“ရှုခင်းသာသည့် နံကိုင်းတောင်နှင့် ရှင်ပင်နံကိုင်းဘုရား”အပိုင်း (၅)

စောင်းတန်းအဆင်း၏ အရှေ့ဘက်၌ ရှင်ပင်နံကိုင်းစေတီတော်ကြီး ပြုပြင်ထိန်းသိမ်းပြီး ဘုရားစေတီအသစ်များ တည်ထားခဲ့သူ သက်တော်ရှည် ဇမ္ဗူ့မင်္ဂလာဆရာတော်ကြီးဗိမာန်တော်ရှိသည်။ ဆရာတော်ကြီးဗိမာန်ကို ဆရာတော်ဦးရာဇာနန္ဒက ၁၃၈၁ ခုနှစ်တွင် တည်ထားပြီး အတွင်း၌ ဆရာတော်ကြီး၏ ပုံတူကြေးရုပ်တုကိုလည်း ထည့်သွင်းပူဇော်ထားသည်။ ဤကြေးရုပ်တုမှာလည်း ကြေးသွန်းပညာရှင် ဦးဝင်းမောင်၏ လက်ရာပင်ဖြစ်သည်။
ဆရာတော်ကြီးဗိမာန်ဘေး၌ ၁၃၅၀ ပြည့်နှစ်က တင်လှူခဲ့သော ထီးတော်ဟောင်းကို တွေ့ရသည်။ ၁၃၈၄ ခုနှစ်က ထီးတော်အသစ် တင်လှူရာတွင် ဤထီးတော်ကို အောက်သို့ချပြီး ပြသထားခြင်းဖြစ်သည်။
စေတီတော်အရှေ့ဘက်၌ အာရုံခံဂန္ဓကုဋိတိုက်ရှိပြီး အတွင်း၌ ရုပ်ပွားတော်တစ်ဆူရှိသည်။
တောင်တက်ကားလမ်းမှ တက်လာလျှင် ဘုရားမရောက်မီ နောက်ဆုံးအကွေ့ထိပ်၌ မဟာမြတ်မုနိဟု ကမ္ပည်းထိုးထားသော ဂန္ဓကုဋိတိုက်ကြီးနှင့် ရုပ်ပွားတော်ရှိသည်။ (မဟာမုနိမဟုတ် မဟာမြတ်မုနိဟုသာ ရေးထားသည်။) ဤမဟာမြတ်မုနိ ဂန္ဓကုဋိတိုက်နှင့် ရုပ်ပွားတော်ကို မန္တလေးမှ မဟာမုနိဘုရားကြီး၏ ပုံစံအတိုင်း ဆရာတော်ကြီးက တည်ထားခြင်းဖြစ်သည်။ မဟာမြတ်မုနိ၏ အနောက်ဘက်နှင့် မြောက်ဘက်ရင်ပြင်တော် ပတ်လမ်းတို့ကနေ ပြည့်သိပ်များပြားလှသော ဘုရားတွေ၊ ကျောင်းတွေနှင့် စစ်ကိုင်းတောင်မြင်ကွင်းကျယ်ကြီးကို ရှုကြည့်နိုင်သည်။ တွေ့ရသမျှ ဘုရားတွေ၊ ကျောင်းတွေ၏ နာမည်တွေကို အကုန်အစင်မဟုတ်ဘဲ သိသလောက် စာရင်းချကြည့်လျှင်ပင် အတော်ရှည်လျားသွားနိုင်ပါသည်။
ရှင်ပင်နံကိုင်းဘုရားမှ ကားလမ်းအတိုင်းဆင်းလာလျှင် လမ်းတစ်ဝက်လောက်၌ ညာဘက်(အနောက်ဘက်)သို့ ကွေ့ဝင်သည့် လမ်းရှိသည်။ ဤလမ်းထဲဝင်သွားလျှင် တောင်တက်စောင်းတန်းနှင့် ကန့်လန့်ဖြတ် လာဆုံသည်။ လမ်းအတိုင်း အနောက်ဘက်မှတစ်ဆင့် မြောက်ဘက်သို့ ကွေ့ဝိုက်လိုက်သွားပါက ပြာပုံတောင်ပေါ်ရှိ ရွှေတိဂုံပုံတူစေတီဆီ ရောက်သွားသည်။ ဤရွှေတိဂုံပုံတူစေတီကို