◼ YBS ယာဉ်မောင်းများစည်းကမ်းဖောက်ဖျက်မှုများထဲတွင် မီးနီဖြတ်မောင်းမှုနှင့် ဘေးတံခါးဖွင့်မောင်းမှု အများဆုံးဖြစ်ဟုဆို
YBS ယာဉ်မောင်းများစည်းကမ်းဖောက်ဖျက်မှုများထဲတွင် မီးနီဖြတ်မောင်းမှုနှင့် ဘေးတံခါးဖွင့်မောင်း မှုမှာအများဆုံးဖြစ်ကြောင်း ရန်ကုန်တိုင်းဒေသကြီးပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC)ထံမှသိရသည်။
YRTC မှ အဆိုပါ YBS ယာဉ်မောင်းများနှင့်အတူ အသိပညာပေးဆွေးနွေးပွဲ အမှတ်စဉ် (၁၄/၂၀၂၅)ကို ပြုလုပ်ခဲ့ပြီး စည်းကမ်းဖောက်ဖျက်သူ ယာဉ်မောင်း စုစုပေါင်း ၁၀၀ ဦး တက်ရောက်ခဲ့ကြောင်း ထုတ်ပြန်ထားသည်။
စည်းကမ်းဖောက်ဖျက်မှုများအနက် မီးနီဖြတ်မောင်းသူ ၂၉ ဦး၊ ယှဉ်ပြိုင်ကျော်တက်သူ ၁၁ ဦး၊ ဘေးတံခါးဖွင့်မောင်းသူ ၄၃ ဦး၊ ကီလိုကျော်မောင်းနှင်သူခုနစ်ဦး၊ မှတ်တိုင်စနစ်တကျမရပ်သူတစ်ဦး၊ ဘရိတ်ဆောင့်နင်းသူ တစ်ဦး၊ အရှိန်ပြင်းမောင်းနှင်သူရှစ်ဦးဖြစ်ကြောင်း YRTC ၏ ထုတ်ပြန်ချက်အရ သိရသည်။
ပြီးခဲ့သည့် ၂၀၂၃ ခုနှစ်တွင်လည်း ဘေးတံခါးဖွင့်မောင်းသဖြင့် ခရီးသည်ပြုတ်ကျသေဆုံးသူ ခြောက်ဦး အထိရှိခဲ့ပြီး သေဆုံး၊ဒဏ်ရာရမှုများကျဆင်းစေရန်နှင့် ယာဉ်မောင်းများ စနစ်တကျဖြစ်စေရေးအတွက် ယခုကဲ့သို့ ဆွေးနွေးပွဲများပြုလုပ်ရခြင်းဖြစ်ကြောင်း၊ ထိုသို့ပြုလုပ်ခဲ့၍ ၂၀၂၄ ခုနှစ်တွင် ခရီးသည်ပြုတ်ကျသေဆုံးသူနှစ်ဦးအထိရှိခဲ့ကြောင်း YRTC ၏ ဒုတိယဥက္ကဋ္ဌ ဦးချစ်ကိုကိုကဆိုသည်။
YBS ယာဉ်များအချင်းချင်း ကျော်တက်မောင်းနှင်ကြခြင်း၊ လမ်းပြောင်းပြန်မောင်းနှင်ခြင်း၊ မီးနီဖြတ်သန်းမောင်းနှင်ခြင်း၊ သတ်မှတ်ကီလိုထက် မောင်းနှင်ခြင်းတို့ကို YRTC က လုံးဝခွင့်လွှတ်မည် မဟုတ်ကြောင်းကိုလည်း ၎င်းကဆက်လက်ပြောသည်။
YBS ယာဉ်မောင်း ၄၀၀၀ ဦးခန့်သည် ခရီးသည် ၁ ဒသမ ၅ သန်းခန့်အား နေ့စဉ်ပို့ဆောင်ပေးလျက် ရှိကြောင်း၊ YBS ယာဉ်မောင်းနှင်ခွင့် လျှောက်ထားရာတွင် ယာဉ်ကြီးမောင်းသင်တန်းတက်ရောက်ပြီး သူများလည်း မူးယစ်ဆေးဝါးကင်းစင်ကြောင်း စစ်ဆေးမှုအောင်မြင်ပြီးမှသာ မောင်းနှင်ခွင့်ပြုကြောင်း သိရသည်။
သတင်း - အင်ကြင်း
ဓာတ်ပုံ - YRTC
#ပြည်တွင်းသတင်း
