#ပြည်တွင်းသတင်း
◼ ချင်းတွင်း၊ စစ်တောင်းနှင့် ပဲခူးမြစ်ရေမြင့်တက်၊ မြစ်ကမ်းအနီးနှင့် မြေနိမ့်ပိုင်းနေထိုင်သူများသတိပြုရန်မိုးဇလထုတ်ပြန်
ချင်းတွင်းမြစ်ရေနှင့်ပဲခူးမြစ်ရေသည် ယနေ့(ဇွန် ၃၀ ရက်) ၆ နာရီခွဲအချိန်တိုင်းထွာချက်အရ နောက်တစ်ရက်အတွင်း စိုးရိမ်ရေမှတ်သို့ရောက်ရှိနိုင်သောကြောင့် မြစ်ကမ်းအနီးနှင့်မြေနိမ့်ပိုင်းနေထိုင်သူများသတိပြုရန် မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။
ချင်းတွင်းမြစ်ရေသည် မုံရွာမြို့တွင်စိုးရိမ်ရေမှတ်အောက်သုံးလက်မခန့်တွင်ရောက်ရှိနေပြီး နောက်တစ်ရက်အတွင်းစိုးရိမ်ရေမှတ်သို့ရောက်ရှိနိုင်ကြောင်း၊ စစ်တောင်းမြစ်ရေသည်လည်း မဒေါက်မြို့တွင် စိုးရိမ်ရေမှတ်အောက် ပေဝက်ကျော်တွင်ရောက်ရှိနေပြီး နောက်တစ်ရက်အတွင်း စိုးရိမ်ရေမှတ်သို့ရောက်ရှိနိုင်ကြောင်း၊ ပဲခူးမြစ်ရေသည် ပဲခူးမြို့၏စိုးရိမ်ရေမှတ်အောက် နှစ်ပေခွဲကျော် တွင်ရောက်ရှိနေပြီး နောက် ၃၆ နာရီအတွင်း စိုးရိမ်ရေမှတ်သို့ရောက်ရှိနိုင်ကြောင်း ထုတ်ပြန်ထားသည်။
"ကိုယ့်ဒေသကအနိမ့်ပိုင်းနေသူတွေကိုတော့ လိုက်လံသတိပေးတာတွေလုပ်နေတဲ့အပြင် စောင့်ကြည့် တာတွေလည်းလုပ်နေပါတယ်။ အချိန်မီကူညီဖို့အတွက်လည်း အဆင်သင့်ပြင်ဆင်ထားပါတယ်" ဟု ပဲခူးမြို့မှ ပရဟိတအသင်းတစ်ခုမှတာဝန်ရှိသူတစ်ဦးကပြောသည်။
မုံရွာမြို့၊ မဒေါက်မြို့နှင့် ပဲခူးမြို့များရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများအနေဖြင့် ကြိုတင် သတိပြုနိုင်ရန်နှင့် မြစ်ရေမြင့်တက်လာပါက အချိန်မီရှောင်ရှားနိုင်ရန် မိုးဇလကအသိပေးနှိုးဆော် ထားသည်။
သတင်း - ပိုင်လေး
