ထရမ့်ထုတ်မယ့် ဒေါ်လာ ၅၀၀ တန် ရွှေရောင် T1 Phone
"အမေရိကန်တွင် လုပ်သည်" ဆိုတဲ့ နိုင်ငံတော်ဖုန်းကို အမေရိကန်သမ္မတက ထုတ်ပါတော့မယ်။
iPhone ကို အမေရိကန်မှာ ထုတ်ဖို့ ပြောမရတဲ့အဆုံး သမ္မတကိုယ်တိုင် ကိုယ့်ဘာသာ ဖုန်းကုမ္ပဏီထောင်ပြီး ထုတ်လိုက်တာလို့ ဆိုရမှာပါ။ Trump Organization က မိုဘိုင်းလ်ဖုန်း plan နဲ့ ၄၉၉ ဒေါ်လာတန် T1 Phone ဖုန်းအပါအဝင် ကြိုးမဲ့စီးပွားရေးလုပ်ငန်းလုပ်ဖို့ Trump Mobile ဆိုပြီး ထောင်လိုက်ပါတယ်။
Trump Mobile ရဲ့ ဈေးဦးပေါက်ဖုန်းက အမေရိကန်အလံနဲ့ ရွှေရောင် T1 Phone ပါ။ ဒီဖုန်းက iPhone 17 ထက်အရင်ထွက်ဖို့ ရှိပါတယ်။ အမေရိကန်မျိုးချစ်တွေအကြိုက် ဒီဇိုင်းပါပဲ။ ကြားရသလောက်ဆို T1 ဖုန်းက AI Face Unlock နဲ့ မှန်ပြင်အောက် လက်ဗွေပါမယ်။ display က ၆.၈ လက်မ AMOLED punch hole display ဖြစ်ပါမယ်။
အမေရိကန်ထုတ်ဖုန်းဆိုပေမယ့် အမေရိကန်မှာ AMOLED display ထုတ်တဲ့သူမရှိတော့ တခြားနိုင်ငံက မှာရမှာပါပဲ။ Face Unlock နည်းပညာအတွက်သုံးတဲ့ VCSEL ကလည်း ပြည်ပကပဲ ထုတ်တာပါ။ ကင်မရာတွေကိုတော့ နောက်ဘက် 50MP နဲ့ 2MP ၊ ရှေ့ 16MP သုံးမယ်လို့ ကြားပါတယ်။ ကင်မရာ modules တွေလည်း အပြင်ကပဲ သွင်းရဖို့ ရှိပါတယ်။
အမေရိကန်ဖြစ်စစ်တာတစ်ခုက Android 15 နဲ့ လာတာပါ။ chipset အကြောင်း မကြားရသေးလို့ မပြောနိုင်သေးပေမယ့် RAM 12GB ပါပြီး 256GB storage နဲ့ SD card ထပ်စိုက်နိုင်မယ်လို့ ပြောပါတယ်။ ဘက်ထရီ 5000 mAh သုံးတာက မဆိုးပေမယ့် 20W charging ကတော့ အားသွင်းရ စိတ်ရှည်မှ ဖြစ်ပါမယ်။
T1 ဖုန်းက pre-order အတွက် ဒေါ်လာ ၁၀၀ ငွေချေ down payment လုပ်ပြီး မှာထားလို့ ရပါတယ်။ ဖုန်းပြော အင်တာနက်သုံးအတွက် mobile plan ကိုတောင် ထရမ့်ရဲ့ သမ္မတသက်တမ်း ၄၅ ဆက်နဲ့ ၄၇ ဆက်ကို ရည်ရွယ်ပြီး လစဉ်ကြေး ၄၇.၄၅ ဒေါ်လာ ကောက်ထားပါတယ်။
အမေရိကန်မှာ ဖုန်းမထုတ်တဲ့ အမေရိကန်ဖုန်းကုမ္ပဏီတွေကို ၂၅% အခွန်ကောက်မယ်ဆိုတဲ့ ထရမ့်ရဲ့ဖုန်းကို ဈေးကွက်က ဘယ်လို တုန့်ပြန်မလဲ စောင့်ကြည့်ရမှာပါ။