နေအဖွဲ့အစည်းပြင်ပက တတိယမြောက်ဧည့်သည်သစ် - 3I/ATLAS (C/2025 N1)
ပြီးခဲ့တဲ့ July 1 ရက်နေ့မှာ နေအဖွဲ့အစည်းရဲ့ အပြင်ဘက်ကနေ ရောက်လာတဲ့ တတိယမြောက် ဧည့်သည်သစ်တစ်ဦးကို ရှာဖွေတွေ့ရှိခဲ့တဲ့အကြောင်း NASA ကသတင်းထုတ်ပြန်လာပါတယ်။
ဒီဧည့်သည်ကတော့ 3I/ATLAS လို့ အမည်ပေးထားတဲ့ ကြယ်တံခွန် ဖြစ်ပြီး၊ လက်ရှိမှာ နေအနား ကို ဦးတည်ပြီး ရွေ့လျားနေပါတယ်။ နောက်ဆုံး အချက်အလက်များအရ သူရဲ့ တရားဝင် နာမည်ကို C/2025 N1 လို့ထပ်ပေးလိုက်ပြန်ပါတယ်။
ဘယ်လို သိရှိခဲ့တာလဲ ?
ဒီကြယ်တံခွန်ကို အမေရိကန်ပြည်ထောင်စု ဟာဝိုင်အီမှာရှိတဲ့ ATLAS (Asteroid Terrestrial-impact Last Alert System) စစ်တမ်းက ၂၀၂၅ ခုနှစ်၊ ဇူလိုင်လ ၁ ရက်နေ့ က စတင်တွေ့ရှိခဲ့တာပါ။
ကမ္ဘာ့နေရာအတော်များများက နက္ခတ္တဗေဒပညာရှင်တွေကလည်း ဒီကြယ်တံခွန်ရဲ့ ရွေ့လျားမှုကို လေ့လာပြီးနောက်မှာ သူရဲ့ နေအဖွဲ့အစည်းအတွင်းကိုဝင်လာတဲ့ လမ်းကြောင်းဟာ hyperbolic ပုံစံရှိတာကြောင့် နေအဖွဲ့အစည်းပြင်ပကနေ ရောက်လာတဲ့ ကြယ်တံခွန် ဖြစ်တယ်လို့ တွက်ချက်အတည်ပြုခဲ့ကြပါတယ်။ သူဝင်လာတဲ့လမ်းကြောင်းကို ခြေရာခံလိုက်တဲ့ အခါမှာ နေအဖွဲ့အစည်းပြင်ပကနေ ဝင်ရောက်လာတာဖြစ်တာကိုသိနိုင်ခဲ့တာပါ။
ဇွန်လ ၁၄ ရက်နေ့ကတည်းက ချီလီမှာရှိတဲ့ observatory က စတင်တွေ့ရှိခဲ့တဲ့ အချက်အလက်တွေလည်း ရှိနေခဲ့တယ်လို့ သိရပါတယ်။
(လွန်ခဲ့တဲ့ တစ်ပတ်လောက်က လည်း ဒီအကြောင်းကို တစ်ခြားနာမည်တစ်ခုနဲ့ ကျွန်တော်တို့ တင်ပြခဲ့ပြီးပါပြီ 3I/ Atlas လို့နာမည်ပြောင်းပေးလိုက်တာပါ ။ဒီနှစ်ခုကအတူတူပါပဲ။)
3I/ATLAS ဟာ နေအဖွဲ့အစည်းပြင်ပက ရောက်လာတဲ့ သုံးခုမြောက် အရာဝတ္ထု ဖြစ်ပါတယ်။ ပထမဆုံး တွေ့ရှိခဲ့တာကတော့ 'Oumuamua (၂၀၁၇ ခုနှစ်) ဖြစ်ပြီး၊ ဒုတိယတစ်ခုကတော့ 2I/Borisov (၂၀၁၉ ခုနှစ်) ဖြစ်ပါတယ်။