ဇမ္ဗူ့မင်္ဂလာဆရာတော်ကြီးကပင် တည်ထားခဲ့ခြင်းဖြစ်ပြီး ယခုအခါတွင် ကျိုက်လတ်ချောင်က ထိန်းသိမ်းစောင့်ရှောက်လျက်ရှိသည်။ ရွှေတိဂုံပုံတူစေတီအနီးကနေ ရှင်ပင်နံကိုင်းဘုရားဘက် ပြန်ကြည့်လျှင် ရှင်ပင်နံကိုင်းဘုရားနှင့်တကွ ကြေးသွန်းရုပ်ပွားတော်ကြီး၊ မဟာမြတ်မုနိဘုရား၊ စေတီငယ်များ၊ သစ်ရိပ်ဝါးရိပ်များဖြင့် စိမ်းစိုသာယာသော လွမ်းမောဖွယ် နံကိုင်းတောင်ကြီးကို တွေ့မြင်ရလေသည်။
ရှင်ပင်နံကိုင်းဘုရားသည် စစ်ကိုင်း ဝါတွင်းဘုရားစဉ်၌ ခုနစ်ဆူမြောက်ဘုရားဖြစ်ပြီး ဝါခေါင်လကွယ်နေ့တွင် ဆွမ်းတော်ကြီးကပ်လှူကာ ဘုရားပွဲပြုလုပ်ကြသည်။ ဘုရားပွဲ၌ ဇာတ်ပွဲထည့်လေ့ရှိပြီး စစ်ကိုင်းမြို့ပေါ်၌ စည်စည်ကားကားရှိလှသော ဘုရားပွဲဖြစ်လေသည်။
ဇမ္ဗူ့မင်္ဂလာဆရာတော်ကြီးသည် ရှင်ပင်နံကိုင်းဘုရားကို နှစ်ရှည်လများ ထိန်းသိမ်းစောင့်ရှောက်ကာ ပြုပြင်မွမ်းမံခဲ့သလို ရှင်ပင်နံကိုင်းရင်ပြင်တော်နှင့် ပတ်ဝန်းကျင်တွင် ဘုရားစေတီများ တည်ထားခဲ့သည်သာမက သက်တော်ရာကျော်ဆရာတော်ကြီးလည်း ဖြစ်ခြင်းကြောင့် ဆရာတော်ကြီး၏ ထေရုပ္ပတ္တိအနည်းငယ်ကို ရေးသားဖော်ပြရပါဦးမည်။
သက်တော်ရှည်ဇမ္ဗူ့မင်္ဂလာဆရာတော်ကြီး ဘဒ္ဒန္တဇနိန္ဒကို ဦးထွန်းသာ-ဒေါ်ဖွားရှိန်တို့က တန့်ဆည် မြို့နယ် အောင်ချမ်းသာရွာ၌ ၁၂၇၉ ခုနှစ် ဝါဆိုလဆန်း ၈ ရက်တွင် ဖွားမြင်သည်။ မွေးချင်းခြောက်ယောက်အနက် ပဉ္စမမြောက်ဖြစ်သည်။
လေးနှစ်သားအရွယ်တွင် တန့်ဆည်မြို့နယ် နဘက်ကြီးဥမင်ကျောင်းဆရာတော်၏ အစိုးရမြန်မာမူလတန်းကျောင်းတွင် ခြောက်တန်းအောင်သည်အထိ ပညာသင်ခဲ့သည်။ အသက် ၁၂ နှစ်တွင် ဥမင်ကျောင်းဆရာတော် ဦးဝိစာရကို ဥပဇ္စျယ်ပြု၍ ရှင်ဇနိန္ဒဘွဲ့မည်ဖြင့် ရှင်သာမဏေပြုသည်။ ၁၂၉၈ ခုနှစ် တပေါင်းလဆန်း ၈ ရက်နေ့တွင် ဥမင်ကျောင်းဆရာတော်ဦးအာစာရကို ဥပဇ္စျယ်ပြု၍ ရဟန်းအဖြစ်သို့ ရောက်ရှိခဲ့သည်။
