ပြည်တွင်းထွက် အရည်အသွေးမြင့်ထောပတ်သီးများကို စင်ကာပူနိုင်ငံနှင့် ထိုင်းနိုင်ငံသို့ တင်ပို့သွားမည်
ယခုနှစ်တွင် ပြည်တွင်း၌ထွက်ရှိသည့် အရည်အသွေးမြင့်ထောပတ်သီးများကို စင်ကာပူနိုင်ငံနှင့် ထိုင်းနိုင်ငံသို့ တင်ပို့သွားမည်ဖြစ်ကြောင်း မြန်မာနိုင်ငံ ထောပတ်သီးစိုက်ပျိုးထုတ်လုပ်တင်ပို့ရောင်းချသူများအသင်းမှ သိရသည်။
ပြည်တွင်း၌ Hass ထောပတ်သီးစိုက် ဧကပေါင်း (၂၀၀၀၀) ရှိပြီး စက်တင်ဘာလမှ ဒီဇင်ဘာလအတွင်း နှစ်စဉ် Hass ထောပတ်သီးလှိုင်လှိုင်ထွက်ရှိကာ ပြည်တွင်းစားသုံးမှုအပြင် ပြည်ပနိုင်ငံများသို့လည်း တင်ပို့နေကြောင်း သိရသည်။
မြန်မာနိုင်ငံမှတဆင့် ပြည်ပနိုင်ငံများသို့ ထောပတ်သီးတင်ပို့ရာတွင် Hass ထောပတ်သီးများအပြင် Buccaneer ဘခန်နီးယား၊ အမရာစသည့် ထောပတ်သီးမျိုးများကိုလည်း တင်ပို့ရောင်းချလျက်ရှိကြောင်း သိရသည်။
ပြီးခဲ့သည့်နှစ် ထောပတ်သီးရာသီတွင် အရည်အသွေးမြင့် Hass ထောပတ်သီးတန်ချိန် (၃၀၀၀)ခန့် ထွက်ရှိခဲ့ပြီး ယခုနှစ်တွင် တန်ချိန်ပိုမိုထွက်ရှိရန် မျှော်မှန်းထားကြောင်း သိရသည်။
လက်ရှိတွင် ပြည်တွင်းစားသုံးမှုအနေဖြင့် အများအားဖြင့် ကိုင်းဆက်စိုက်ပျိုးထားသည့် Hass ထောပတ်သီးများနှင့် Buccaneer ထောပတ်သီးများကို ရန်ကုန်၊ မန္တလေး စသည့်မြို့ကြီးများတွင် အမြောက်အမြားတင်ပို့ရောင်းချနေကြောင်း သိရသည်။
အဆိုပါ Hass ထောပတ်သီးများကို စင်ကာပူနိုင်ငံနှင့် ထိုင်းနိုင်ငံကို အဓိကတင်ပို့လျက်ရှိသလို တရုတ်နိုင်ငံကိုလည်း မြန်မာ့ထောပတ်သီးအများအပြား တရားဝင်တင်ပို့နိုင်ရန် GACC လက်မှတ်ရရှိရန်အတွက် စိုက်ပျိုးရေးဦးစီးဌာနနှင့် မြန်မာနိုင်ငံထောပတ်သီး စိုက်ပျိုးထုတ်လုပ်တင်ပို့ရောင်းချသူများအသင်းတို့ ပူးပေါင်းဆောင်ရွက်နေကြောင်း သိရသည်။