◼ ကမ္ဘာလုံးဆိုင်ရာ စနစ်သစ်တစ်ခုကိုရှန်ဟိုင်းပူးပေါင်းဆောင်ရွက်ရေးဖိုရမ်တွင် ရှီကျင့်ဖျင် ချပြ
ရှန်ဟိုင်းပူးပေါင်းဆောင်ရွက်ရေးအဖွဲ့အစည်း(SCO)အဖွဲ့ဝင်များအနေဖြင့် ၎င်းတို့၏ ကျယ်ပြန့်သော ဈေးကွက်ကို အသုံးချကြရန် တရုတ်သမ္မတ ရှီကျင့်ဖျင်က ယနေ့တိုက်တွန်းပြောကြားခဲ့ပြီး တစ်ချိန်တည်းမှာပင် အမေရိကန်နိုင်ငံကို စိန်ခေါ်မှု ဖြစ်စေသော ကမ္ဘာလုံးဆိုင်ရာ စီးပွားရေးနှင့် လုံခြုံရေးစနစ်သစ်တစ်ရပ်အတွက် ၎င်း၏ ရည်မှန်းချက်ကိုလည်း ချပြခဲ့ကြောင်း ရိုက်တာသတင်းက ဖော်ပြသည်။
ရှန်ဟိုင်းပူးပေါင်းဆောင်ရွက်ရေး အဖွဲ့(SCO) က နိုင်ငံတကာဆက်ဆံရေး နှင့် ပတ်သက်၍ နမူနာပုံစံသစ်တစ်ခု ဖော်ထုတ်ခဲ့ကြောင်း တရုတ်နိုင်ငံမြောက်ပိုင်း တီယန်ကျင်းဆိပ်ကမ်းမြို့တွင် ကျင်းပနေသည့် နှစ်ရက်တာ ထိပ် သီးဆွေးနွေးပွဲရောက် နိုင်ငံ့အကြီးအကဲ ၂၀ ကျော်အားပြောကြားသည့် အဖွင့်မိန့်ခွန်း၌ ရှီကျင့်ဖျင် က ပြောသည်။
သာတူညီမျှ နှင့် အစီအစဉ်ကျနသော ဝင်ရိုးစုံကမ္ဘာကြီးဖြစ်ပေါ်ရေး၊ အားလုံးပါဝင်သော စီးပွားရေးကမ္ဘာဖြန့်ကြက်မှု တို့ကို မိမိတို့က အားပေးထောက်ခံသင့်ပြီး တရားမျှတသောကမ္ဘာလုံးဆိုင်ရာအုပ်ချုပ်မှုစနစ်ကို အားပေး မြှင့် တင်သင့်ကြောင်း ရှီကျင့်ဖျင်က ပြောသည်။
ယခုနှစ်အတွင်း အဖွဲ့ဝင်နိုင်ငံများအတွက် တရုတ်က နှောင်ကြိုးမပါသော အကူအညီ ယွမ် ၂ ဘီလီယံ(အမေရိကန်ဒေါ်လာသန်း ၂၈၀) ပေးအပ်သွားမည်ဖြစ်ကြောင်း နှင့် SCO ဘဏ်လုပ်ငန်းအတွက် ချေးငွေ ယွမ်ငွေ ၁၀ ဘီလီယံ ထပ်မံ ချေးပေးသွားမည်ဖြစ်ကြောင်းလည်း ရှီ က ပြောသည်။
“ကုန်သွယ်ရေးနဲ့ ရင်းနှီးမြုပ်နှံမှု အဆင့်တိုးတက်စေဖို့ ကျွန်တော်တို့ရဲ့ ကြီးမားတဲ့ ဈေးကွက်အတိုင်းအတာကို အခွင့်ကောင်းယူကြရပါမယ်။” ဟု ရှီကျင့်ဖျင်က ပြောကြားကာ စွမ်းအင်၊ အခြေခံအဆောက်အဦး၊ သိပ္ပံနှင့်နည်းပညာ ၊ ဉာဏ်ရည်တုနည်းပညာ စသော နယ်ပယ်များတွင် ပူးပေါင်းဆောင် ရွက်မှု များ တိုးမြင့်လုပ်ဆောင်ကြရန်လည်း ၎င်းက တိုက်တွန်းခဲ့သည်။
တောင်ကမ္ဘာခြမ်း သွေးစည်းညီညွတ်မှုအား ကြီးမားစွာပြသခဲ့သော ဖိုရမ်ဖွင့်ပွဲ အခမ်းအနားသို့ ရုရှားသမ္မတ ဗလာဒီမာပူတင်၊ အိန္ဒိယဝန်ကြီးချုပ် နာရင်ဒရာမိုဒီ နှင်အတူ အာရှအလယ်ပိုင်း၊ အရှေ့အလယ်ပိုင်း ၊ တောင်အာရှ၊ အရှေ့တောင်အာရှမှ ခေါင်း‌ဆောင်များလည်း တက်ရောက်ခဲ့ကြသည်။
၂၀၀၁ ခုနှစ် က ရှန်ဟိုင်းမြို့၌ ယူရေးရှား ခြောက်နိုင်ငံဖြင့်စတင်ဖွဲ့စည်းခဲ့သော ရှန်ဟိုင်း ပူးပေါင်း ဆောင်ရွက်ရေး အဖွဲ့(SCO) တွင် ယခုအခါ အမြဲတမ်းအဖွဲ့ဝင် ဆယ်နိုင်ငံ နှင့် လေ့လာသူ၊ ဆွေးနွေးဖက် ၁၆ နိုင်ငံလည်း ပါဝင်လာခဲ့ပြီဖြစ်သည်။
SCO အဖွဲ့ဝင်များအနေဖြင့် စစ်အေးခေတ်စိတ်သဘောထား နှင့် အုပ်စုလိုက် ထိပ်တိုက်တွေ့မှုများကို ဆန့်ကျင်ကြရန် နှင့် နိုင်ငံပေါင်းစုံ ကုန်သွယ်ရေးစနစ်ကို အားပေးကူညီကြရန် တိုက်တွန်းပြောကြားခဲ့ရာ ယင်းမှာ အိန္ဒိယကဲ့သို့ ဖွံ့ဖြိုးဆဲနိုင်ငံများအပေါ် ကြီးမားစွာရိုက်ခတ်ခဲ့သော အမေရိကန်သမ္မတ ဒေါ်နယ်ထရန့်၏ အခွန်အကောက်စစ်ပွဲကို ရည်ညွှန်းပြောဆိုခြင်းဖြစ်ကြောင်း ရိုက်တာသတင်းက ဖော်ပြသည်။
နိုင်ငံစုံဝါဒအား ထိန်းသိမ်းစောင့်ရှောက်ရာ၌ တရုတ်နိုင်ငံ၏ အခန်းကဏ္ဍမှာ အလွန်အ‌ရေးပါကြောင်း ယမန်နေ့ ဆွေးနွေးမှုတစ်ရပ်တွင် ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ် က ပြောကြားခဲ့သည်။
သတင်း-ရဲမင်း
ကိုးကား-Reuters
#နိုင်ငံတကာသတင်း