◼ ဗိုလ်ချုပ်မှူးကြီးမင်းအောင်လှိုင် ယာယီသမ္မတတာဝန် ဆက်ယူ၊ ပြည်ထောင်စုအစိုးရအဖွဲ့တွင် နိုင်ငံတော်ဝန်ကြီးချုပ်အဖြစ် ဦးညိုစောကို ခန့်အပ်
ယနေ့(ဇူလိုင် ၃၁ ရက်) တွင်ကျင်းပသည့် ကာကွယ်ရေးနှင့်လုံခြုံရေးကောင်စီအစည်းအဝေးတွင် ဗိုလ်ချုပ်မှူးကြီးမင်းအောင်လှိုင်သည် ယာယီသမ္မတတာဝန်ဆက်ယူထားပြီး ပြည်ထောင်စုအစိုးရအဖွဲ့တွင် နိုင်ငံတော်ဝန်ကြီးချုပ်အဖြစ် ဦးညိုစောကို ခန့်အပ်ကြောင်းထုတ်ပြန်သည်။
နိုင်ငံတော်ဝန်ကြီးချုပ်ဦးညိုစောသည် ဗိုလ်ချုပ်မှူးကြီးမင်းအောင်လှိုင်၏ အကြံပေးပုဂ္ဂိုလ်၊ နစကအဖွဲ့ဝင်အဖြစ်ဆောင်ရွက်ခဲ့သူဖြစ်သည်။
နိုင်ငံတော်ကာကွယ်ရေး၊ လုံခြုံရေးနှင့်အေးချမ်းသာယာရေး၊ အထွေထွေ ရွေးကောက်ပွဲအောင်မြင်စွာကျင်းပနိုင်ရေးတို့အတွက် လိုအပ်သည့်လမ်းညွှန်မှုနှင့်ထိရောက်စွာ ပေါင်းစပ်ညှိနှိုင်းဆောင်ရွက်နိုင်ရန် နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ကိုဖွဲ့စည်းကြောင်းလည်း ဆက်လက်ထုတ်ပြန် သည်။
ယင်းကော်မရှင်တွင်ဗိုလ်ချုပ်မှူးကြီးမင်းအောင်လှိုင်က ဥက္ကဋ္ဌ၊ ဒုတိယဗိုလ်ချုပ်မှူးကြီးစိုးဝင်းက ဒုတိယဥက္ကဋ္ဌ၊ ဝန်ကြီးချုပ်ဦးညိုစောအပါအဝင် ကာကွယ်ရေး၊ ပြည်ထဲရေး၊ နယ်စပ်ရေးရာ၊ နိုင်ငံခြားရေးဝန်ကြီးဌာနဝန်ကြီးများ၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီးကျော်စွာလင်းတို့အဖွဲ့ဝင်အဖြစ်ပါဝင်ပြီး ဗိုလ်ချုပ်ကြီးရဲဝင်းဦးကို အတွင်းရေးမှူးအဖြစ်ခန့်အပ်ထားသည်။
ပြည်ထောင်စုအစိုးရအဖွဲ့အသစ်တစ်ခုကိုလည်းဖွဲ့စည်းလိုက်ပြီး ယင်အစိုးရအဖွဲ့ သစ်တွင်ဝန်ကြီးဌာနစုစုပေါင်း ၂၉ ခုပါဝင်ပြီး နစကအစိုးရအဖွဲ့တွင် ပြည်ထောင်စုဝန်ကြီးအဖြစ်ဆောင်ရွက်ခဲ့သူအများစုကို ဝန်ကြီးအဖြစ်ပြန်လည်ခန့်အပ်ထားသည်။
နစကအတွင်းရေးမှူးနှင့် တွဲဖက်အတွင်းရေးမှူးအဖြစ်ဆောင်ရွက်ခဲ့သည့် ဗိုလ်ချုပ်ကြီးအောင်လင်းဒွေးနှင့် ဗိုလ်ချုပ်ကြီးရဲဝင်းဦးတို့သည် ယခုဖွဲ့စည်းပုံအသစ်အရ အမျိုးသားကာကွယ်ရေးနှင့်လုံခြုံရေးကောင်စီ အမှုဆောင်ချုပ်နှင့် တွဲဖက်အမှုဆောင်ချုပ်များဖြစ်လာသည်။
နစကသည် အထွေထွေရွေးကောက်ပွဲကို ယခုနှစ်ဒီဇင်ဘာလကုန်တွင်ကျင်းပမည်ဟုထုတ်ဖော်ပြောဆိုပြီးနောက် ခြောက်လတစ်ကြိမ်သက်တမ်းတိုးနေသည့် အရေးပေါ်ကာလကုန်ဆုံးချိန် ယနေ့ကာလုံအစည်းအဝေးတွင် အရေးပေါ်အခြေအနေကိုပယ်ဖျက်ကာ အစိုးရအဖွဲ့အသစ်ဖွဲ့စည်းခဲ့ခြင်းဖြစ်သည်။
နိုင်ငံတဝန်းအရေးပေါ်အခြေအနေသတ်မှတ်ကြေညာကာ တပ်မတော်ကာကွယ်ရေးဦးစီးချုပ်ထံ အာဏာလွှဲပြောင်းအပ်နှင်းသည့် အမိန့်ကိုပယ်ဖျက်ကြောင်းကြေညာသည့်နေ့မှစ၍ ခြောက်လအတွင်း အထွေထွေရွေးကောက်ပွဲကျင်းပပေးရမည်ဖြစ်ကြောင်း ၂၀၀၈ အခြေခံဥပဒေပုဒ်မ ၄၂၉ တွင် ပြဌာန်း ထားသည်။
သတင်း - စံတော်ချန်ဒစ်ဂျစ်တယ်
#ပြည်တွင်းသတင်း
