◼ ချီကာဂိုမြို့တွင် လူဝင်မှုကြီးကြပ်ရေးနှင့်အစောင့်တပ်ချထားမည့် ထရန့်ခြိမ်းခြောက်မှု လူထောင်ချီဆန္ဒပြ
ချီကာဂိုမြို့အား အမျိုးသားအစောင့်တပ်ဖွဲ့များ၊ ဖက်ဒရယ်လူဝင်မှုကြီးကြပ်ရေး အေးဂျင့် အမြောက် အမြားပို့ဆောင်သွားနိုင်သည်ဟူသော သမ္မတဒေါ်နယ်ထရန့်၏ ခြိမ်းခြောက်မှုများကို ကန့်ကွက်သောအားဖြင့် ယမန်နေ့တွင် ချီကာဂိုမြို့လယ်လမ်းမများတွင်ထောင်နှင့်ချီသောလူများက သီချင်းဆိုခြင်း၊ ကြွေး ကြော်သံများဟစ်ကြွေးခြင်း၊ ဆိုင်းဘုတ်များ ကိုင်ဆောင်ရင်း ဆန္ဒပြခဲ့ကြသည်။
ယင်းချီတက်ပွဲမှာ အမေရိကန်အလုပ်သမားနေ့ အားလပ်ရက်အတွင်း ‘ဘီလျံ နာ များ ထက်အလုပ်သမားများကိုဦးစားပေး’ ဟု ကင်ပွန်းတပ်ကာ နိုင်ငံတစ်ဝန်းပြုလုပ်ခဲ့သော ဆန္ဒပြ ပွဲ တစ် ထောင်ခန့်အနက်မှ တစ်ခုဖြစ်သည်။
သို့ရာတွင် ဒီမိုကရက်များအုပ်ချုပ်နေသော အခြားမြို့ကြီးများဖြစ်သည့် လော့စ်အိန်ဂျလိစ်နှင့် ဝါရှင်တန်ဒီစီ တို့တွင်လုပ်ဆောင်နေသကဲ့သို့ ချီကာဂိုမြို့တွင်လည်း အမျိုးသားအစောင့်တပ်များ၊ လူဝင်မှုကြီးကြပ်ရေးအေးဂျင့် အမြောက် အမြား ပို့ဆောင်နိုင်ကြောင်း ထရန့်၏ကတိအပေါ် မကျေနပ်ကြခြင်းကြောင့် ချီကာဂိုမြို့၏ ဆန္ဒပြပွဲမှာ ပို၍ပြတ်သားသောလေသံထွက်နေကြောင်း ရိုက်တာသတင်းက ဖော်ပြသည်။
ဖက်ဒရယ်အစိုးရ၏ ထိပါးနှောက်ယှက်မှုများကို ချီကာဂိုမြို့က တွန်းလှန်သွားမည်ဖြစ်ကြောင်း မြို့တော်ဝန် ဘရန်ဒန်ဂျွန်ဆင် က ဆန္ဒပြလူထုအား ပြောကြားသည်။
“ ကျွန်တော်တို့က နိုင်ငံကို ကာကွယ်သွားမယ့်မြို့ဖြစ်ပါတယ်” ဟုဂျွန်ဆင် က ပြောကြားပြီး လူအုပ်ကြီးကလည်း ချီကာဂိုမြို့အလံများ ဝှေ့ယမ်း၍ အားပေးခဲ့ကြသည်။
ဆန္ဒပြလူအုပ်ကြီးက မြို့တွင်းလမ်းမများပေါ် လှည့်လည်သွားချိန်တွင်လည်း ကော်ဖီဆိုင်၊ စားသောက်ဆိုင်များတွင် ထိုင်နေသူများက လက်သီးများမြှောက်၍ ထောက်ခံကြောင်းပြသခဲ့ကြသည်။
ယာဉ်မောင်းများကလည်း ကားဟွန်းများတီး၍ အားပေးခဲ့ကြပြီးလူပေါင်း ငါးထောင်နှင့် တစ်သောင်းကြား ပါဝင် ဆန္ဒပြခဲ့ကြကြောင်း စည်းရုံးသူများက ပြောကြားကြသည်။
အမျိုးသားအစောင့်တပ်ဖွဲ့များ နှင့် လူဝင်မှုကြီးကြပ်ရေးအေးဂျင့်များ ထပ်မံ ချထားမည်ဟူသော ထရန့်၏ ခြိမ်းခြောက်မှုကြောင့် စိုးရိမ်မိသည်ဟု ဆန္ဒပြသူအများအပြားက ပြောကြားခဲ့ကြောင်း ရိုက်တာသတင်းက ဖော်ပြသည်။
ပြစ်မှုထူပြောမှုများကို အကြောင်းပြ၍ မကြာသေးမီသီတင်းပတ်များအတွင်း ထရန့် က ချီကာဂိုမြို့အား သီခြားထုတ်ပြောဆိုလာပြီး ‘အရှုပ်ထုတ်’၊ ‘ငရဲတွင်း’ ၊ ‘သတ်ကွင်း’ စသည်ဖြင့် သုံးနှုန်းပြောဆိုခဲ့သည်။
သို့ရာတွင် အမျိုးသားအစောင့်တပ်ချထားခြင်းမှာ ၎င်းတို့မြို့အတွက် အဖြေမဟုတ်ကြောင်း ယမန်နေ့က ဆန္ဒပြပွဲတွင် ပါဝင်သူ ချီကာဂိုမြို့သား အများအပြားက ပြောကြသည်။
သတင်း-ရဲမင်း
ကိုးကား-Reuters
#နိုင်ငံတကာသတင်း
