#ပြည်တွင်းသတင်း
◼လေယာဉ်ကိုယ်ထည်အစိတ်အပိုင်းအချို့ပြုတ်ကျခဲ့မှု ခရီးသည်များအား အဲသံလွင်လေကြောင်းလိုင်း တောင်းပန်
အဲသံလွင်လေကြောင်းလိုင်းမှ ရန်ကုန် - တာချီလိတ် ခရီးစဉ်ပျံသန်းစဉ် ကိုယ်ထည်အစိတ်အပိုင်းတချို့ပြုတ်ကျခဲ့သည့်ဖြစ်စဥ်အပေါ် ခရီးသည်များအား အဲသံလွင်လေကြောင်းလိုင်းကယမန်နေ့( ဇူလိုင် ၄ ရက်)တွင် ပြန်လည်တောင်းပန်သည့် ထုတ်ပြန်ချက်တစ်စောင်ထုတ်ပြန်ခဲ့သည်။
အဲသံလွင်လေကြောင်းလိုင်း၏ လေယာဉ်ခရီးစဉ်အမှတ် ST-739 ဖြင့် ဇူလိုင်၂ ရက်နေ့တွင် ရန်ကုန်မှ တာချီလိတ်သို့ပျံသန်းစဉ် လေယာဉ်၏ညာဘက်တောင်ပံရင်းရှိ (Honey Comb) လေကာအဖုံးမှာလေတိုက်စားပြီး ပြတ်ထွက်မှုဖြစ်ပေါ်ခဲ့သော်လည်း တာချီလိတ်လေဆိပ်သို့ဘေးအန္တရာယ်ကင်းရှင်းစွာဆင်းသက်ခဲ့ကြောင်း ဆိုထားသည်။
အဆိုပါ လေကာပြားအဖုံးတပ်ဆင်ထားသောနေရာမှာ လေယာဉ်အတွင်းပိုင်း၏ Pressurization area နှင့် ဆက်စပ်မှုမရှိသည့်အတွက်လေယာဉ်၊ လေယာဉ်အမှုထမ်းများနှင့်ခရီးသည်များ၏ ဘေးအန္တရာယ် တစ်စုံတစ်ရာထိခိုက်မှုမရှိစေနိုင်ကြောင်း စစ်ဆေးတွေ့ရှိကြောင်း ထုတ်ပြန်ထားသည်။
"ဒါနဲ့ပတ်သက်ပြီးပြောရရင် တောင်ပန်တယ်ဆိုတဲ့ စကားကစဖြစ်တဲ့နေ့ကတည်ကပြောရမှာ။ အခုလိုင်းပေါ်မှာ အခုဖြစ်စဉ်တွေ အများကြီးတက်လာမှတောင်းပန်တယ်ဆိုတာ အရမ်းနောက်ကျပါတယ်။ ပြီးတော့ လေယာဉ်ရဲ့အပြင်အခွံကွာကျတဲ့အဖြစ်က လုံးဝကိုမဖြစ်သင့်ဘူး။ စစ်ဆေးရင်မြင်နေရတယ်။ လက်နဲ့ထိကိုင်ပြီးစစ်လို့ရတယ်။ ဒီအဖြစ်အပျက်ကစစ်ဆေးမှုအပိုင်းကို လုံးဝကိုခွင့်လွှတ်ပေးလို့မရဘူး။ အသက်တွေလည်းအပိုမပါဘူး"ဟု လေယာဉ်စီးခရီးသည် တစ်ဦးကသုံးသပ်ပြောဆိုသည်။
အဆိုပါ ရန်ကုန်မှတာချီလိတ်သို့ ပျံသန်းခဲ့သောဖြစ်စဉ်နှင့်ပတ်သက်၍ မိမိတို့၏လေးစားတန်ဖိုးထားရသော ခရီးသည်များစိတ်အနှောက်အယှက်ဖြစ်ခဲ့ရမှုနှင့် ခရီးစဉ်အစားထိုး ပျံသန်းမှုကြောင့်ခရီးစဉ်နောက်ကျခဲ့ရမှုများအတွက် အနူးအညွတ်တောင်းပန်ကြောင်း လေကြောင်းလိုင်းမှ ထုတ်ပြန်ထားသည်။
သတင်း - ပိုင်လေး
