ရင့်ကျက်မှု … တဲ့
ရင့်ကျက်တယ် ဆိုတာကရော ဘာအဓိပ္ပာယ်လဲ ၊ ကိုယ်တိုင်ရော တကယ်ကျင့်သုံးနိုင်ပြီလား ။ ကိုယ် ဘယ်လို နားလည်လက်ခံထားလဲ. . .
Maturity ဆိုတာ အိ နားလည် လက်ခံထားတာကတော့ ကိုယ့် စိတ်အခြေအနေကို အမှန်အတိုင်း သိပြီး ကိုယ့်စိတ်ခံစားချက်တွေကို ထိန်းချုပ်နိုင်ခြင်းလို့ မြင်တယ် ။ ဟုတ်တယ်လေ ။ လူတိုင်း ဒေါသထွက်ဖူးတယ် ။ ဒေါသထွက်တိုင်း တွေ့ရာ မြင်ရာ လွှတ်ပစ် ၊ ထုရိုက် ၊ ကုတ်ဆွဲ ၊ အော်ဟစ် သောင်းကျန်းနေတဲ့သူကို ပညာတတ် လူကြီးဆန်တယ် မြင်မလား ၊ ကလေးဆန် ရိုင်းစိုင်းတယ် မြင်မလား ။
လူတိုင်း အသည်းကွဲဖူးကြတယ် ။ အဲဒီလိုကြုံတွေ့တိုင်း ခံစားချက်ကို ရှေ့တန်းတင် ငိုယိုပြ ၊ drama queen အဖြစ် ခံစားပြတဲ့သူကို သနားဖို့ကောင်းတယ်လို့ မြင်မလား ၊ အပိုလုပ်တယ်လို့ မြင်မလား ။ လူတိုင်း ဘဝမှာ ထိုးနှက်ချက်တွေ ကြုံဖူးတယ် ၊ ကျရှုံးဖူးတယ် ဒါတွေ ကြုံရတိုင်း ငါတစ်ယောက်တည်း ကံဆိုးလွန်းလှပါတယ် ၊ ငါ သနားဖို့ ကောင်းလှပါတယ် ၊ ငါ့ဘဝ ဆိုးလွန်းပါတယ် ၊ ညည်းတွား နေသူရဲ့ ဘေးမှာ အပေါင်းအသင်း သူငယ်ချင်း ဘယ်နှယောက် ကြာရှည်ပေါင်းသင်းနိုင်မယ် ထင်သလဲ ။
အဲဒါပါပဲ ၊ တချို့လူတွေဟာ အသက်အရွယ်ကြီးပြင်းလာပေမဲ့ သူတို့ရဲ့ maturity levelက ကြီးပြင်းမလာကြဘူး ။ matureမဖြစ်တဲ့အတွက် တစ်ခုခုဆို ကလေးဆန်ဆန် ပြုမူတတ်ကြတယ် ။ ကလေးဆန်တတ်တယ်ဆိုတာ ကလေးအရွယ်ပဲ ကြည့်ကောင်းတာလေ ၊ ဒါတောင် လမ်းမှာ ဂျီကျ အော်ငိုနေတဲ့ ကလေးတွေကို မိဘတွေ စိတ်မရှည်နိုင်တော့ ဘဲ ဆော်ပလော်တီးကြတာ အများကြီးပဲ ။
အဲဒီတော့ အသက်အရွယ်နဲ့ မလိုက်ဖက် ပြုမူပြောဆို နေထိုင်ပြီးမှ တစ်ခုခုဆို excuse လိုလို ဘာလိုလိုနဲ့ တို့က သိပ်ကလေးဆန်တာ ဆောရီးပါလို့ ဆင်ခြင်ပေးလိုက်ခြင်းဟာ ချစ်စဖွယ်မကောင်းဘဲ မုန်းစရာကြီးဖြစ်နေတယ် ဆိုတာ သိစေချင်တာပါ ။
လူမှန်ရင် society ထဲမှာ လိုက်လျောညီထွေဖြစ်အောင် နေထိုင်ရပါမယ် ။ ကိုယ့်အသက်အရွယ် ၊ ကိုယ့်ပညာ ၊ ကိုယ့်အဆင့်အတန်းနဲ့ ကိုက်ညီအောင် ပြုမူပြောဆို နေထိုင်တတ်ရပါမယ် ။ စိတ်ဆိုးတာ ၊ ဝမ်းနည်းတာ ၊ ရှုံးမဲ,မဲတာ ၊ ဒေါသအလျောက် ပြုမူတာ အဲဒီလို emotions တွေကို ထိန်းချုပ်နိုင်ရပါမယ် ။ လူလူချင်း respect ပေးတတ်ရပါမယ် ။
ပြဿနာတစ်ခုကြုံရတိုင်း ၊ အခက်အခဲ ကျရှုံးမှုတွေ ကြုံရတိုင်း စိတ်ခံစားချက်နောက် လိုက်ပြီး စိတ်ထင်ရာ လုပ်နေတတ်ရင် သင့်ကို ငပေါကြီးလို့ပဲ မြင်ပါလိမ့်မယ် ။ အိ ကိုယ်တိုင်လည်း ကြိုးစားဆဲပါ ။ အပြောလွယ်ပြီး ကျင့်သုံး ရတာခက်တဲ့ maturity level ကို အသက်အရွယ်အလိုက် လူတိုင်းမှာ ရှိစေချင်တာပါ ။
- ချစ်သော အိချို
