Title -"Book review "
စာအုပ်အမည် -"ကာမတဏှာ "
စာရေးသူ - ဦးနု
ဒီစာအုပ်လေးက ဖတ်နေရင်း ကျွန်မကို
"ဒီစာအုပ်လေးကို ဖတ်မိတာ ငါ ကံကောင်းလိုက်တာ "လို့ အတွေးဝင်စေခဲ့တဲ့ စာအုပ်လေးပါ။ အစကတော့ စာအုပ်အမည် ကြည့်ပြီး "ဘယ်လိုလဲ မသိဘူး ၊ စာအုပ်နာမည်က ဆန်းတယ် ၊ ဘယ်လို အကြောင်းအရာတွေ ပါမလဲပေါ့ "။
စာအုပ်အမည်က ကျွန်မတို့ ကြားဖူးနားဝရှိတဲ့ နေ့စဥ်သုံး စကားလုံး မဟုတ်ဘဲ ဘာသာရေးစကားလုံးလေး ဖြစ်ခဲ့တာကိုး။ ဒီစာအုပ်လေးက လူတိုင်း ဖတ်သင့်တယ် ။ အထူးသဖြင့် လူငယ် တွေ ယောကျ်းလေး ၊မိန်းကလေးတိုင်း ဖတ်သင့်ပါတယ်။ ကျွန်မ တန်ဖိုးထားတဲ့တစ်စုံတစ်ယောက် ကို လက်ဆောင်ပေးရမယ် ဆိုရင် ဒီစာအုပ်လေးကို ပေးဖြစ်မှာပါ။
ဒီစာအုပ်လေးက "ဘာသာရေး ဝတ္ထု "လေးပါ။ ကျွန်မတို့ ဗုဒ္ဓဘာသာဝင်တိုင်း မိရိုးဖလာ ဗုဒ္ဓဘာသာ မဟုတ်ဘဲ ဗုဒ္ဓအလိုတော်ကျ ကျင့်ကြံအားထုတ် ၊ပြုမူ နေထိုင်ပြီး
အမျိူးသားကောင်း ၊ အမျိူးသမီးကောင်း ဖြစ်ချင်သူတိုင်း ဖတ်သင့်ပါတယ်။ ဘာသာရေး အကြောင်းအရာ တွေချည်း ဆို ငြီးငွေ့စရာ ရှိသော်လည်း ဆရာကြီး ဦးနုရဲ့ ကျွမ်းကျင်လှတဲ့ စာပေရေးနည်းအတတ်ပညာကြောင့်
ကိုယ်တိုင် မခင်မေ ဖြစ်သွားတဲ့အတိုင်း ခံစားသက်ဝင်နိူင်မှာပါ။
ဝတ္ထုအကျဥ်းလေး ပြောပြပါမယ်။
မိဘနှစ်ပါးနဲ့အတူ မခင်မေရယ်၊ တင်မေရယ် ဆိုပြီး မိသားစုဝင် လေးယောက်ရှိကြတယ်။ ဖခင်ဖြစ်သူဟာ ဗုဒ္ဓဘာသာကို သက်ဝင်ယုံကြည်စွာ ကျင့်ကြံအားထုတ်နေသူ ဖြစ်တဲ့ အပြင် သမီးလေး နှစ်ယောက်ကိုလည်း ငယ်စဉ်ကတည်းက မိရိုးဖလာ ဗုဒ္ဓဘာသာ မဟုတ်ဘဲ ဗုဒ္ဓဘာသာဝင် စစ်စစ် ဖြစ်စေခဲ့တယ်။ နိပါတ်၊ ဇာတ်တော် များ ပြောပြပြီးလည်း ဆိုဆုံးမခဲ့လေတော့ မခင်မေတို့ဟာ ဘာသာရေးအသိတွေ ကြွယ်ဝနေတဲ့ အမျိူးသမီးကောင်းလေးတွေ ဖြစ်လာခဲ့တယ်။ ဖခင်ဆုံးပါးသွားတော့လည်း ညီအစ်မနှစ်ယောက် မိခင်ကြီး အပေါ်မှာ ပြုစုယုယ ရှာဖွေ ကျွေးမွေးပုံတွေကလည်း အတုယူစရာ ဖြစ်တယ်။ ဖခင်ရဲ့ ဆိုဆုံးမမှုတွေကြောင့် မခင်မေဟာ "ကာမတဏှာ "ဆိုတဲ့ ကြောက်ရွံ့စရာ ကောင်းလှတဲ့ ဘီးလူးကြီးနဲ့ ကင်းလွတ်ရာ ဖြစ်တဲ့ သာသနာဘောင်ကိုပဲ ဝင်ပြီး ဘုရားသမီးတော် ဖြစ်ချင်စိတ် ဆန္ဒ ပြင်းပြခဲ့တော့တယ်။
