ထိုင်ဝမ် F4 မင်းသမီးရဲ့အုတ်ဂူဆီ မိုးရွာရွာ၊ နေပူပူ နေ့တိုင်းလာလေ့ရှိတဲ့ ခင်ပွန်းဖြစ်သူ အဆိုတော်DJ Koo

ကွယ်လွန်သွားပြီဖြစ်တဲ့ ထိုင်ဝမ် F4 မင်းသမီးဘာဘီဆုရဲ့ခင်ပွန်းဖြစ်သူ တောင်ကိုရီးယားအဆိုတော် DJ Koo ကို ထိုင်ဝမ်ရှိ Chin Pao San သင်္ချိုင်းမှာ လူမှုကွန်ယက်အသုံးပြုသူတစ်ဦးက မြင်တွေ့ခဲ့ပြီး DJ Koo က ၅ လကြာတဲ့အထိ ဝမ်းနည်းပူဆွေးလို့နေပါတယ်။ ဘာဘီဆုရဲ့အုတ်ဂူဆီ မိုးရွာရွာ၊ နေပူပူ နေ့တိုင်းလာလေ့ရှိတယ်လို့ သိရပါတယ်။

လူမှုကွန်ယက်အသုံးပြုသူတစ်ဦးက အခုလို ပြန်ပြောပြခဲ့တာပါ။ ဘာဘီဆုရဲ့အုတ်ဂူဆီ ပန်းစည်းလာချဖို့ သင်္ချိုင်းကို အဖွဲ့လိုက် လာတဲ့အချိန် အမျိုးသားတစ်ဦး တစ်ယောက်တည်းထိုင်နေတာကို မြင်တွေ့ခဲ့ရတယ်။ အဲ့အမျိုးသားနား ကပ်သွားလိုက်တော့ DJ Koo ဖြစ်နေခဲ့တယ်။ DJ Koo က သူ့အမျိုးသမီးရဲ့အုတ်ဂူဆီ ပန်းစည်းလာချပေးလို့ သူတို့ကို ကျေးဇူးတင်ခဲ့တယ်လို့ ဆိုပါတယ်။

ဘာဘီဆုရဲ့အုတ်ဂူရှေ့မှာ ထိုင်ခုံနဲ့ထိုင်နေတဲ့ DJ Koo ကို ပုံမှာ မြင်တွေ့ရပါတယ်။ DJ Koo က ဘာဘီဆုဆီ နေ့တိုင်းလာတယ်လို့ သင်္ချိုင်းမှာ အလုပ်လုပ်တဲ့သူရဲ့သမီးဖြစ်သူပြောစကားအရ သိရပါတယ်။

ဘာဘီဆုဟာ တရုတ်နှစ်သစ်ကူးအားလပ်ရက်အတွင်း ဂျပန်နိုင်ငံကို အလည်အပတ်ခရီးထွက်ရင်း အဆုတ်ရောင်ရောဂါကူးစက်ခံရပြီး ကွယ်လွန်သွားခဲ့တာပါ။ အစက သူ့ရဲ့မိသားစုဟာ သူ့ကို သစ်ပင်တစ်ပင်အောက်မှာ မြှုပ်ဖို့ စီစဉ်ခဲ့တာပါ။ သူအလိုရှိတိုင်း သွားရောက်လို့ ရတဲ့ နေရာမှာ ထားရှိလိုတဲ့ DJ Koo ရဲ့ဆန္ဒအရ မြှုပ်မယ့်နေရာကို ပြောင်းလဲခဲ့တာပါ။

ဘာဘီဆု အသက် ၂၀ ဝန်းကျင်လောက်မှာ DJ Koo နဲ့ တွေ့ဆုံခဲ့ပြီး သူတို့ လမ်းမခွဲခင် အချိန်ခဏ တွဲခဲ့ကြပါတယ်။ နောက်ပိုင်းမှာ ဘာဘီဆုက တရုတ်စီးပွားရေးလုပ်ငန်းရှင် ဝမ်ရှောင်ဖိုင်းနဲ့ လက်ထပ်ခဲ့ပါတယ်။ ဘာဘီဆု ကွာရှင်းပြီးနောက် ၂၀၂၂ ခုနှစ်မှာ DJ Koo နဲ့ ပြန်တွဲခဲ့ပြီး မကြာခင်မှာ လက်ထပ်ခဲ့ကြပါတယ်။