အဲ့ဒီကောင်မလေးကလေ ...
ခရုလေးနဲ့တူတယ်
သန်မာချင်ယောင်
ဆောင်ထားသလောက်
သိပ်ကို ပျော့ညံ့တာမျိုးလေ ။
ဒါပေမယ့်
သူငိုလို့ ရတဲ့ လူအနားမှာမှ
သူ ငိုတယ်
တစ်လောကလုံး သူ့လုပ်စာထိုင်စားနေသလိုမျိုး မျက်နှာဘေးနဲ့ ကောင်မလေးအကြောင်းကို နားလည်သွားရင် ခင်ဗျား အပြစ်တွေ မြင်တော့မှာမဟုတ်ဘူး ။ အဲ့ဒီကောင်မလေးက ခေါင်းမာတယ် ဆိုတဲ့ စကားကနေပဲ စရမယ်ထင်တယ် ဒါမှမဟုတ် မာနကြီးတယ်ဆိုပြီးပဲ သတ်မှတ်ရမယ် ထင်ပါတယ် ။
အဲ့ဒီကောင်မလေးကလေ ... အဆင်ပြေပြေမပြေပြေ ပြုံးနေတတ်သလို နာကျင်စရာတွေအများကြီးကို တစ်ယောက်တည်း သိမ်းပြီး ထားတတ်တယ် ။ နှစ်ယောက်သိရင် နှစ်ယောက်စိတ်ညစ်ရမှာပေါ့ဆိုတဲ့ အတွေးမျိုး ။ ပြီးတော့ ... ဘာမှ မဟုတ်တာလေးနဲ့ဆိုပြီး မပျော်တာတွေကို ရောချတတ်တဲ့ ပုံစံမျိုးပေါ့ ။ လွှတ်ချလိုက်သလို ပေါ့ပါးနေပြလိုက်တာ ကွယ်ရာရောက်ရင် သေချာပေါက် တိတ်တိတ်လေး ခိုးငိုဦးမယ့် မျက်လုံးတွေနဲ့ ။
အဲ့ကောင်မလေးက သူ့ လာသနားတာကို သဘောမကျတတ်ဘူး ... သနားစရာကောင်းလိုက်တာဆိုတဲ့ စကားလုံးမျိုး သူ့ရှေ့မှာ ယောင်လို့တောင် မဟမိစေနဲ့ ။ သူက အဲ့ဒီအပြောမျိုးတွေ အဲ့ဒီ အကြည့်မျိုးတွေကို မုန်းတယ် ။ အဲ့လိုပြောတတ်တဲ့ လူမျိုးတွေကို ဘယ်တော့မှ မဆုံတော့အောင် ရှောင်တယ် ။ မလိမ်တတ်တဲ့ ကောင်မလေးကလေ မကြာခဏတော့ အဆင်ပြေချင်ယောင်ဆောင်တတ်တယ် ။ သူလိမ်နေရင် သိပ်သိသာတာ နှုတ်ခမ်းက ဖုံးမရအောင် ပြုံးလို့ နည်းနည်းလေး တည်ပြလိုက်ရင် ရီကျဲကျဲနဲ့ အမှန်တရားတွေ ထွက်ကျလာရော ။
ခင်ဗျားသိလား ... အဲ့ဒီကောင်မလေးကလေ ပျော်ချင်ယောင်ဆောင်တဲ့နေရတာမှာတော့ သိပ်တော်တာဗျ ဘယ်အချိန်ပဲ ကြည့်ကြည့် ဘာမှ မဖြစ်သလိုပုံစံမျိုးနဲ့ ဘယ်အရာကိုမှ သိပ်အလေးအနက်မထားသလို ပုံစံမျိုးနဲ့ ပြီးတော့ ဖြစ်မလာဘူးဆိုတဲ့အရာတွေကို မမျှော်လင့်ထားသလို ပုံစံမျိုးနဲ့ သိပ်နေတတ်တာ ။ မျက်နှာကိုက ချီထားသေးတယ် ပြီးရင် သူကပဲ ဦးအောင် ချေပြသေးတယ် ။ သူ့အတွေးမှာ အဆင်မပြေဘူးဆိုတဲ့ အရာတွေကို ရင်ဖွင့်ပြီးပြောချင်ပေမယ့် ချနင်းသွားရင်ဆိုတဲ့အတွေးနဲ့ အရာအားလုံးကို သိမ်းထားလိုက်ဖို့ပဲ ရွေးခဲ့တာ ။