ဒီလို အပြင်ဘက်ကလာတဲ့ အရာဝတ္ထုတွေဟာ နေအဖွဲ့အစည်းရဲ့ အစောပိုင်းဖြစ်ပေါ်မှုနဲ့ စကြဝဠာရဲ့ လျှို့ဝှက်ချက်တွေကို ပိုမိုနားလည်နိုင်ဖို့ အခွင့်အရေးသစ်တွေ ပေးပါတယ်။ ဒီလို ဥက္ကာခဲတွေ ဟာ ကျွန်တော်တို့နဲ့မတူညီတဲ့ ကြယ်စနစ်တွေကနေ စတင်ဖြစ်ပေါ်လာတာဖြစ်လို့၊ကျွန်တော်တို့ရဲ့ နေအဖွဲ့အစည်းပြင်ပမှာ ဘယ်လိုအရာတွေရှိနေလဲဆိုတာကို လေ့လာနိုင်ဖို့ အဖိုးတန်တဲ့ သဲလွန်စတွေကို ပေးနိုင်ပါတယ်။
လက်ရှိလေ့လာမှုတွေအရ 3I/ATLAS ဟာ သူ့ထက်အရင် ဝင်လာဖူးတဲ့ နေအဖွဲ့အစည်းပြင်ပက အရာဝတ္ထုတွေထက် ပိုမိုကြီးမားပြီး ပိုမိုတောက်ပပါတယ်။ အချင်းအားဖြင့် ကီလိုမီတာ 0.8 ကနေ 24 ကီလိုမီတာအထိ ရှိနိုင်တယ်လို့ ခန့်မှန်းထားပါတယ်။ပိုနီးကပ်လာလေ ပိုတိကျတဲ့ အချက်အလက်တွေသိရမှာဖြစ်ပါတယ်။ကမ္ဘာပေါ်က အာကာသသိပ္ပံပညာရှင်တွေ အများစုက ဒီ Comet ကို စိတ်ဝင်တစားစောင့်ကြည့်နေကြပါတယ်။
တစ်ချို့သိပ္ပံယောင် page တွေ ပြောနေကြသလို ဂြိုလ်သားယာဉ်ပျံတွေ UFO တစ်စင်းလည်းမဟုတ်ပါဘူး။ ကြယ်တံခွန်တစ်ခုသာဖြစ်ပါတယ်။
သူ့ရဲ့ မျက်နှာပြင်မှာ ရေခဲနဲ့ ဖုန်မှုန့်တွေပါဝင်တဲ့အတွက် ကြယ်တံခွန်အဖြစ် သတ်မှတ်ထားပြီး ၂၀၂၅ ခုနှစ် အောက်တိုဘာလ ၂၉ ရက်နေ့မှာ နေနဲ့ အနီးဆုံးကို ရောက်ရှိမှာဖြစ်ပါတယ်။ သို့ပေမယ့် ကမ္ဘာမြေနဲ့ နေရဲ့ ဆန့်ကျင်ဘက်ခြမ်းမှာ သူရောက်နေမှာဖြစ်တာကြောင့် ကမ္ဘာပေါ်ကနေ တိုက်ရိုက်မြင်တွေ့ရမှာ မဟုတ်ပါဘူး။ ၂၀၂၅ ခုနှစ် ဒီဇင်ဘာလအစောပိုင်းမှာတော့ သူ့ကို ပြန်လည် မြင်တွေ့နိုင်မှာဖြစ်ပါတယ်။
ကမ္ဘာ အတွက်လည်း အန္တရာယ် မရှိသလို နေအနားကနေဖြတ်သန်းသွားမယ်ဆိုပေမယ့် မိုင်ပေါင်း သန်း၁၅၀ ကျော်အကွာအဝေးကဖြတ်သန်းသွားမှာမို့ နေအတွက်လည်း အန္တရာယ် မရှိပါဘူး။လောလောဆယ်သူရဲ့ အလျင်က တစ်နာရီကို မိုင် ၁၃၀၀၀၀ လောက်နဲ့ ခရီးနှင်နေပါတယ်။