ ဇော်လှိုင်းနဲ့ ဇာနည်အောင်ဆိုသူတို့ နှစ်ဦးနဲ့အတူ မန္တလေးမြို့ကို MDY 28,6Q/6131 CANDA အဖြူရောင်ကားနဲ့ ဝက်တွေတင်ဆောင်ကာ ရောင်းချရန်သွားရောက်ခဲ့ကြောင်း၊ ညနေ (၄)နာရီခန့်အချိန်မှာ မန္တလေးမြို့ကိုရောက်ရှိပြီး ဝက်တွေကို ဝက်ဒိုင်မှာ ချိန်တွယ်ကာ၊ ရရှိငွေ ကျပ်သိန်း(၄၇ဝ)ကို ဆာလာအိတ်နဲ့ထုတ်ကာ ယူဆောင်ပြီး ကားပေါ် တင်ကာ ၎င်းတို့(၃)ဦး အမြန်လမ်းမှတစ်ဆင့် ပြန်လာခဲ့ကြောင်း၊ ည(၈)နာရီခန့်အချိန်မှာ မိတ္ထီလာမြို့သို့ရောက်ရှိပြီး၊ သီးကုန်းဂိတ်အနီး DENKO ဆီဆိုင်မှာ ကားဆီထည့်ကာ မြို့တွင်းကို ကားမောင်းဝင်ခဲ့ကြောင်း၊ အောင်ဆန်းမြို့သစ်ရှိ တည်းခိုခန်းမှာ ဝင်ရောက်ပြီး အခန်းငှားရမ်းနေထိုင်ခဲ့ကြောင်း စသဖြင့် ဖမ်းမိတရားခံ နှစ်ဦးက ရဲဆီမှာ ထွက်ဆိုချက်ပေးခဲ့ပါတယ်။
သတ်ဖြတ်ရတဲ့ အကြောင်းအရင်းက တရားခံ နှစ်ဦးအနက် ဇော်လှိုင်းဆိုသူမှာ အွန်လိုင်းဂိမ်းကစားရင်း ငွေတွေရှုံးနိမ့်ခဲ့လို့ အကြွေးပြန်လည်ဆပ်ဖို့အတွက် ဇာနည်အောင်နဲ့ တိုင်ပင်ပြီး အဲဒီ ၁၄ ရက်နေ့ည (၂)နာရီခန့် အချိန်မှာ တစ်ခန်းတည်းအတူအိပ်ပျော်နေတဲ့ ဇင်မင်းထက်ကို ဇာနည်အောင်မှ ခေါင်းအုံးနဲ့မျက်နှာကို ဖိပြီး ဇော်လှိုင်းက သူ့ဆီမှာပါလာတဲ့ သတ္တုရိုးတပ်ထားပြီး အရိုးအသွား(၂၁)လက်မခန့်ရှိ ဒါးဦးချွန် ဒါးမြှောင်(၁)ချောင်းနဲ့ ဇင်းမင်းထက်ရဲ့ ဝမ်းဗိုက်ကို(၂)ချက်ထိုးလိုက်စဉ် ဇင်မင်းထက်က ဓားကို ဆုပ်ကိုင်လုယူလို့ လက်မှာ ဓားဒဏ်ရာတွေရရှိခဲ့ကြောင်း၊ အဲ့ဒီနောက် ဇင်မင်းထက်မှာ ကုတင်ပေါ်မှလိမ့်ကျသွားစဉ် ဇာနည်အောင်မှ ဇော်လှိုင်ရဲ့ လက်ထဲက ဓားမြှောင်ကိုလုယူပြီး၊ ဇင်မင်းထက်ရဲ့ ကျောကုန်းကို ဓားနဲ့ဆက်တိုက်ထိုးခဲ့လို့ ဇင်မင်းထက် သေဆုံးခဲ့ရကြောင်း စစ်ဆေးပေါ်ပေါက်တယ်လို့ သိရပါတယ်။
သေဆုံးသွားတဲ့ ဇင်မင်းထက်ရဲ့ ရုပ်အလောင်းကို တည်းခိုခန်းကုတင်ပေါ်က အနီရောင် ကိုရီးယားဂွမ်းစောင်နဲ့ပတ်ပြီး ငွေထုပ်ရော အလောင်းကိုပါ အတူပါလာတဲ့ ကားနဲ့ သယ်ဆောင်ကာ မြို့တွင်းဘက်ကိုမောင်းနှင်ဝင်ရောက်လာခဲ့ပြီး မိတ္ထီလာမြောက်ကန်ပေါ်ကို ကားမောင်းနှင်ကာ ဇင်မင်းထက်ရဲ့အလောင်းကို ကန်ဘောင်ပေါ်မှတစ်ဆင့် ရေစပ်သို့ ဆွဲချခဲ့ကြောင်း ထွက်ဆိုခဲ့ကြပြီး ငွေထုပ်ကိုယူကာ ရွာတော်ကျေးရွာဆီ မောင်းနှင်ပြန်ခဲ့ကာ ၎င်းတို့ လူသတ်ရာမှာ အသုံးပြုတဲ့ ဓားတွေကို ဒီးဒုတ်စံပြကျေးရွာကားလမ်းဘေးကို လွှင့်ပစ်ခဲ့ကြောင်း ထွက်ဆိုခဲ့တယ်လို့ သိရပါတယ်။
တရားခံတွေကို ဖမ်းဆီးကာ ၎င်းတို့ရဲ့ထွက်ဆိုအစစ်ခံချက်တွေအရ သက်သေခံပစ္စည်းများ သိမ်းဆည်းရန်အတွက် တာဝန်ရှိသူတွေက မကွေးတိုင်းဒေသကြီး နတ်မောက်မြို့နယ်၊ ရွာတော်ကျေးရွာအုပ်စု၊ ရွာတော်ကျေးရွာရှိ တရားခံဇော်လှိုင်းရဲ့ နေအိမ်ကို သွားရောက်ရှာဖွေရာ အခင်းဖြစ်စဉ် ၎င်းတို့လုယူသွားတဲ့ ငွေသိန်း(၄၇ဝ)အနက် ငွေသိန်း(၃၅၀)ကျပ်ကို ရှာဖွေတွေ့ရှိတာကြောင့် သက်သေတွေရှေ့မှာ ရှာဖွေပုံစံဖြင့် သိမ်းဆည်းခဲ့ပြီး၊ သက်သေခံ ပစ္စည်း ဓားမြောင်ကိုလည်း ဒီးဒုတ်ကျေးရွာအနီးကားလမ်းဘေးမှာ တရားခံတွေက လိုက်လံပြလို့ ရှာဖွေပုံစံနဲ့ သိမ်းဆည်းခဲ့တယ်လို့သိရပါတယ်။
ဇင်မင်းထက်ကို သေဆုံးတဲ့အထိ ဓားမြောင်နဲ့ဝိုင်းဝန်းထိုးသတ်ခဲ့ပြီး ငွေတွေလုယူခဲ့သူ တရားခံဇော်လှိုင်းနဲ့ ဇာနည်အောင်တို့(၂)ဦးကို ရာဇသတ်ကြီးပုဒ်မ-၃ဝ၂/၃၉၄/၁၁၄ ဖြင့် အမှုဖွင့်လှစ်ကာ တရားစွဲဆိုတင်ပို့နိုင်ရေး မိတ္ထီလာ မြို့နယ်၊ အမှတ်(၂)နယ်မြေရဲစခန်းက ဆက်လက်စစ်ဆေးဆောင်ရွက်လျက်ရှိကြောင်း သိရှိရပါတယ်။
#သတင်းဟင်းလေးအိုးကြီး
