ဝင်ငွေရလဒ်ကောင်းရရှိနေတဲ့ Brad Pitt ရဲ့ F1 ရုပ်ရှင်

ဇွန် ၂၉၊ ၂၀၂၅။

ဒါရိုက်တာ Joseph Kosinski ရဲ့ ဖော်မြူလာဝမ်းရုပ်ရှင်ဖြစ်တဲ့ "F1" ဟာ ပြေးလမ်းပေါ် စပြေးနေပါပြီ။ Warner Bros ကနေ ဖြန့်ချိပေးပြီး Apple Original ထုတ်လုပ်ရေးရုပ်ရှင်ဟာ ကြာသပတေးည ပြသမှုမှာတင် အံ့ဩဖွယ်ကောင်းလောက်တဲ့ ဝင်ငွေ ကန်ဒေါ်လာ ၁၀ သန်း ရရှိခဲ့ပြီး ယခုရက်သတ္တပတ်အကုန်မှာတင် ကန်ဒေါ်လာ ၆၀ သန်း အထိရရှိဖို့ ဖြစ်နိုင်ခြေရှိကြောင်း ညွှန်းဆိုနေပါတယ်။

ဒီပမာဏဟာ Apple ရဲ့ ရုံတင်ရုပ်ရှင်တွေထဲမှာ ဝင်ငွေရလဒ် အကြီးဆုံး ပမာဏဖြစ်မယ့် အလားအလာရှိပြီး ပရိတ်သတ်တွေဟာ ပြိုင်ကားရုပ်ရှင်တွေကို စိတ်ဝင်စားသေးလားဆိုတဲ့ မေးခွန်းတွေကို ဖြေသွားနိုင်မယ့် အချက်ဖြစ်ပါတယ်။

Apple ရဲ့ အင်အားကြီး ငွေကြေးပံ့ပိုးမှုနဲ့အတူ "Top Gun: Maverick" ဒါရိုက်တာ Joseph Kosinski နဲ့ Brad Pitt တို့ ပူးပေါင်းဖန်တီးထားတဲ့ "F1" ဟာ စျေးကြီးတဲ့ အနှုန်းအထားတစ်ခုဖြစ်ပြီး Apple ဟာ F1 နဲ့ပတ်သက်ပြီး ကန်ဒေါ်လာ ၂၅၀-၃၀၀ သန်းအထိ အကုန်အကျခံထားကြောင်း သိရပါတယ်။

ဥရောပ အခြေစိုက် F1 ပြိုင်ပွဲကို အခြေခံထားတဲ့ F1 ရုပ်ရှင်မှာ Brad Pitt က အနားယူသွားတဲ့ ပြိုင်ကားသမားတစ်ဦးအဖြစ် သရုပ်ဆောင်ထားပြီး Damson Idris က နောက်ဆုံးပေါ် အံ့ဖွယ်ပြိုင်ကားသမားအဖြစ် ပါဝင်ထားတာဖြစ်ပြီး ဒီရုပ်ရှင်မှာ ပရိတ်သတ်တွေ တကယ်လိုချင်နေတဲ့ အရာတွေပါဝင်နေပါတယ်။ ဒါကလဲ F1 မှာ တကယ့်ကားတွေ၊ တကယ့်အန္တရာယ်များတဲ့ လှုပ်ရှားမှုတွေပါဝင်ထားပြီး စူပါဟီးရိုးတွေရဲ့ ပျင်းရိမှုတွေ မပါဝင်တဲ့ အချက်တွေကြောင့် ဖြစ်ပါတယ်။ "Napoleon"၊ "Killers of the Flower Moon" စတဲ့ ဆုတွေအတွက် ရည်ရွယ်ထားတဲ့ ရုပ်ရှင်တွေကို ငွေကြေးအင်အားနဲ့ ပံ့ပိုးခဲ့တဲ့ Apple အတွက် "F1" ဟာ ပထမဆုံး စီးပွားရေးအောင်မြင်မှု ဖြစ်လာနိုင်ပါတယ်။