ပုံမပေါ်ရင် ဘဝ ဇာတိတွေ မလာတော့ပါဘူး…
ကလေးတယောက်ဖြစ်လာရင် အချိန်တန်ရင် နို့စို့တတ်မယ်။ သင်စရာမလိုဘူး။ လေးဖက်သွားတတ်မယ်၊ မတ်တပ်ရပ်တတ်မယ်၊ လမ်းလျှောက်တတ်မယ်၊ ဘယ်သူမှ သင်ပေးစရာ မလိုဘူး။ အချိန်တန်ရင် သူ့ဟာသူ တတ်လာမှာ။ သင်စရာမလိုပဲ လုပ်တတ် သွားတတ်တာ နိယာမတရားပေါ့။ အဲဒီအပေါ်မှာ ငါမကပ်စေနဲ့။ ကြက်ဥကလဲ ဥပြီးရင် သူ့ဥသူ ဝပ်မှာဘဲ၊ ဒါနိယာမတရားပေါ့။ သင်ပေးစရာမလိုပါဘူး။ ငါလုပ်ပေးစရာမလိုပါဘူး။
အကြည်ရှိရင် မြင်မှာ ကြားမှာပဲ။ မမြင်ချင် မကြားချင်ရင် အပိုဖြစ်ပြီ။ ကြားတဲ့အတိုင်း မြင်တဲ့အတိုင်း မထားဘဲ မြင်တဲ့ ကြားတဲ့အပေါ်မှာ ချောတယ်၊ လှတယ်၊ ကောင်းတယ်၊ မကောင်းဘူးဆိုတာ မရှိဘူးနော်။ မြင်တဲ့အပေါ်မှာ ကိုယ့်မျက်စေ့မှာ အရိပ်အတိုင်းမထားဘဲ ယောက်ျားပဲ၊ မိန်းမပဲ၊ သီလရှင်ပဲ၊ ရဟန်းပဲလို့ သွားလုပ်နေကြတယ်။ သူ့နိယာမ မြင်တာက အမှန်၊ ပြီးမှ ယောက်ျား၊ မိန်းမ သွားလုပ်တာ။ မြင်တဲ့ နိယာမမှာ အစိမ်း၊ အဝါ၊ အမဲ၊ အနီမရှိဘူး မပါဘူးနော်၊ မြင်တာ တခုပဲ ရှိတာ။ ဒွါရ ၆ ပေါက်မှာလဲ သူ့နိယာမနဲ့ အတူ ရှိပြီးသား။ နားကလဲ ကြားတာ တခုပဲ။ ကြားပြီးမှ ယောကျ်ားသံ၊ မိန်းမသံ၊ ခွေးသံ၊ ငှက်သံ၊ သီချင်းသံလို့ သွားလုပ်နေကြတာ။ ချိုတယ်၊ ချဥ်တယ်၊ ငံတယ်၊ ခါးတယ် မရှိဘူးနော်။ ချဥ်ရင်လဲ ချဥ်တဲ့ဓါတ်ကိုဘဲ လျာအကြည်က သိမှာနော်။ ပြီးမှ သံပရာသီးလို ချဥ်တာ၊ ရှောက်သီးလို ချဥ်တာလို့ ပြန်ခွဲကြတယ်။ ဒါကလဲ လောကအသုံးအဆောင် ကိုယ်စားနေကျအရသာကို ပြန်သိကြတာလေ။ နိယာမပဲပေါ့။
မျက်စေ့၊ နား၊ နှာ၊ လျှာ၊ ကိုယ်၊ မနော ဆိုတဲ့ ၆ ပေါက် ၆ ဒွါရမှာ နိယာမတရားကို မြင်အောင် ကြည့်ကြရမယ်။ သွားလာ နေထိုင်ရင်း စိစစ်ကြပါ။ ဒါက ခန္ဓာနဲ့ ဒါရိုက်သွားကြရမှာ။ မြင်ရင် နိယာမတိုင်း မြင်တာ ထားရမှာ၊ နိယာမကို ဖောက်ဖျက်ပြီး မိုင်လွန်နေကြတယ်။ ကြားမှုအပေါ်မှာ အသံတသံကြားရင် အသံက အသံပဲနော်။ ကိုယ်က သွားဆင်ခြင်ပြီး အကြောင်း သင်္ခါရလုပ်လို့ သညာက ခွေးသံ ကြက်သံ ငှက်သံလို့ သွားလုပ်တာ။ သညာချုပ်ရင် ခွေးသံ ကြက်သံလို့ မလိုက်တော့ဘူး။ အသံက အသံအတိုင်းဘဲ။ ကြားတာဘဲ ရှိတော့တယ်။ ပြန်ပြန် ဆင်ခြင်ကြရမယ်နော်။
အကြောင်းသိမ်းရင် သညာသိမ်းမယ်။ အကြောင်းသိမ်းရင် သင်္ခါရလဲ သိမ်းမယ်။ ဘာသံပါလိမ့်ဆိုပြီး သင်္ခါရသွားမလုပ်ရင် သညာမလာတော့ဘူး။ သညာမလာရင် ပုံမပေါ်တော့ဘူး။ ပုံမပေါ်ရင် ဘဝ ဇာတိတွေ မလာတော့ပါဘူး။ ပုံတွေကို စွဲခဲ့လို့ သညာပေးတိုင်း ပုံတွေ ပေါ်ပေါ်နေကြတာ။ အာရုံပုံတွေကို ဖျက်နိုင်ရမယ်။ ပုံပျက်တော့ မစုံမက်တော့ဘူးပေါ့။ ပုံမပေါ်လို့ ဘဝ ဇာတိတွေထပ်မလာတော့ရင် ခန္ဓာဇာတ်သိမ်း အေးငြိမ်းပါပြီ။
📌 ဆရာကြီး ဒေါ်ပညာသိရီ (အမိုးညာ) – ဝိဇ္ဇောဒယသဲအင်းဂူရိပ်သာ ပြည်မြို့
#ဓမ္မအသိဖြင့်အကျိုးရှိရှိနေမည်
