◼ ဒေါက်တာအေးမောင်အား ပြစ်မှုနှင့် ပြစ်ဒဏ်များမှ လွတ်ငြိမ်းချမ်းသာခွင့်ပြုဟုထုတ်ပြန်
ရခိုင့်ဦးဆောင်ပါတီ ဥက္ကဋ္ဌဒေါက်တာအေးမောင် အပေါ် ပြစ်မှုထင်ရှားစီရင်ထားသည့် ပြစ်မှုနှင့်ပြစ်ဒဏ်များကို အမျိုးသား ကာကွယ်ရေးနှင့် လုံခြုံရေးကောင်စီ၏ ထောက်ခံချက်ဖြင့် ယနေ့ (စက်တင်ဘာ ၁၁ ရက်)တွင် လွတ်ငြိမ်းချမ်းသာခွင့်အမိန့်ထုတ်ပြန်လိုက်သည်။
ဒေါက်တာအေးမောင်သည် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေး၊ အချုပ်အခြာအာ ဏာ တည်တံ့ခိုင်မြဲရေးဆိုသည့် နိုင်ငံတော်၏ ဦးတည်ချက်များအား အစဉ်တစိုက် မမှိတ်မသုန် စွဲမြဲစွာခံယူစောင့်ထိန်းသွားမည်ဟုသန္နိဋ္ဌာန်ပြုကာ စစ်မှန်စည်းကမ်းပြည့်ဝတဲ့ ဒီမိုကရေစီ နှင့်ဖက်ဒရယ်စနစ်ကို အခြေခံတဲ့ပြည်ထောင်စုတည်ဆောက်ရာမှာ တစ်တပ်တစ်အား ပါဝင်ဆောင်ရွက်ရန် ကတိကဝတ်ပြုမှုအရ ပြစ်မှုထင်ရှားစီရင်ထားသည့် ပြစ်မှုနှင့်ပြစ်ဒဏ်များကို အမျိုးသား ကာကွယ်ရေး နှင့်လုံခြုံရေးကောင်စီ၏ ထောက်ခံချက်ဖြင့် လွတ်ငြိမ်းချမ်းသာခွင့် ပြုလိုက်ကြောင်း ထုတ်ပြန်ချက်တွင် ဖော်ပြထားသည်။
ဒေါက်တာ အေးမောင်သည် ၂၀၁၈ ခုနှစ်အတွင်းက စာပေဟောပြောတစ်ခု၌ ဟောပြောမှုများကြောင့် နိုင်ငံတော်သစ္စာဖောက်ဖျက်ပုန်ကန်မှု ၊ နိုင်ငံတော်အကြည်ညိုပျက်စေမှုတို့ဖြင့် ဖမ်းဆီးခံရပြီးနောက် နှစ်ရှည်ထောင်ဒဏ်များ ချမှတ်ခံခဲ့ရကာ ၂၀၂၁ ခုနှစ် ဖေဖော်ဝါရီ ၁၂ ရက်တွင် ပြစ်ဒဏ်လွတ်ငြိမ်းခွင့် ပြန်လည်လွတ်မြောက်ခဲ့ကြောင်း သတင်းမှတ်တမ်းများအရ သိရသည်။
သတင်း - ပိုင်လေး
#ပြည်တွင်းသတင်း