ဒါပေမယ့် ဘဝအကြောင်းအကံတွေကြောင်း မောင်သိန်းမောင် ဆိုသူနဲ့ အိမ်ထောင်ကျခဲ့ပြီး "တဏှာတောမှာ ရုန်းမထွက်နိုင် "ဖြစ်ခဲ့ရမှ မခင်မေနဲ့ မောင်သိန်းမောင် အိမ်ထောင်မှု ထိန်းသိမ်းကြပုံတွေကို ဖတ်ရှုရပါမယ်။ ဘာသာရေးအသိတွေကြွယ်ဝနေတဲ့အမျိူးသမီးကောင်းလေး မခင်မေဟာ ခင်ပွန်းဖြစ်သူ ကိုသိန်းမောင်ကို ဘယ်လိုတွေ လမ်းပြပြီး ဗုဒ္ဓဘာသာဝင်စစ်စစ် ဖြစ်စေခဲ့သလဲ။ တစ်ယောက် နဲ့ တစ်ယောက် ဘယ်လို ပါရမီဖြည့်ဖက်ကောင်း ပီသကြမလဲ။ ဗုဒ္ဓဘာသာဝင် အမျိူးသမီး တို့ရဲ့ ကျင့်ဝတ်တွေကို ဘယ်လို လိုက်နာကြရမလဲ။ ဗုဒ္ဓဘာသာဝင်အမျိူးသမီး တို့ရဲ့ ဘဝအောင်မြင်ရေးအတွက် ဘယ်လို စိတ်ထား တွေ၊ အပြုအမူ တွေ လိုအပ်သလဲ။ဗုဒ္ဓမြတ်စွာရဲ့ တရားတော်တွေနဲ့အညီ ပြုမူရမယ့် အိမ်ထောင်တစ်ခု ၊ အိမ်ထောင်ကျင့်ဝတ်တွေက ဘာတွေလဲ ကို သိရမှာ ဖြစ်ပါတယ် ။
သူများတွေကတော့ ဒီစာအုပ်ဖတ်ပြီးရင် သီလရှင်
ဆရာလေး ဝတ်ချင်စိတ်တွေ ပေါက်တယ်လို့ ပြောကြပါတယ် ။ ကျွန်မကတော့ အဲ့လို မဟုတ်ဘဲ ဒီ ဝတ္ထုထဲက မခင်မေလို "ဗုဒ္ဓဘာသာဝင်အမျိူးသမီးကောင်း "ဖြစ်ချင်တဲ့ စိတ် ဆန္ဒ ပြင်းပြခဲ့ပါတယ်။ သီလရှင် ဆရာလေး ဘဝဆိုတာ ဗုဒ္ဓဘာသာဝင် အမျိူးသမီးတိုင်းရဲ့ ပါရမီထူးရာ ဘဝမွန် ၊ ၊ဘဝ မြတ် ဖြစ်ပါတယ်။ ဒါပေမဲ့ ဝိနည်းအတိုင်း မနေနိူင်ရငည်း အတော် နေရခက်တဲ့ဘဝ ဆိုတော့ ကျွန်မ ကတော့ အ၊ဘရင်ဆုံး "ဗုဒ္ဓဘာသာဝင်အမျိူးသမီး ကောင်း "တစ်ယောက် ဖြစ်အောင် ကြိူးစားရင်း ပါရမီဖြည့်မယ်လို့ တွေးမိပါတယ် ။
ဒီဝတ္ထုထဲက ကိုသိန်းမောင်နဲ့ မခင်မေတို့လိုသာ အိမ်ထောင်ရှင်တိုင်း ထိန်းသိမ်းကြရင် အိမ်ထောင်ရေး ဖောက်ပြန်မှု ဆိုတာလည်း ရှိလာမှာ မဟုတ်ပါဘူး။ ဒါဆိုရင် သူရောကိုယ်ပါ စိတ်အေးချမ်းစွာနဲ့ လောကီ ၊ လောကုတ္တရာ နှစ်ဖြာသော အကျိူးတို့ကို သယ်ပိုးနိူင်ကြမှာပါ ဖြစ်ပါတယ်။ "ကာမတဏှာ "ဆိုတဲ့ကြောက်ရွံ့စရာ ဘီးလူးကြီး ဆိုတာ သိကြပေမယ့် "အနာဂမ် မဖြစ် သရွေ့ အချစ် နဲ့ မကင်းလေတော့ "မခင်မေနဲ့ ကိုသိန်းမောင် လိုပဲ တစ်ယောက် နဲ့ တစ်ယောက် ပါရမီဖြည့် ပေးရင် ဘဝတွေ အေးချမ်းကြမှာပါ ။ မြတ်စွာဘုရား ဟောကြားခဲ့တာ "ဝေးလံသောခရီး တစ်ကိုယ်တည်း မသွားစကောင်း "ဆိုသလို ၊ ဝိသာခါ ကျောင်းအမလည်း အိမ်ထောင်ရှင်မဘဝနဲ့ သောတာပန် တည်ခဲ့တာမို့ ဗုဒ္ဓဘာသာဝင်အမျိူးသမီးကောင်း ဖြစ်လာဖို့ ဒီစာအုပ်လေးကို ဖတ်ဖြစ်အောင် ဖြစ်ဖို့
အထူးသဖြင့် အမျိူးသမီးလေးတွေကို တိုက်တွန်းလိုက်ပါတယ်ရှင့်။
ချစ်ခြင်းမေတ္တာများဖြင့်
ထူးထူးကျော် (ဆည်မြေ)❤
