ဇူလိုင် ၃၀-၃၁ ညမှာ မြင်ရမယ့် ကြယ်ကြွေမိုး ဖြစ်စဉ်
နက္ခတ်တာရာ ကြည့်ရှုလေ့လာရတာကို ဝါသနာပါတဲ့သူတွေအတွက် လာမယ့် ဇူလိုင် ၃၀ ရက်၊ ညသန်းခေါင်ကျော်မှ ဇူလိုင် ၃၁ ရက် မနက်မိုးမလင်းခင်အထိ ဟာ ထူးခြားတဲ့ ကြယ်ကြွေမိုး ဖြစ်စဉ် နှစ်ခုကို တစ်ပြိုင်တည်း မြင်တွေ့ရမယ့် အခွင့်အရေးတစ်ခုရှိပါတယ်။
အခု ကြယ်မိုးရွာခြင်း ဖြစ်စဉ်ကိုတော့ တစ်ကမ္ဘာလုံးနီးပါးက မြင်တွေ့ရမှာဖြစ်ပြီး ကျွန်တော်တို့ မြန်မာနိုင်ငံကလည်း မြင်တွေ့ရမှာပါ။
ကြယ်မိုး အများဆုံး ကြွေမယ့်ညက ယနေ့ည ဇူလိုင် ၃၀ ရက် နေ့ ည သန်းခေါင်ကျော် ကနေ ဇူလိုင် ၃၁ ရက် အာရုံတက်ချိန်အထိ ဖြစ်ပါတယ်။
ဒီ ဇူလိုင် ၃၀-၃၁ ညမှာ မြင်တွေ့ရမယ့် ကြယ်ကြွေမိုး နှစ်ခုကတော့
Southern Delta Aquariids နဲ့ Alpha Capricornids လို့ခေါ်တဲ့ ဥက္ကာခဲရပ်ဝန်းနှစ်ခုဖြစ်ပါတယ်။
Southern Delta Aquariids မှာရှိတဲ့ ဒီဥက္ကာခဲတွေဟာ အများအားဖြင့် အရောင်မှိန်ပြီး တသမတ်တည်း ကျတတ်ပါတယ်။ သူတို့ကြွေကျလာတဲ့ အချိန်မှာကောင်းကင်မှာ ရှည်လျားတဲ့ အမြီးတန်းလေးတွေကို ချန်ထားခဲ့တတ်ပါတယ်။
Alpha Capricornids က ဥက္ကာခဲတွေကတော့ အရေအတွက် သိပ်မများပေမယ့် အရမ်းကို တောက်ပပြီး ကံကောင်းရင် မီးလုံးကြီးတွေလို မြင်ရတတ်ပါတယ်။ တစ်ခါတလေ ပေါက်ကွဲသလိုမျိုးလည်း တွေ့ရတတ်တာကြောင့် အလွန်စိတ်ဝင်စားစရာ ကောင်းပါတယ်။
ဒီဥက္ကာခဲ နှစ်မျိုးစလုံးရဲ့ ကြွေမယ့်အချိန်ဟာ တစ်ပြိုင်တည်း နီးနီး ဖြစ်ပေါ်မှာဖြစ်လို့ ကောင်းကင်မှာ အမှောင်ဆုံးနေရာဆိုရင် တစ်နာရီကို ဥက္ကာခဲပေါင်း ၂၅ လုံး အထိ မြင်တွေ့နိုင်မယ်လို့ ခန့်မှန်းထားကြပါတယ်။
အရေးကြီးဆုံးကတော့ မြို့ပြအလင်းရောင် ကင်းဝေးတဲ့နေရာ ဒါမှမဟုတ် အလင်းရောင် အနည်းဆုံး နေရာ မျိုးကို ရွေးချယ်သင့်ပါတယ်။ ညကောင်းကင်ပြင်ကို ပွင့်ပွင့်လင်းလင်း မြင်နိုင်ပြီး အဆောက်အဦတွေ၊ သစ်ပင်တွေ ကွယ်နေတာမျိုး မရှိရင် အကောင်းဆုံးပါပဲ။မိုးရာသီမလို့ မိုးတိမ်ထူထပ်နေတဲ့နေရာတွေကတော့ မြင်ရဖို့ခက်ပါလိမ့်မယ်။
လာမယ့် ဇူလိုင် ၃၀-၃၁ ညမှာ ကောင်းကင်ကို ကျွန်တော်တို့နဲ့ အတူတူလိုက်ကြည့်ပြီး သဘာဝရဲ့လှပတဲ့ ကြယ်ကြွေမိုးဖြစ်စဉ်ကို ခံစားဖို့ MASES စာဖတ်ပရိတ်သတ် တွေကို ဖိတ်ခေါ်လိုက်ပရစေ။
~MASES/Soe pyae htat