Superman ရုပ်ရှင်သစ် အောင်မြင်နေချိန်မှာ ပုံစံအသစ်နဲ့ ပွဲထွက်လာတဲ့ Henry Cavill
ဇူလိုင် ၁၄ရက်၊ ၂၀၂၅။
မင်းသား Henry Cavill ဟာ Superman ရုပ်ရှင်သစ် box office မှာ အောင်မြင်မှုတွေရနေချိန်မှာ ပုံစံအသစ်နဲ့ လူမြင်ကွင်းရှေ့ကို ထွက်ပေါ်လာခဲ့ပါတယ်။ သူဟာ ဇူလိုင်လ ၁၃ ရက်နေ့က လန်ဒန်မြို့မှာ ကျင်းပခဲ့တဲ့ Wimbledon တင်းနစ်ပြိုင်ပွဲကို တက်ရောက်ခဲ့တာ ဖြစ်ပါတယ်။
အသက် ၄၂ နှစ်အရွယ် Cavill ဟာ အရင်ကနဲ့မတူဘဲ ဆံပင်အရှည်ထားထားပြီး၊ ဦးထုပ်ဆောင်းထားတဲ့ ပုံစံအသစ်ကို ပြသခဲ့တာ ဖြစ်ပါတယ်။ သူဟာ Superman အဖြစ် နောက်ဆုံးသရုပ်ဆောင်ခဲ့ပြီးနောက်ပိုင်းမှာ အခုလို ပုံစံပြောင်းလဲလိုက်တာ ဖြစ်ပါတယ်။
သူအခုလို ပွဲထွက်လာတဲ့အချိန်ဟာ သူ့နေရာမှာ Superman အဖြစ် အစားထိုးသရုပ်ဆောင်ထားတဲ့ David Corenswet ရဲ့ ရုပ်ရှင်သစ် ရုံတင်တဲ့ ရက်သတ္တပတ်နဲ့လည်း တိုက်ဆိုင်နေတာ ဖြစ်ပါတယ်။ Superman ရုပ်ရှင်သစ်ဟာ ကမ္ဘာတစ်ဝန်းကနေ ဒေါ်လာ ၂၁၇ သန်းအထိ ဝင်ငွေရရှိထားတယ်လို့ သိရပါတယ်။
Henry Cavill ဟာ ၂၀၂၂ ခုနှစ် အောက်တိုဘာလက Superman အဖြစ် ပြန်လာပြီလို့ ကြေညာခဲ့ပေမယ့်၊ နှစ်လအကြာမှာတော့ ဒီဇာတ်ကောင်ကို ပြန်လည်သရုပ်ဆောင်တော့မှာ မဟုတ်ဘူးလို့ ထပ်မံကြေညာခဲ့တာ ဖြစ်ပါတယ်။
Mr.Wilddog ရေးသည်။