ကင်ပွန်းချဉ်ပင် စိုက်ပျိုးနည်း
=================
ရှေးတောင်သူလယ်သမားကြီး များသည် ဘုန်းကြီးကျောင်းပညာရေး လောက်ကိုသာ တတ်ကျွမ်းကြသော် လည်း
စိုက်ပျိုးရေးနှင့်ပတ်သက်သော နည်းပညာ၌ အလွန်တော်ကြသည်ဟု ဆိုရပါမည်။
စိုက်ပျိုးရေးနည်းပညာကို သား၊ မြေး၊ မြစ်တို့အား ပြောပြကာ ပညာ အမွေကို လက်ဆင့်ကမ်းပေးခဲ့ကြသည်။
ဘိုးဘွားတောင်သူကြီးများ၏ စိုက်ပျိုးရေးနည်းပညာများသည် နှစ်ပေါင်း များစွာကြာသည့်တိုင် တိကျမှန်နေကြမြဲ ဖြစ်သည်။
တိကျစွာ လိုက်နာဆောင်ရွက် တတ်ကြရန်သာလိုပါသည်။ “ရှေးထုံး လည်းမပယ်နှင့် စျေးသုံးလည်းမလွယ် နှင့်”ဆိုသည့်စကားအတိုင်း
ဒို့ကျေးရွာ ဂျာနယ်တွင် စိုက်ပျိုးရေးသမားများ အတွက် ပညာမျှဝေပေးလိုက်ပါသည်။
ကင်ပွန်းချဉ်ပင်စိုက်ပျိုးနည်း
ကင်ပွန်းချဉ်ရွက်သည် ဆူးခက်များ ပါသော်လည်း လူတိုင်းနီးပါး နှစ်သက်ကြ ပါသည်။
ချဉ်သော အရသာရှိသဖြင့် အဆီ၊ အဆိမ့်ဟင်းအမယ်များနှင့် တွဲဖက်၍ စားသုံးတတ်ကြပါသည်။
ပုစွန်ဆိတ် ကလေးများနှင့် ဟင်းချိုချက်ကာ စားသုံး နိုင်သကဲ့သို့ ငါးစင်ရိုင်းနှင့် အစပ်ချက် ၍တစ်ဖုံ၊ ကြော်စား၍တစ်နည်း မိမိ နှစ်သက်သလို ချက်ပြုတ်စားသုံးနိုင်သော ဟင်းရွက်တစ်မျိုးဖြစ်ပါသည်။
နွေရာသီတွင် ပုတတ်စာနှင့် တွဲဖက် ကာ အရည်သောက်ဟင်းချက်နိုင်ပြီး ထမင်းကိုမြိန်စေပါသည်။
မိမိ၏ ခြံထဲတွင် ကင်ပွန်းချဉ်ပင်ကလေးများကို စိုက်ပျိုး ထားပါက ဝယ်စားစရာမလိုဘဲ စျေးဖိုး သက်သာစေပါသည်။
ကင်ပွန်းချဉ်ပင်အား မည်သို့စိုက် ပျိုးရပါမည်နည်းဟု မေးပါလျှင် ပျိုးထောင် စိုက်ပျိုးရပါသည်။
ကင်ပွန်းချဉ်ပျိုးပင် ကိုရရန် ခက်ခဲကြသည်ဟု ထင်ကြပါ သည်။ ပျိုးမထောင်တတ်ကြ၍ ဖြစ်သည်။ အစေ့ကိုပျိုးထောင်ရာတွင် အပင်မတက်၍ အပင်မရသူများရှိသည်။
အချို့က ကင်ပွန်းသီးအားပြုတ်၍ အစေ့ကို ခွာထုတ်ပြီး ပျိုးထောင်ကြသည်။ အပင်ပြည့်မတက်ပါ။ တချို့က ကင်ပွန်း သီးမှ အစေ့ထုတ်ပြီး ရေနွေးဖြောကာ ပျိုးထောင်ကြသည်။
ထင်သလောက် အပင်မပေါက်။ သစ်စေ့ကို ရေနွေးဖြော လျှင် သစ်စေ့နာကာ အပင်မတက်နိုင်ပါ။
တောင်သူဦးကြီးများက သားစဉ် မြေးဆက် ပြောကြားခဲ့သောစကားမှာ ကင်ပွန်းချဉ်စေ့ တစ်ရာကို ပျိုးထောင်ပါ က အပင်တစ်ရာပေါက်စေသည့်နည်း ဖြစ်သည်။
ကင်ပွန်းချဉ်သီးမှ အခွံကို နွှာ၍ အစေ့ကိုထုတ်ပါ။ ပျိုးထောင်မည့် အပင် အရေအတွက်ရအောင် အစေ့ကိုယူရ သည်။
ကင်ပွန်းချဉ်စေ့ကို သေချာကြည့် လိုက်ပါ။ တစ်ဖက်တွင် ပြောင်ချောနေပြီး အခြားတစ်ဖက်တွင် အမြစ်ထွက်မည့် အမြစ်မြှေးတစ်ခုကို တွေ့ရပါလိမ့်မည်။
ထိုအမြစ်မြှေး၏ဆန့်ကျင်ဘက် ပြောင် ချောနေသော ထိပ်ဖက်အပိုင်းကို ကွမ်းညှပ်ဖြင့် အထဲမှအဆံပေါ်သည်အထိ ညှပ်ဖြတ်လိုက်ပါ။
ထိပ်ညှပ်ထားသော ကင်ပွန်းစေ့များကို ပျိုးပေါင်ပေါ်တွင် အစေ့မြှုပ်၍ ပျိုးထောင်နိုင်ပါသည်။
အစေ့တစ်ရာ ပျိုးထောင်ပါက အပင်တစ် ရာ ပေါက်ပါသည်။ လက်တွေ့စမ်းသပ်ကြည့် ပြီးသော နည်းဖြစ်ပါသည်။
ထို့နောက် ပျိုးပင်များကို မိမိနှစ်သက်ရာနေရာသို့ ပြောင်းရွှေ့စိုက်ပျိုးနိုင်ပါသည်။
ကင်ပွန်းချဉ်ပင်သည် ခြံဝင်းကျယ် ပါက စိုက်ပျိုးသင့်သော အပင်ဖြစ်သည်။ အရွက်ကိုဟင်းလျာအဖြစ် ချက်ပြုတ် စားသောက်နိုင်သကဲ့သို့ ကင်ပွန်းသီး ခြောက်ကိုပြုတ်၍ တရော်ကင်ပွန်း အဖြစ်လည်း ခေါင်းလျှော်ကြပါသည်။
ဤကား တောင်သူတို့ပြောကြားခဲ့သော ကင်ပွန်းချဉ်ပင် စိုက်ပျိုးရေးနည်းကို မျှဝေပေးလိုက်ရပါသည်။