သေဆုံးခဲ့ပြီးတဲ့နောက်မှာတောင် ချစ်သူဟောင်းအတွက် စုဆောင်းငွေတွေ ချန်ထားပေးခဲ့တဲ့ အမျိုးသား
အမျိုးသားတစ်ဦးဟာ သူ သေဆုံးခဲ့ပြီးတဲ့နောက် သူ့ချစ်သူဟောင်းအတွက် စုဆောင်းငွေတွေ ချန်ထားခဲ့တယ်ဆိုတဲ့ သတင်းတွေကြောင့် အဲ့ဒီစုံတွဲရဲ့အချစ်ဇာတ်လမ်းက လူမှုကွန်ယက်မှာ ပျံ့နှံ့လာခဲ့ပါတယ်။ အဲ့ဒီအမျိုးသားက စုဆောင်းငွေတွေအပြင် အဆုံးမရှိတဲ့ ချစ်ခြင်းမေတ္တာတွေကို ဖော်ညွှန်းထားတဲ့ စာတစ်စောင်ကိုလည်း ချန်ထားခဲ့တာပါ။
ရှောင်လို့ လူသိများတဲ့ အသက် ၂၆ နှစ်အရွယ် အဲ့ဒီအမျိုးသားနဲ့ အသက် ၂၂ နှစ်အရွယ် ဟူရှင်းယောင်တို့ဟာ သူငယ်ချင်းတွေကနေတဆင့် သိပြီး ချစ်သူတွေဖြစ်ခဲ့ကြတာပါ။ ဟူဟာ ကျောက်ကပ်ပျက်စီးခြင်းကို ဖြစ်စေနိုင်တဲ့ သွေးကြောဆိုင်ရာရောဂါကို ခံစားနေခဲ့ရတာ ၈ နှစ်ရှိပါပြီ။ သူတို့တွဲလာတာ ၂ လအကြာမှာ ဟူရဲ့အခြေအနေက ပိုမိုးဆိုးရွားလာကာ တစ်လကို ဆေးကုစရိတ် ယွမ် ၂၀၀၀၀ အထိ ရှိလာခဲ့ပါတယ်။
ရှောင်က သူ့ကောင်မလေး ဟူကို စိတ်နှစ်ပြီး ပြုစုစောင့်ရှောက်ပေးခဲ့ပေမဲ့ ဟူက သူနဲ့အတူတူရှိနေရင် ရှောင်ရဲ့တက်လမ်းနှောင့်နှေးမှာဆိုးလို့ သူတို့ရဲ့ဆက်ဆံရေးကို အဆုံးသတ်ဖို့ ဆုံးဖြတ်ခဲ့ပါတယ်။ ရှောင်ရဲ့ပံ့ပိုးကူညီမှုမပါဘဲ ဟူက သူ့ရဲ့ဆေးကုသစရိတ်အတွက် လှူဒါန်းငွေနဲ့ ချေးငွေတွေအပေါ် အားကိုးခဲ့ပါတယ်။ သစ်သီးဖျော်ရည်လည်း ရောင်းပြီး အွန်လိုင်းပေါ်မှာ ဝတ္တုတွေလည်း ရေးခဲ့ပါတယ်။
သူတို့ လမ်းခွဲပြီးနောက် အချိန်အတန်ကြာတော့ ရှောင်က ပြင်းထန်တဲ့ပန်ကရိယရောင်ခြင်းကြောင့်သေဆုံးသွားခဲ့ပါတယ်။ ဟူအတွက် ရှောင်က စာတစ်စောင်နဲ့အတူ ယွမ် ၅၀၀၀၀ ချန်ထားခဲ့ပါတယ်။ စာထဲမှာ ရှောင်က သူတို့လမ်းခွဲပြီးတဲ့နောက် လတိုင်း ဆေးကုသစရိတ်အတွက် အမည်မဖော်ဘဲ ထောက်ပံ့ပေးနေခဲ့တယ်။ ချန်ထားခဲ့တဲ့ငွေတွေကလည်း လူနာတွေအတွက် အိမ်တိုင်ရာရောက် ကျန်းမာရေးစောင့်ရှောက်မှုပေးတဲ့ဝန်ဆောင်မှုဖန်တီးချင်တဲ့ ဟူရဲ့အိပ်မက်တွေဖြည့်ဆည်းဖို့ ပေးတဲ့ သူ့ရဲ့စုဆောင်းငွေတွေဖြစ်တယ်။ လူနာတွေကို ကူညီပြီး သူတို့ရဲ့အသက်တွေကို ကယ်တင်ပေးနိုင်ဖို့ မျှော်လင့်တယ်လို့ ရေးသားထားပါတယ်။
ရှောင်က သူတို့ရဲ့ ၂ လတာအချစ်ရေးဆက်ဆံရေးဟာ သူ့ဘဝမှာ တန်ဖိုးအထားရဆုံးနဲ့ အပျော်ရွှင်ရဆုံးအချိန်ဖြစ်ခဲ့တယ်။ သူ့အတွက် ဘဝအတွေ့အကြုံတွေကို ဆက်လက်ခံစားပြီး ရောဂါကိုလည်း ကြံကြံခိုင်ရင်ဆိုင်ကျော်လွှားဖို့ တိုက်တွန်းခဲ့ပါတယ်။ နောက်ဘဝရှိခဲ့ရင် သူတို့ထပ်ပြီး ဆုံတွေ့ချင်တယ်။ အဲ့ဒီအချိန်ကျ ဟူရဲ့အနားမှာ အချိန်အကြာကြီး ရှိနေပေးမယ်လို့ ရှောင်က အဆုံးသတ်ရေးသားသွားခဲ့ပါတယ်။
ဟူက ရှောင်ရဲ့စာကို ဖတ်ပြီး မျက်ရည်ကျခဲ့ရပြီး ချန်ထားခဲ့တဲ့ငွေတွေကို ရှောင်ရဲ့မိဘတွေကို ပြန်ပေးဖို့ ကြိုးစားခဲ့ပါတယ်။ ရှောင်ရဲ့မိဘတွေက ရှောင်ရဲ့ဆန္ဒကိုလေးစားတဲ့အနေနဲ့ လက်မခံခဲ့ပါဘူး။ ဟူကတော့ အခုဆို ရှောင်ရဲ့မိဘတွေက သူ့မိဘလိုပါပဲ။ သူ အသက်ရှင်နေသရွေ့ သူတက်နိုင်သမျှ ရှောင်ရဲ့မိဘတွေကို စောင့်ရှောက်သွားမှာပါတဲ့။
ဟူက ဝန်ဆောင်မှုကို လည်ပတ်နိုင်ဖို့ အငှားနေရာရှာနေခဲ့တဲ့အပြင် ဆေးဘက်ဆိုင်ရာပစ္စည်းတွေကိုလည်း ဝယ်ယူနေပါတယ်။ အခုနှစ်အောက်တိုဘာလမှာ ဖွင့်ဖို့ စီစဉ်ထားတယ်လို့ သိရပါတယ်။