ငယ်စဉ်က ဥမင်ကျောင်းဆရာတော်များဖြစ်သော ဦးဝိစာရနှင့် ဦးအာစာရတို့ထံတွင် လောကုတ္တရာအခြေခံများ သင်ယူပြီး စစ်ကိုင်းမြို့ မိဂဒါဝုန်ဆရာတော်၊ မန္တလေးမြို့ ခင်မကန်၊ မိုးကောင်း၊ ဂွေးချို၊ ချမ်းသာကြီး၊ စရေနှင့် တောင်သမန်တိုက်တို့တွင် ပိဋကတ်ကျမ်းစာများ ဆက်လက်သင်ယူခဲ့သည်။ ဒုတိယကမ္ဘာစစ် ဖြစ်ချိန်တွင် စစ်ကိုင်း ဇမ္ဗူ့မင်္ဂလာချောင်သို့ရောက်ရှိပြီး ဂျပန်ကျောင်း၌ ကျောင်းထွက်လက်မှတ်ရသည်အထိ တက်ရောက်သည်။ ထို့နောက် မန္တလေးမှ ဆရာဦးညွန့်တင်၏ အေဝမ်းမက်ထရစ်ကျောင်းတွင် ကိုးတန်းကျောင်းထွက်လက်မှတ်ရသည်အထိ ပညာသင်ခဲ့လေသည်။
ဇမ္ဗူ့မင်္ဂလာချောင်၌ ဒုတိယတိုက်အုပ်ဆရာတော်အဖြစ် ဆောင်ရွက်ရင်း စာသင်သားများအား စာဝါပို့ချရသည်။ ဇမ္ဗူ့မင်္ဂလာချောင်ဆရာတော် ဦးကေတက ပျံလွန်တော်မူသည်တွင် စာသင်သားများကို အုပ်ချုပ်ကာ ကျောင်းတိုက်ကို ဦးစီးဦးဆောင်ပြုခဲ့ရသည်။
ဆရာတော်ကြီးသည် ဆဋ္ဌသင်္ဂါယနာတင်ပွဲတွင် ပါရာဇိကဏ်ဘာဏက၊ စစ်ကိုင်းတိုင်း ရွှေကျင်သံဃနာယက သြဝါဒါစရိယ၊ သီတဂူရေအလှူတော်ဥက္ကဋ္ဌတာဝန်များ ဆောင်ရွက်ခဲ့သည်။ ၁၃၇၄ ခုနှစ်မှစ၍ စစ်ကိုင်းတောင်ရိုး မဟာဂန္ဓာရုံ ဝိနည်းစာပြန်ဌာနဥက္ကဋ္ဌအဖြစ် တာဝန်ယူခဲ့ရာ တစ်ဘဝချုပ်ငြိမ်းသည့်အချိန်အထိဖြစ်သည်။
သမိုင်းဝင်ရှင်ပင်နံကိုင်းစေတီတော်ကြီးနှင့် စေတီရံ ၁၂ ဆူအပြင် ဇမ္ဗူ့မင်္ဂလာကျောင်းတိုက် ပတ်ဝန်းကျင်ရှိ ငလျင်ဒဏ်ကြောင့် ပျက်စီးနေသော သက်တော်ရ၊ သက်တော်ရှည်၊ ဆုတောင်းပြည့်၊ ဆုတောင်းရ၊ မြတ်စောညီနောင်နှင့် ချမ်းသာရဘုရားတို့ကို ပြုပြင်ခဲ့သည်။ နံကိုင်းတောင်ပေါ်တွင် ကြေးသွန်းရုပ်ပွားတော်ကြီး၊ မဟာမုနိပုံတူရုပ်ပွားတော်နှင့် ဂန္ဓကုဋိတိုက်၊ ပြာပုံတောင်ပေါ်တွင် ရွှေတိဂုံပုံတူစေတီတို့ကို တည်ထားခဲ့သည်။
ထို့ပြင် ရှင်ပင်နံကိုင်းဘုရား၌ အောင်မြေစေတီ၊ အဘယစေတီနှင့် လာဘမုနိစေတီ ၈ ဆူတို့ကို တည် ထားခဲ့သည်။ နံကိုင်းတောင်တက်ကားလမ်းလည်း ဖောက်လုပ်ခဲ့သည်။ ရှင်ပင်နံကိုင်းသို့ လာရောက်ကြသော ဘုရားဖူးများ မပင်မပန်း ချမ်းသာစွာတက်ရောက် ဖူးမြော်နိုင်ရေးအတွက် ဓာတ်လှေကားတပ်ဆင်လှူဒါန်းရန် ဆန္ဒရှိခဲ့သော်လည်း မဆောင်ရွက်ဖြစ်ခဲ့ပေ။
အပိုင်း(၆) ဆက်ရန်။