သေချာသလောက်တော့ ... သူက သိပ်မာနကြီးတယ် ။ အဲ့ဒီမာနက အသားလွတ် ကြီးနေတာမျိုးတော့ မဟုတ်ဘူး ။ တခြားသူတွေဆီက ဘာဆိုဘာကိုမှ မလိုချင်တဲ့ မာနမျိုး ဘယ်နေရာမှာမဆို သူပဲ ပေးချင်တာ ပြီးတော့ သူပဲ ဖြည့်ဆည်းပေးချင်တာ ။ တစ်စုံတစ်ယောက်ဆီကနေ ဘာဖြစ်နေလို့ဆိုပြီး တောင်းနေရတာမျိုး သိပ်ပြီးတော့ သဘောမကျတတ်ဘူးလေ ။ အဲ့ဒီမာနလေးနဲ့ပဲ ဒီနေ့ ဒီအချိန်ထိ ရပ်တည်နေခဲ့တာပါ ။
ခေါင်းလည်းသိပ်မာတယ် ။ ဘူးဆို ဖရုံမသိတဲ့ ကောင်မလေးမျိုး မသွားချင်ဘူး မလုပ်ချင်ဘူး စသည်ဖြင့် သူ ငြင်းတဲ့အရာတွေကို ဘယ်တော့မှ မလုပ်ဖြစ်တာများတယ် ။ ဒီလိုပါပဲ ... အဲ့ဒီကောင်မလေးကို နားလည်သွားရင်လေ သူက ဘာမို့လို့လဲဆိုတဲ့ ပုံစံမျိုးနဲ့ အမှားတွေ လိုက်ရှာဖြစ်တော့မှာမဟုတ်ဘူး ။ ပြီးတော့ ဒါ သူ့ပုံစံပဲလေဆိုပြီး လက်သင့်ခံပေးလိုက်ရင် အဆင်မပြေတဲ့ ဆက်ဆံရေးဆိုတာ ရှိတော့မှာ မဟုတ်ဘူး ။
သေချာပါတယ် ... အဲ့ဒီကောင်မလေးအကြောင်းကိုသာ နားလည်သွားရင် ချစ်စရာမကောင်းတော့ဘူး ။ ဒါပေမယ့် တစ်သက်လုံး အနားနားရှိနေရင် ပျော်ဖို့ကောင်းမယ်ဆိုပြီးပဲ တွေးတတ်လာလိမ့်မယ် ။ သူ ဂျီကန်တာလေးတွေ ပြီးတော့ သူ ဆိုးတာလေးတွေ နောက်ဆုံး ခင်ဗျားကို စိတ်ကောက်တာတွေကအစ သူ ချစ်နေလို့ဆိုပြီး ခံစားသိလာလိမ့်မယ် ။ စကားတွေ အများကြီးပြောမှာ မကြောက်တော့ပဲ ဘာမှ မပြောပဲ တိတ်ဆိတ်နေမှာကိုပဲ တဖြေးဖြေး ကြောက်တတ်လာလိမ့်မယ် ။ အဲ့ဒီကောင်မလေးက သန်မာပါတယ်ဆိုတဲ့ စကားကိုသုံးပြီး သူ တကယ်ချစ်တဲ့ လူတစ်ယောက်အနားရောက်ရင်တော့ သေချာပေါက် ကလေးလေးတစ်ယောက်လိုဖြစ်နေလို့မယ် ။
အရင်က သိခဲ့ပါတယ်ဆိုတဲ့ ရင့်ကျက်တဲ့ မိန်းကလေးကလေ ခင်ဗျားအရှေ့ရောက်ရင် သူ သိမ်းထားတဲ့ နာကျင်မှုတွေကို စိတ်ရှည်လက်ရှည် ပြောပြနေလိမ့်မယ် ။ အဆိုးဆုံးက ... တစ်ခုမှတ်ထား ... ရှင့်ကို မချစ်ချင်တော့ဘူးဆိုတဲ့ စကားကို ပြောရင် သူက ပိုချစ်နေမိတယ်ဆိုပြီး ၀န်ခံတာမျိုးပဲ ။ အဲ့ဒီကောင်မလေးက ငါ ပိုချစ်နေရပါလားဆိုပြီး တွေးမိသွားရင် အဲ့ဒီလူကို မချစ်ချင်တော့ဘူးဆိုတဲ့ စကားမျိုး သုံးတတ်တာလေ ။ ပြီးရင် အရင်ကထက် ပိုတိုးလို့ ချစ်တာပါပဲ ။
အဲ့ဒီကောင်မလေးအကြောင်းကို နားလည်သွားရင် ... ဘာဖြစ်လို့လဲဆိုတဲ့ မေးခွန်းတွေ အများကြီး မေးဖြစ်တော့မှာ မဟုတ်ဘူး ။ သူ လုပ်ချင်တာလုပ်ပြီး ပျော်နေရတာလေးကို ငေးကြည့်ရင်း ကိုယ်ပါ ပျော်တတ်လာလိမ့်မယ် ။ အဲ့ဒီကောင်မလေးက တကယ်တမ်းကျတော့ သူ ဆိုးလို့ရတဲ့ လူအပေါ်မှာပဲ အများကြီးဆိုးတတ်တာပါ ။
#ကျေးကို
