#ပြည်တွင်းသတင်း
◼ရန်ကုန်အပါအဝင်တိုင်းနှင့်ပြည်နယ်အချို့၌ နေရာကွက်၍ မိုးကြီးနိုင်
လက်ရှိဖြစ်ပေါ်နေသည့် လေဖိအားနည်းရပ်ဝန်း၏အရှိန်ကြောင့် ရန်ကုန်အပါအဝင် တိုင်းနှင့်ပြည်နယ်အချို့၌ နေရာကွက်၍မိုးကြီးနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက ယနေ့(ဇွန် ၁၇ ရက်) မွန်းလွဲ ၂ နာရီတွင်ထုတ်ပြန်သည်။
ဘင်္ဂလားဒေ့ရှ်နိုင်ငံ(အနောက်တောင်ပိုင်း) နှင့်ဆက်စပ်လျက်ရှိသည့် အိန္ဒိယနိုင်ငံ၊ အနောက်ဘင်္ဂလား ပြည်နယ်တို့တွင် လေဖိအားနည်းရပ်ဝန်းတစ်ခုဖြစ်ပေါ်နေကြောင်း၊ ယင်းလေဖိအားနည်းရပ်ဝန်း၏ အရှိန်ကြောင့် မနက်ဖြန်(ဇွန် ၁၈ ရက်) နံနက်ပိုင်းအထိခန့်မှန်းချက်များအရ နေပြည်တော်၊ ရန်ကုန်တိုင်း၊ ပဲခူးတိုင်း၊ စစ်ကိုင်းတိုင်း(အထက်ပိုင်း)၊ ဧရာဝတီတိုင်း၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်နှင့်ရခိုင်ပြည်နယ်တို့တွင် နေရာကွက်၍မိုးကြီးနိုင်ပြီး ရွာရန်ရာနှုန်းပြည့်ဖြစ်ကြောင်း မိုးဇလကခန့်မှန်းထားသည်။
ထို့ပြင် ရန်ကုန်တိုင်း၊ ဧရာဝတီတိုင်းနှင့်ရခိုင်ပြည်နယ်တို့တွင် မိုးတိမ်တောင်များဖြစ်ထွန်းလျက်ရှိပြီး၊ အဆိုပါမိုးတိမ်တောင်များရွေ့လျားရာနေရာတစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက် ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့်မိုးသီးကြွေခြင်း စသည့်တို့ဖြစ်ပေါ် နိုင်ကြောင်း မိုးဇလကအသိပေးထားသည်။
သတင်း - အင်ကြင်း
ဓာတ်ပုံ - CJ
