နေဝင်ငုပ်လျှိုး ရေမချိုးနှင့် ကပ်ဆိုးအဖျားဝင်လိမ့်မည်ဆိုသည့်အတိုင်း ဥတုသုံးပါးအလိုက် ရေချိုးနည်း
___________________________________
ဆောင်းဥတုတွင် ဒက္ခိဏခေါ် တောင်ဝင်ရိုးစွန်းမှ နေထွက်သည်။ ကမ္ဘာနှင့် ဝေးကွာလှသဖြင့် နေထွက်ချိန် နောက်ကျသည်။
နေနှင့်ဝေးသဖြင့် တေဇောဓာတ် အရနည်းသည်။ ထိုအခါ တေဇောဓာတ်ကိုကြောက်ရွံ့သော အဖျားပိုးတို့ ထကြွကြလေသည်။
ရောဂါပိုး အတော်များများသည် နေရောင်ခြည်ကို ကြောက်ကြသည်။ နေရောင်ခြည်တွင် သေကြသည်။
ပူမှု အေးမှု တေဇောပြုသည်။ တေဇောယုတ်က ရောဂါရသည်။ တေဇောသည် သက်စောင့်ဓာတ်ဖြစ်သည်။
သင်နေထိုင်သောအိမ်သည် နံနက်ခင်းနေရောင်ခြည် မရရှိလျှင် သင်၏အိမ်သားများသည် မကြာခဏ ဖျားနာကြလိမ့်မည်။
နေရောင်ခြည်က သင့်အိမ်သို့ မလာလျှင် သင်သည် နေရောင်ခြည်ရှိရာသို့ သွားရပေလိမ့်မည်။
မနက်ခင်း နေရောင်ခြည်ကို နာရီဝက်ခန့် ခံယူလိုက်ရုံဖြင့် သင့်အတွက် တစ်နေ့တာ လုံလောက်သော တေဇောဓာတ်ကို ရရှိပြီးဖြစ်ပေသည်။ ငွေမကုန်သော ဆေးတစ်ပါးမှာ နေရောင်ခြည်ပင်ဖြစ်ပေသည်။
မနက်ခင်းတွင် မြေကွက်လပ် ရေကူးကန်စသည်တို့တွင် နေရောင်ခြည်ခံ၍ ရေချိုးရခြင်းသည် အထူးကျန်းမာစေသည်။
ဆောင်းတွင် မနက် (၁၁) နာရီခန့်အတွင်း ရေချိုးခြင်းသည် အကောင်းဆုံးဖြစ်သည်။
ကျန်းမာသူ လူငယ်များအတွက် မနက်စောစောကပင် ရေချိုးနိုင်သော်လည်း အသက်ကြီးပိုင်း လူကြီးများမှာ ရေချိုး ဆင်ခြင်ရမည်။ နွေကိုး၊ မိုးတစ်ဆယ်၊ ဆောင်းတစ်ဆယ့်တစ် ဆိုသော စာချိုးအတိုင်းသာ ရေချိုးသင့်သည်။
နွေ(၉) မိုး(၁၀) ဆောင်း(၁၁) သည် လူကြီးများအတွက် ရေချိုးချိန် ဖြစ်ပါသည်။
မိမိကိုယ်မိမိ ကျန်းမာသည်ဆိုပြီး ညနေ(၆)နာရီ အလုပ်မှပြန်လာပြီး ရေချိုးသူလူငယ် ကုမ္ပဏီဝန်ထမ်းတစ်ဦးမှာ လွန်ခဲ့သောရက်ပိုင်းက ဖျားလာပြီး အနားမယူ ခွင့်မရသဖြင့် အလုပ်သွားခဲ့ပြီး နောက်ရက်တွင် ကိုဗစ်နိုင်တီး ကူးစက်မှုခံရသည်ဟု သိရှိရသည်။ သူ့အိမ်ရှိ လူကြီးများမိသားစုများပါ နေအိမ်အပြင် ထွက်ခွင့်မရ စောင့်ကြည့်ခြင်းခံကြရသည်။
ညနေဖက် နေဝင်ချိန် ရေချိုးခြင်းကို ရှေးဆရာကြီးများကလည်း ကန့်ကွက်ခဲ့ကြသည်။ ကျန်းမာရေးအတွက် ခွင့်မပြုကြပေ။ ရေချိုးမှားသည်ဆိုခြင်းမှာ ညနေနှင့် ညပိုင်း ရေချိုးသူများတွင် အဖြစ်များသည်ကို တွေ့ရသောကြောင့်ဖြစ်သည်။
ရေချိုးဆင်ခြင်ခြင်းသည် မမှားသောအရာဖြစ်သည်။ ညနေဖက် ရေမချိုးခြင်းသည် အကောင်းဆုံးဖြစ်ပါသည်။ မလွဲမရှောင်သာ၍ ချိုးရမည်ဆိုလျှင်လည်း လျှင်မြန်စွာချိုးပါ။ ရေနွေးစပ်ပြီးချိုးပါ။
ရေချိုးပြီးလျှင် တေဇောဓာတ်ရစေရန် ချင်းပြုတ်ရည်ပူပူလေး သို့မဟုတ် ချင်းတက်ကို ပါးပါးလှီး ရေနွေးမတ်ခွက်တစ်လုံးမှာ စိမ်ထားပြီး အုပ်ထားပြီး ကော်ဖီတစ်ခွက်စာခန့် သောက်ပေးပါ။
ရာသီဥတု ဆိုးသောအချိန် အဖျားအနာ ထူသောအချိန်များတွင် ချင်း၊ ထန်းလျက်ပြုတ်ရည် သို့မဟုတ် ကွမ်းရွက်ပြုတ်ရည်ကို မိသားစုလိုက် သောက်သုံးခြင်းဖြင့် အဖျားရောဂါများ ကူးစက်ခြင်းဘေးမှ ကာကွယ်နိုင်ပါသည်။
